6 ماۋسىم, 13:10 436 0 ءبىلىم ارمان قۇدايبەرگەن

باعاسى ۋداي، ءبىلىمى قانداي نەمەسە اقىلى مەكتەپتەر كىمگە ءتيىمدى؟

ەرتەرەكتە «كۇش – بىلىمدە، ءبىلىم – كىتاپتا» دەگەن ءتامسىل ءجيى ايتىلاتىن. كىتاپتى سەرىگىنە اينالدىرعاندارعا «وقىمىستى» دەگەن لاقاپ تاعىلىپ، «ۇلكەن ازامات بولايىن دەپ تۇر» دەپ جاقسىلىققا جورۋشى ەدى. بۇگىن شە؟ «بالام كىتاپ وقىسىن» دەپ ەمەس، «قىمبات مەكتەپتە وقىسىن» دەيتىن اتا-انالار كوبەيدى. سوندا كىتاپتىڭ ورنىن اقىلى ءبىلىم وشاقتارى باسقان با؟ ەلىمىزدە جىل سايىن اقىلى مەكتەپتەردىڭ سانى ارتىپ كەلەدى. ءتىپتى وعان سۇرانىس تا جوعارى. نەگە؟

«وتكەن وقۋ جىلىنىڭ باسىندا الماتىداعى پالەن دەگەن جەردە، تۇگەن دەگەن اقىلى مەكتەپ اشىلدى» دەپ ءبىر سىيلاس جىگىت اڭگىمەسىن باستادى. ەلەڭ ەتە قالدىق. سول مەكتەپتىڭ ۇيىمداستىرۋ جۇمىستارىنىڭ باسى-قاسىندا جۇرگەن دوسىمىز الدىن-الا جوسپار بويىنشا 140-150 ادامعا شاقتالىپ سالىنعان مەكتەپتە وقۋ باعاسى 300 مىڭ تەڭگەنىڭ توڭىرەگىندە بولعانىن جەتكىزدى. قۇرىلىس جۇمىستارى اياقتالىپ،  وقۋعا قابىلدانۋ باستالا سالىسىمەن مىڭعا تارتا ۇمىتكەر ساۋ ەتە قالىپتى. سونىڭ ءبارى دە 300 مىڭ تەڭگەدەن اي سايىن اقى تولەۋگە ساقاداي ساي. مەكتەپ اكىمشىلىگى سولاردىڭ 300-گە جۋىعىن ءبىلىم وشاعىنا قابىلداپتى. سوندا اكە-شەشەمىزدىڭ جىلىنا 500 مىڭ تەڭگەنى ارەڭ جيىپ، قازۇۋ-دا وقىتقانى ەسىمە ءتۇستى. جاڭاعى مەكتەپتىڭ ءبىر سىنىبىن ءبىتىرۋ، مەنىڭ باكالاۆرياتتى تولىقتاي يگەرىپ، مامان بولىپ شىعۋىمنان دا قىمباتقا تۇسەدى ەكەن. وسىلايشا اتالعان تاقىرىپ قىزىقتىرا باستادى. بۇرىنىراقتا اقىلى مەكتەپتىڭ بار ەكەنىن بىلسەك تە، ونىڭ باسەكەگە اينالىپ كەتكەنىنەن بەيحابار بولىپپىز.

