10 ماۋسىم 2019, 15:15 608 0 قاۋىپسىزدىك دينارا مىڭجاسارقىزى

قانات بوزىمباەۆ جارىقتى قالاي ۇنەمدەيدى؟

 ەنەرگەتيكا ءمينيسترى قانات بوزىمباەۆ ەلەكتر ەنەرگياسىن ۇيىندە جانە جۇمىسىندا قالاي ۇنەمدەيتىنى تۋرالى ايتىپ بەردى.

«ارينە، ەلەكتر جارىعى مەن جىلۋدى ۇنەمدەيمىن. جىلۋ بەرۋ جۇيەسىندە ارنايى قۇرىلعى ورناتىلعان. ەگەر دە جىلۋ باتارەياسى بەلگىلى ءبىر تەمپەراتۋراعا جەتسە، بۇل قۇرىلعى جىلۋ مەن سۋدى توقتاتادى. بۇل ءوز كەزەگىندە كوممۋنالدىق شىعىندار بويىنشا ۇنەمدەۋگە جول اشادى. ال ەلەكتر ەنەرگياسىنا توقتالساق، ۇيقىعا جاتار الدىندا بالالار ۇيدەگى ەلەكتر جارىعىن مىندەتتى تۇردە وشىرۋگە ۇيرەتىلگەن.  وسى ورايدا ەنەرگيا تيىمدىلىگى مادەنيەتىنە ەكپىن قويىپ وتىرمىز»، - دەدى بوزىمباەۆ.

سونىمەن قاتار ول «قازمۇنايگاز» عيماراتىندا ەنەرگيا قالاي ۇنەمدەلىپ جاتقاندىعىن ايتىپ بەردى. «ەنەرگەتيكا مينيسترلىگىندە دە ۇنەمدەۋ ءجۇرىپ جاتىر. بىزدە شىعىستار بويىنشا ەڭ از كورسەتكىشتەردىڭ ءبىرى تىركەلگەن. بۇگىندە ۆەدومستۆو «قازمۇنايگاز» عيماراتىندا ورنالاسقان. ساعات 18:30-دان كەيىن ءبىزدىڭ قىزمەتكەرلەردىڭ كومپيۋتەرلەرى اۆتوماتتى تۇردە وشىرىلەدى. بۇل رەتتە ادامداردى جۇمىستا نەگىزسىز ۇستامايمىز. سەبەبى باسشىلار بەلگىلەنگەن جۇمىس ۋاقىتىندا ماقساتتار ورىندالۋى ءۇشىن پروتسەستى ءتيىمدى تۇردە ۇيىمداستىرۋى كەرەك. ەگەر دە ۇلگەرمەسە، بۇعان باسشى كىنالى، ويتكەنى جۇمىس پروتسەسىن دۇرىس ۇيىمداستىرماعان»، - دەدى ۆەدومستۆو باسشىسى. بۇدان بولەك، ق. بوزىمباەۆ شاعىن كولەمدى جاڭارتىلاتىن ەنەرگيا كوزدەرىن قولداۋ بويىنشا زاڭ جوباسى ازىرلەنىپ جاتقاندىعىن اتاپ ءوتتى. بۇل شارالار حالىققا «جاسىل» ەنەرگەتيكا قۇرىلعىلارىن ءتيىمدى پايدالانۋعا مۇمكىندىك بەرەدى.

سوڭعى جاڭالىقتار