6 ماۋسىم, 16:13 187 0 رۋحانيات Turkystan Support

ورازا ايت – قۋانىش پەن شاتتىققا تولى مەيرام

كۇللى مۇسىلمان قاۋىمى كەشەلى بەرى ورازا ايت مەرەكەسىن تويلاپ، ءبىر-بىرىمەن قاۋىشىپ ءماز. بۇل كۇنى اللانىڭ رازىلىعى ءۇشىن ءبىر اي بويى اۋىز بەكىتىپ، مۇسىلماندىقتىڭ بەس پارىزىنىڭ ءبىرى سانالاتىن ورازانىڭ شارتتارىن ورىنداعان جاندار اۋزىن اشىپ، ايت نامازىندا باس قوسادى. بۇدان كەيىن تۋعان-تۋىستارى مەن جاقىندارىنا  ايتتاپ، كەلەسى ورازاعا ءتورت كوزى تۇگەل جەتۋىن تىلەيدى.

«ايت» ءسوزى – «مەرەكەلەۋ»، «حال سۇراسۋ»، «ءبىر-ءبىرىن قۋانتۋ»، «قۋانىشقا توپتالۋ»، «قارىمتا» دەگەن ماعىنالاردى بىلدىرەدى. اللا تاعالا ايت سايىن ادام بالاسىنا ءار ءتۇرلى جاقسىلىقتار بەرەدى. ايت مەيرامى الدىمەن ايت نامازىن وقۋمەن باستالادى. سۇيىكتى پايعامبارىمىز مۇحاممەد (س.ع.س.) ءوز وسيەتىندە: «ايت كۇنى ءبىرىنشى ورىندايتىنىمىز – ناماز وقۋ» دەگەن. بۇل ناماز يسلامنىڭ ۇرانى بولعاندىقتان، پايعامبارىمىز مۇحاممەد (س.ع.س.) ومىرىندە ونى ءبىر رەت تە قالدىرماي وقىعان. ايتتا مۇسىلمانداردىڭ ءبىر-بىرىمەن تاتۋلىقتارىن ارتتىرۋى – مەرەكەنىڭ نەگىزگى ءسانى. بۇل مەيرامنىڭ ەرەكشەلىگى –  ادامداردى باۋىرمالدىلىققا، كىشىپەيىلدىلىككە، كەشىرىمدىلىككە، سۇيىسپەنشىلىككە شاقىرادى.

ورازا ايت مەرەكەسىمەن قۇتتىقتاعان مەملەكەت باسشىسى قاسىم-جومارت توقاەۆ: «ادامگەرشىلىككە، مەيىرىم مەن قايىرىمدىلىققا ۇندەيتىن قاسيەتتى رامازان ايىنىڭ اياقتالۋى – كۇللى مۇسىلمان ۇمبەتى ءۇشىن ماڭىزدى مەرەكە.  ورازا ايت كۇندەرى ءار مۇسىلمان تۋعان-تۋىستارى مەن باۋىرلارىنا قامقورلىق كورسەتىپ، مۇقتاج جاندارعا قول ۇشىن سوزىپ، ءوزىنىڭ رۋحاني دامۋىنا زور ءمان بەرەدى. ىزگى ويلار مەن يگى ىستەر ءوزارا تۇسىنىستىك پەن كەلىسىمگە باستايدى، ادامداردى ورتاق ماقسات-مۇددەگە جەتەلەيدى.    قازاقستان – بەيبىت ءومىر مەن جاسامپازدىقتىڭ مەكەنى. وزگە ءدىني سەنىمدەرگە قۇرمەت، تولەرانتتىلىق پەن ادامگەرشىلىك قۇندىلىقتار – حالقىمىزعا ءتان يگى قاسيەتتەر.   يسلام ءىلىمى وتانعا دەگەن سۇيىسپەنشىلىك پەن ۇلتتىق داستۇرگە بەرىك قوعامىمىزدىڭ رۋحاني جاڭعىرۋ يدەياسىنا تولىق ساي كەلەدى.   ەلىمىز امان، جۇرتىمىز تىنىش بولسىن!   ءار شاڭىراققا باق-بەرەكە تىلەيمىن! ورازا ايت قۇتتى بولسىن!» دەگەن يگى تىلەگىن جەتكىزدى.

ايتتىڭ العاشقى كۇنى «نۇر استانا» مەشىتى مەن «استانا» مەدرەسە كوللەدجىنە بارعان قازاقستان پرەزيدەنتى ق.توقاەۆ مۇنداي وقۋ ورنىندا وقيتىن شاكىرتتەر ىنتالى ءارى تاربيەلى بولۋى كەرەكتىگىن اتاپ ءوتتى.

ال قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي سەرىكباي قاجى وراز ءوز قۇتتىقتاۋىندا: «ءار وتباسىنا باق پەن بەرەكە، بىرلىك پەن يگىلىك تىلەيمىن. اللا تاعالا وتىز كۇن تۇتقان ورازامىزدى، جاساعان قۇلشىلىق-عيباداتىمىزدى، بەرگەن ساداقامىزدى، بارشا يگى يمانىمىزدى قابىل ەتىپ، مول ساۋاپتان جازعاي! ورازا ايت – وتباسىلىق مەرەكە. مەيرام كۇنى اتا-انامىزعا، كىشكەنتاي بۇلدىرشىندەرگە، اعايىن-تۋىستارعا سىيلىق ۇلەستىرىپ، ولاردى قۋانىشقا بولەۋ – مەرەكەنىڭ ءسانىن ارتتىرا تۇسەتىن يگى ءىس. جابىرقاعان جاندى دەمەپ، قاريالاردى قۋانىشقا بولەپ، كومەككە مۇقتاج ادامنىڭ العىسى مەن باتاسىن الۋ – ول دا ساۋاپتى امالدىڭ ءبىرى»، – دەدى.

 

«تۇركىستان-اقپارات»

تەگتەر رامازان ايت

سوڭعى جاڭالىقتار