اقىلى مەكتەپتەر كوشىن شۆەيتسارياداعى Institute Le Rosey ءبىلىم وشاعى باستايدى ەكەن. اتالعان مەكەمەدە ءبىلىم الۋ ءۇشىن ءار بالا 73 مىڭ 150 اقش دوللارىن تولەۋ كەرەك. ال قازاقستانداعى ەڭ ەليتالى حالىقارالىق مەكتەپ – Haileybury Almaty. كوممەرتسيالىق ەمەس اكتسيونەرلىك ۇيىم مەنشىگىندەگى مەكەمە ۇلىبريتانياداعى اتاقتى Haileybury and Imperial College ماماندارىمەن وداقتاسا جۇمىس ىستەيدى. اشىق مالىمەت كوزدەرىنە سۇيەنسەك، قازىر بۇل ءبىلىم وشاعىندا شامامەن 600-گە جۋىق تالاپكەر ءبىلىم الادى. ولار ورتا ەسەپپەن ايىنا 697 مىڭ تەڭگە كولەمىندەگى قاراجاتتى مەكتەپ اكىمشىلىگىنە اۋدارادى. اكتسيونەرلىك مەنشىك بولعاندىقتان قۇرىلتايشىلار قاتارىندا تانىمال كاسىپكەرلەر بار. اتاپ ايتساق، بولات وتەمۇراتوۆتىڭ «اسىل ميراس» قايىرىمدىلىق قورى، سەرجان جۇماشوۆ، نۇرجان سۋبحانبەردين، ايدان كاريبجانوۆ، مارعۇلان سەيسەمباەۆ، الفيا قۋانىشەۆا باسشىلىق ەتەدى. مەكتەپتە 60-قا جۋىق جوعارى ساناتتى شەتەلدىك پەدوگوگ قىزمەت اتقارادى. ولاردىڭ باسىم كوپشىلىگى ۇلىبريتانيا ازاماتتارى. ايىنا 697 مىڭ تەڭگە تولەيتىن، مەكتەپتىڭ نە ەرەكشەلىگى بار دەسەڭىز تۇلەكتەر ەشقانداي ۇلتتىق بىرىڭعاي تەستىلەۋ تاپسىرمايدى. ەسەسىنە شەت ەلدىك جوو وقۋعا تاپسىرادى. ءتىپتى QS رەيتينگىسى بويىنشا ۇزدىك 100 ۋنيۆەرسيتەتكە كىرەتىن وقۋ ورىندارى ارنايى ءبىلىم گرانتتارىن قاراستىرىپ، ءبىلىمدى بالالاردى وسى مەكتەپتەن تاڭداپ الادى ەكەن. ال مەكتەپتىڭ تابىسى 4,2 ملرد تەڭگەگە جۋىقتايدى.

الماتى مەن استاناداعى 50-دەن استام اقىلى مەكتەپتە شامامەن العاندا 150 مىڭعا جۋىق بالا وقيدى. اتا-انا بالاسىن اقىلى مەكتەپكە بەرەردە ونداعى ءبىلىم ساپاسى مەن بالا بولاشاعىنا باسا دەن قويادى دەيدى پسيحولوگ ماماندار. اقىلى مەكتەپتەردىڭ كوبىندە ءبىر سىنىپتا 8-10 بالا وقىسا، سوعان سايكەس وقۋشىلار سالالىق پاندەردى جاقسى مەڭگەرىپ شىعادى. مەملەكەت تەگىن ءبىلىم الۋعا مۇمكىندىك جاراتىپ تۇرعاندا، نەگە اتا-انا قالتاسىنان قاعىلىپ اقىلى ءبىلىم وشاقتارىنا جۇگىرۋ كەرەك؟ الدە بۇل مەملەكەتتىك مەكەمەلەردەگى ءبىلىم ساپاسى ناشار، ۇستازدار بىلىكتىلىگى تومەن دەگەنگە سايا ما؟ نە دە بولسا،

