6 ماۋسىم, 16:18 407 0 الەۋمەت Turkystan Support

اتاۋلى الەۋمەتتىك كومەك الۋدىڭ كەدەرگىلەرى انىقتالدى

اقتوبەدە مەملەكەتتىك قىزمەتكەرلەردىڭ جارمەڭكەسى ءوتتى. وندا اتاۋلى الەۋمەتتىك كومەك، «باقىتتى وتباسى» باعدارلاماسى مەن مەكتەپتەرگە ەلەكتروندى تۇردە قابىلداۋ ءتۇسىندىرىلدى.

اقتوبە قالالىق جۇمىسپەن قامتۋ، ءبىلىم، جەر قاتىناستارى مەن قۇرىلىس ءبولىمىنىڭ ماماندارى تۇرعىنداردىڭ سۇراعىنا جاۋاپ بەردى. تۇرعىن ءۇي قۇرىلىس جيناق بانكىنىڭ ماماندارى «باقىتتى وتباسى» باعدارلاماسىن ءتۇسىندىردى. كوبى اتاۋلى كومەك الۋدىڭ جولدارىن سۇرادى. ماماندار كومەك الۋ ءۇشىن جۇمىستان باس تارتاتىندار مەن جۇمىستان شىعۋدى جوسپارلاعاندار بولعان.

«اتاۋلى الەۋمەتتىك كومەك الۋدا ەكى پروبلەما ءجيى كەزدەسەدى. بىرىنشىدەن، اتا-انا اجىراسقان سوڭ اليمەنت وندىرمەيدى. ال تابىس ەسەپتەۋ كەزىندە اليمەنت كىرىسكە جاتادى. انالارىمىز الدىمەن اليمەنت الۋى كەرەك، بولماسا سوت شەشىمىمەن كەلەدى. ەكىنشىدەن، تەكسەرۋ كەزىندە كوميسسيا ءوتىنىش بەرگەن وتباسىنىڭ زەينەتكەرلەرمەن بىرگە تۇراتىنىن انىقتايدى. ال ورتاق تابىستا كورسەتىلمەگەن. اتاۋلى الەۋمەتتىك كومەك تاعايىنداۋ كەزىندە «جۇمىستان شىعىپ كەتسەك، جالاقىمىز ازايسا كەلەسى ايدا الامىز با» دەپ سۇرايتىندار بار. جوق، ءبىز ولاردى جۇمىسقا ورنالاستىرۋىمىز كەرەك. قوعامدىق، الەۋمەتتىك جۇمىستار مەن جاستار تاجىريبەسى، قۇرىلىستا، جول سالۋ كەزىندە 100-120 مىڭ تەڭگە جالاقىمەن ەڭبەككە ارالاسۋ ۇسىنىلدى. بىراق «بىزگە جۇمىس ەمەس، ااك كەرەك» دەپ وتىرعاندار بار»، – دەدى قالالىق جۇمىسپەن قامتۋ ورتالىعى ديرەكتورىنىڭ ورىنباسارى التىناي ماحانوۆا. ماماندار كۇن سايىن 100-دەن استام ادامعا اتاۋلى الەۋمەتتىك كومەك تۋرالى كەڭەس الادى.

قابىلداۋعا كەلگەن ايگۇل تىلەۋجانوۆا 4 بالانىڭ اناسى. ول كۇيەۋى جۇمىس ىستەمەيتىنىن، سول ءۇشىن اجىراساتىنىن، سوت 6 ايعا سوزىلاتىنىن ايتىپ، كومەك سۇرادى. «مەنىڭ 4 بالامدى 6 اي بويى قالاي اسىرايمىن؟ سوندىقتان كومەك سۇراپ كەلىپ وتىرمىن. كۇيەۋىم جۇمىس ىستەگەن ەمەس، ءومىر بويى ءوزىم ەڭبەك ەتىپ كەلەمىن. بۇل جولى اجىراسۋدى قالادىم. قازىر ءوزىم بالا كۇتىمىمەن وتىرمىن»، – دەدى قالا تۇرعىنى ايگۇل تىلەۋجانوۆا. اتاۋلى الەۋمەتتىك كومەك بەرۋ كوميسسياسى بۇل ءوتىنىشتى جەكە قاراپ، شەشىم شىعاراتىن بولدى.

 

«تۇركىستان-اقپارات»

سوڭعى جاڭالىقتار