 ءبىلىم بيزنەسكە اينالعاندا

 قارا حالىقتىڭ ءحالى ەسكەرۋسىز قالماسا ەكەن. ويتكەنى وسىدان بىرنەشە جىل بۇرىن ءبىلىم مينيسترلىگىندە مەملەكەتتىك مەكتەپتەردى اقىلى ءبىلىم وشاقتارىمەن بىرىكتىرۋ جايى ءسوز بولىپ قالعان-دى. سوندا مينيسترلىك وكىلدەرى مەملەكەتتىك مەكتەپتە وقيتىن بالالارعا جىل سايىن ۇكىمەتتەن 200 مىڭ تەڭگە كولەمىندە قاراجات قاراستىرىلاتىنىن ايتقان. سول قارجىنى تيىسىنشە جەكەمەنشىك مەكتەپتەرگە سۋبسيديا رەتىندە اۋدارىلۋى مۇمكىن بولعان. وسىدان بىرنەشە جىل بۇرىن ءبىلىم جانە عىلىم ۆيتسە-ءمينيسترى بيبىگۇل اسىلوۆا: «قازىر اتا-انالاردىڭ باسىم بولىگى بالالارىن پرەميۋم ساناتتاعى  مەكتەپتەردە وقىتقىسى كەلەدى. الايدا بۇعان بارلىعىنىڭ قارجىسى جەتە بەرمەيدى. وسى ولقىلىقتىڭ ورنىن تولتىرۋ ءۇشىن ءبىز جەكەمەنشىك مەكتەپتەرگە سۋبسيديا قاراستىرۋدى كوزدەپ وتىرمىز. ياعني ۇكىمەت اتا-انالاردىڭ قالتاسىنا تۇسەتىن سالماقتىڭ ءبىر بولىگىن ءوزى وتەيدى. بۇل الەمدىك تاجىريبەدە بار نارسە»، – دەگەن ەدى. ەگەر سونداي بولعان جاعدايدا 200 مىڭ تەڭگە اقىلى مەكتەپتىڭ 10 پايىزىن عانا جاۋىپ، قالعان 90 پايىزى اتا-اناعا سالماق بولماق. سوندا ءبىر ۇيدەن 5-6 بالاسى مەكتەپكە باراتىندار قايتپەك؟ بۇل العاشقىدا جاپپاي ورىن الاتىن رەفورما بولماعانىمەن، بولاشاقتا سول كۇنگە جەتپەيتىندىگىمىزگە كىم كەپىل؟ بالاسىنا جىلىنا ءبىر كويلەك الىپ بەرۋگە قاراجات تۇرعىسىنان قينالاتىندار، 1-2 ميلليوندى ءبىر كلاسستىق ءبىلىم ءۇشىن سارپ ەتپەك تۇگىلى، تابا الادى دەۋ قيىن.

قوعامدا ءار ايتقان پىكىرى قىزۋ تالقىعا تۇسەتىن اكادەميك اسقار جۇمادىلداەۆ تا بۇل رەفورماعا قولداۋ ءبىلدىرىپ: «جەكەمەنشىك مەكتەپتەردە مەملەكەتتىك مەكتەپتەردە جوق مۇمكىندىك بار.  مەملەكەتتىك مەكتەپتەر ماماندارىن  بىلىم جۇيەسى وزىق تۇرعان ەلدەرگە  تاجىريبەسىن جەتىلدىرۋگە جىبەرە المايدى.  وبلىس ورتالىعىنان شالعاي ورنالاسقان مەكتەپ مۇعالىمدەرى ءۇشىن وبلىس ورتالىعى نەمەسە الماتى مەن استانادا ءبىلىم جەتىلدىرۋدىڭ ءوزى ۇلكەن كۇش. سوندىقتان  مەملەكەتتىڭ جەكە سەكتوردىڭ مۇمكىندىگى ارقىلى مەملەكەتتىك مەكتەپتەردىڭ جۇگىن جەڭىلدەتۋ تۋرالى ۇسىنىسىن قولدايمىن»، – دەپ وي بولىسكەن ەكەن. اكادەميكتىڭ سوزىندە جان بار، دەگەنمەن، ءبىلىمدى بيزنەسكە اينالدىرىپ، اقىلى ءبىلىم وشاقتارىن كوبەيتكەننەن گورى، ساپالى ءبىلىم بەرەتىن

 ۇستازدار بىلىكتىلىگى ارتسا

الدەقايدا ءتيىمدى بولماس پا ەدى؟ جەكەمەنشىك، اقىلى مەكتەپتەر جايىندا الماتى مەنەدجمەنت ۋنيۆەرسيتەتىنىڭ پرەزيدەنتى اسىلبەك قوجاحمەتوۆ تە ءبىرشاما وي بىلدىرگەن. «جەكەمەنشىك مەكتەپ اشۋدى ويلاعان ادام الدىمەن پايدانى ەمەس، وزگە جەكەمەنشىك مەكتەپتەردەن قانداي ارتىقشىلىعىم بولادى دەگەن سۇراقتىڭ جاۋابىن ويلاۋى كەرەك. سەبەبى جەكەمەنشىك مەكتەپتەر بارلىق ەلدەردە قولدانىستاعى ءبىلىم جۇيەسىنىڭ كەمشىلىگىن تولىقتىرىپ تۇراتىن ۇلكەن كۇش. قازاقستاندا جەكەمەنشىك مەكتەپتەر كوپ بولۋى ءتيىس. سوندا باسەكە پايدا بولادى، ال باسەكە بولعان جەردە باعا تومەندەيدى جانە جەكەمەنشىك مەكتەپتىڭ مەملەكەتپەن ارىپتەستىگى ارتادى. وسىلاي بولعاندا  مەكتەپ وقۋشىلارىنىڭ  ۇشتەن ءبىر بولىگى جەكەمەنشىك مەكتەپتەردە وقۋعا قول جەتكىزەدى»، – دەيدى ا. قوجاحمەتوۆ. بۇل دا ءبىراز ۋاقىتتى تالاپ ەتەدى. ءبىر توقتالىپ وتەر جايت، مەملەكەتتىك مەكتەپتەردەگى ءبىلىم ساپاسىن، اقىلى مەكتەپتەر دەڭگەيىنە جەتكىزۋگە سوندا نە قولبايلاۋ بولىپ وتىر؟ ءبىزدىڭ ەلدە دە تاجىريبەلى، بىلىكتىلىگى جوعارى ۇستاز ماماندار بارشىلىق. ولاردىڭ دەنى جالاقىنىڭ تىم از ەكەنىن العا تارتادى. الەمدەگى ۇزدىك مەكتەپ دەپ مويىندالاتىن ۇلىبريتانيا، اقش، جاپونيا، وڭتۇستىك كورەيا ءبىلىم وشاقتارىندا ۇستازدارعا شاشەتەكتەن ەڭبەكاقى تولەيدى. بالكىم سودان بولسا كەرەك، ولار وقىتقان بالالار عىلىم ۇيرەنىپ، عالىم بولىپ، ونەرتاپقىش اتانىپ جاتادى.

جالپى اقىلى مەكتەپتەر كوبەيگەنى باسەكەلەستىكتى ارتتىرۋى مۇمكىن. وسىندايدا حالقىنىڭ قامىن ويلاپ تەگىن ءبىلىم، مادەنيەت، ادەبيەت وشاقتارىن سالعىزعان مەتسەناتتار ەسكە تۇسەدى. TÚRKISTAN گازەتىنىڭ بيىلعى №12 سانىندا «قازاق جانە قايىرىمدىلىق» اتتى ماقالا جارىققا شىققان بولاتىن. سوندا قازاق دالاسىنداعى مەتسەناتتار تۋرالى، ولاردىڭ كوشىن باستايتىن مامانقۇتتىڭ ۇرپاقتارى جايىندا كەڭىنەن اڭگىمەلەگەن ەدىك. ءوز قالتاسىنان اقشا شىعارىپ، مەكتەپ سالدىرعان مامانقۇتتىڭ ۇلدارى مەن نەمەرەلەرى وقىتۋشىلاردى شەت ەلدەن الدىرتىپ، تىپتەن وقۋشىلاردى اس-سۋ، جاتىن ورىنمەن قامتاماسىز ەتكەن. مۇنداي ابزال ازاماتتاردىڭ قاتارى سيرەمەسە دە، كوبەيۋ قارقىنى باياۋ. ەسەسىنە ۇرپاق ەرتەڭىن بيزنەسكە ايىرباستايتىندار كۇن ساناپ ەسەلەنىپ جاتىر. بۇنىڭ شەگى دە بار شىعار. باس اقىنىمىز اباي: «بولماساڭ دا ۇقساپ باق، ءبىر عالىمدى كورسەڭىز.

ونداي بولماق قايدا

 دەپ، ايتپا عىلىم سۇيسەڭىز» دەمەپ پە ەدى. قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورى قارجىلاندىراتىن «ارىستان» مامانداندىرىلعان ليتسەيى جايىندا از-كەم حاباردارمىز. وندا 9-10-11 سىنىپتاردا نەبارى 240 ليتسەيست ءبىلىم الادى. ولارعا جىل سايىن 10 مىڭ اقش دوللارى كولەمىندە قارجى بولىنەتىن كورىنەدى. 5 مەزگىل تاماعى مەن جەكە مەكتەپ، اسكەري فورمالارى سونىڭ ەسەبىنەن تىگىلەدى.  مەكەمە باسشىلارى جىل سايىن 80 بالاعا ءبىلىم گرانتىن بولەدى، ال ۇمىتكەرلەر سانى 1000-نان اسىپ جىعىلادى. بۇل دا مەتسەناتتىقتىڭ ءبىر ۇلگىسى ىسپەتتى. ايتپەسە قازاق اسكەرىنىڭ ەليتاسىن دايىندايتىن مەكەمە ءبىلىم بەرۋدى اقىلى ەتسە دە بولۋشى ەدى. بالام قر قورعانىس سالاسىنىڭ جوعارى ساناتتى مامانى بولسىن دەيتىن باي-ماناپتار ءبىرشاما. مەكەمە ۇجىمى بولسا «بىزگە قاراجات ەمەس، قازاق اسكەرىنىڭ بولاشاعى ماڭىزدى» دەيدى. وسىدان بولسا كەرەك ليتسەي «مىندەت! ابىروي! ەرلىك!» سوزدەرىن ۇران ەتەدى.

قاي مەملەكەت بولماسىن ءبىلىم بەرۋ ىسىنە بەي-جاي قارامايدى. دەسەك تە ءار ەل ءوزى ءجون دەپ تاپقان رەفورمالار ارقىلى ءبىلىم بەرۋدى قۇپ كورەدى. ماسەلەن جاھان ەلدەرى اراسىندا ءبىلىم بەرۋ جۇيەسى بويىنشا كوش باستاپ تۇرعان ەل رەتىندە – وڭتۇستىك كورەيا ايتىلادى. 8 جانە 10 جاس ارالىعىندا باستاۋىش مەكتەپتە وقيتىن بالالار مۇندا كورەي ءتىلى، ماتەماتيكا، ناقتى عىلىمدار، بەينەلەۋ ونەرىنە ماشىقتانسا، بارلىق ءپاندى ءبىر مۇعالىم وقىتاتىنىمەن ەرەكشەلەنەدى. ءبىر قيىندىق تۋعىزاتىنى اعىلشىن ءتىلىن مەڭگەرۋ، ويتكەنى كورەي مەن اعىلشىن تىلدەرىنىڭ گرامماتيكاسىندا ايىرماشىلىقتار كوپ. سولاي بولا تۇرا كورەيا ءبىلىم بەرۋ جۇيەسىندە ماتەماتيكا مەن اعىلشىن پانىنە باسا دەن قويىلادى. وقۋشىلار ونى قيىنسىنباي ارنايى كۋرستارعا بارىپ، بىلىمدەرىن جەتىلدىرەدى. ءبىز جوعارىدا ايتىپ باستاعان جەكەمەنشىك مەكتەپتەر مۇندا دا بار. قوعامدىق مەكتەپتەردەن ارتىقشىلىعى، ءبىلىم بەرۋ دەڭگەيى وتە جوعارى. باعاسى دا تىم قىمبات ەمەس. ايىنا بالا باسىنا نەبارى 130 دوللاردان كەلەدى. 12-15 جاس ارالىعىنداعىلار تاربيەسى مەن تالابى وتە قاتاڭ ورتا مەكتەپتەردە وقيدى. ول جەردە كۇنىنە 6 نەگىزگى، 1 مامانداندىرىلعان ءپان وقىتىلادى. ءبىر ارتىقشىلىعى پاندەر جىل سايىن وزگەرىپ وتىرادى.

الەم حالىقتارىنىڭ اراسىندا جاپونيا ءبىلىم بەرۋ جۇيەسى ەرەكشەلەنىپ تۇرادى. مۇنداعى وقۋشىلار ءداستۇر بويىنشا ساباقتى قىركۇيەك ەمەس، ءساۋىر ايىندا باستايدى. ءساۋىر ايىن جاڭا ءومىردى باستاۋ ءۇشىن ەڭ قولايلى اي رەتىندە ءتاۋىر كورەتىن جاپوندىقتار بالالارعا دەمالىسسىز ءبىلىم بەرەدى. ياعني دەمالىس ۋاقىتىنىڭ بارلىعىن ەمتيحانعا دايىندىقپەن وتكىزەدى.

«بارلىق جەردە وقىتادى، بىراق ءبىز ناعىز سەرىلەردى تاربيەلەپ شىعارامىز» دەپ ۇرانداتاتىن ۇلىبريتانيا مەكتەپتەرىنىڭ وزىنە ءتان ءبىلىم جۇيەسى بار. ءتىپتى مۇنى وزگە ەلدەر تاجىريبەسىندە ءجيى قولدانادى. ماسەلەن بىرىككەن كورولدىككە ءتان ەرەكشەلىك – اقىلى ينتەرناتتار. بۇگىندە مۇنداي پانسيوناتتاردا اقسۇيەكتەر ۇرپاعى ءبىلىم الادى دەسەدى. 2-7 جاس ارالىعىنداعى بالالارعا «رreparatory schools» جۇيەسىمەن ءبىلىم بەرىپ، 7-13 جاستاعىلار «junior schools» جۇيەسىمەن باستاۋىش سىنىپ ءبىلىمىن الادى. ءبىر ەرەكشەلىگى باستاۋىشتى بىتىرگەن وقۋشى ەمتيحان تاپسىرا الماسا، ول ءۇشىن بولاشاق جابىق. ال «Senior School» – 13-18 جاس ارالىعىنداعى بالالار ءبىلىم الىپ، GCSE ەمتيحانىن تاپسىرۋ ارقىلى «A-Level» نەمەسە «International Baccalaureate» باعدارلاماسىنا وتەدى. ۋنيۆەرسيتەت بىتىرگەن ستۋدەنت 21 مىڭ فۋنت ايلىق الاتىن جۇمىسقا تۇرماسا، كرەديتىن تولەمەۋگە بولادى. بۇل بىزدىڭشە 10 ملن 269 مىڭ تەڭگە. اقش ءبىلىم بەرۋ جۇيەسى دە ەرەكشە. مەكتەپتەردە وقۋ ءتارتىبى ءتىل، ادەبيەت، ناقتى جانە گۋمانيتارلىق عىلىم، ت.ب. بولىپ بىرنەشە كاتەگورياعا بولىنگەن. جوعارى سىنىپ وقۋشىلارى ءار سالادان كرەديتتىك جۇيە جيناقتايدى. مۇعالىم وقۋشىنى جەكە شاقىرىپ الىپ، باعاسىن وزىنە عانا كورسەتەدى. ءار جارتى جىل سايىن اتا-اناعا بالاسىنىڭ ۇلگەرىمىن جىبەرىپ وتىرادى. ءبىزدىڭ ەلدە

 مەكتەپكە اتتاپ باسپايتىن

اتا-انالاردىڭ بار ەكەنى راس. اقجارقىن ەسىمدى كاسىپكەر ايەل: «كۇنى بويى جۇمىستامىن. بالامدى اقىلى مەكتەپكە بەردىم. تۇسكە دەيىن ساباق وقىسى، تۇستەن كەيىن مەكتەپتە قالىپ ءۇي جۇمىسىن ورىندايدى. مەكتەپ ۇجىمى ۇيدەن الىپ كەتىپ، كەشكە اكەلىپ تاستايدى. ءتىپتى تاماعىن دا وزدەرى بەرەدى. ماعان اقىلى مەكتەپتەر سونىسىمەن ءتيىمدى» دەيدى. بىرگە ءتيىمدى بولعانمەن مۇنداي مەكتەپتەر ەكىنشىگە قولجەتىمسىز. ماسەلەن  Haileybury Almaty مەكتەبىنىڭ ەسەپ ءبولىمىنىڭ ماماندارى ءبىر جىل بۇرىن باق وكىلدەرىنە بەرگەن سۇحباتىندا: «1,2-سىنىپ وقۋشىلارى ءۇشىن ءبىزدىڭ مەكتەپتە وقۋ قۇنى – 6 ملن 646 مىڭ تەڭگە. 3-4 سىنىپ وقۋشىلارى ءۇشىن وقۋ 1 ملن تەڭگەگە قىمباتتاي تۇسەدى. 7-سىنىپتان باستاپ وقۋ ودان ءارى قىمباتتايدى. سەبەبى، بۇل سىنىپتاردا قوسىمشا تەستىلەۋ جۇمىستارى، ەمتيحاندار قوسىلادى. ستاندارتتى قۇجاتتان بولەك، اتا-انالار بۇل مەكتەپتەرگە 428 مىڭ تەڭگە كەپىلدىك تولەم تولەۋگە مىندەتتەلەدى. اتا-انالار مەكتەپتەن شىققان جاعدايدا كەپىلدىك سومانى قايتارا الادى. جاڭادان كەلگەن وقۋشىعا 37 مىڭ تەڭگە تولەۋگە تۋرا كەلەدى. ءبىلىم بەرۋ جۇيەسى ورتا ءبىلىم بەرۋ باسقارماسىنان ەرەكشەلەنەدى. سەبەبى بىزدە بريتاندىق ءبىلىم بەرۋ جۇيەسى بار. بۇل اقشاعا تاماقتانۋ مەن وقۋ كىرەدى»، – دەپ اعىنان جارىلىپتى. وقۋ اقىسىنىڭ قۇنى بويىنشا ەكىنشى ورىندا – Haileybury Astana مەكتەبى. ودان كەيىن «TAMOS Education» فيزيكا ماتەماتيكا مەكتەبى. مۇندا وقۋشىلار ورتا ەسەپپەن 193 مىڭ تەڭگە اي سايىن تولەيدى. قىمبات تورتتىكتى «ميراس» حالىقارالىق مەكتەبى اياقتايدى. مەكتەپتىڭ رەسمي سايتىندا كورسەتىلگەندەي، وقۋ قۇنى جىلىنا 1,5 ملن تەڭگەدەن 5 ملن تەڭگەگە دەيىن. كەڭسە قۇرالدارىن، اياق كيىم، سپورت فورماسىن قوسپاعاندا، مەكتەپ فورماسىنىڭ ءوزى 43 مىڭ تەڭگەگە اينالادى. ەگەر اتالعان مەكتەپتە ءبىر وتباسىنىڭ 2 بالاسى وقىپ جاتقان بولسا، ەكىنشىسىنە – 5 پايىز، ءۇشىنشى بالاعا 10 پايىز جەڭىلدىك بولادى ەكەن.

P.S: اتا-انا اقىلى مەكتەپكە جۇگىرمەۋى ءۇشىن مەملەكەتتىك ءبىلىم وشاقتارىنداعى ءبىلىم ساپاسى، تەحنيكالىق مۇمكىنشىلىگى جاقسى بولۋ كەرەك. ءبىلىم بەرۋشى ۇستازدار ايلىعى جارىماي ءبىلىم دەڭگەيىن كوتەرۋ دە تىم كۇردەلى شارۋا. قالالىق جەردە ءبىلىم بەرەتىن 2-3 جىلدىق تاجىريبەسى بار مۇعالىمنىڭ ورتاشا ەڭبەك اقىسى وسى ايدان باستاپ 55 مىڭ 480 تەڭگەدەن 66 مىڭ 382 تەڭگەگە دەيىن كوتەرىلدى. ال ۇلگى ەتكەن ۇلىبريتانيا ۇستازدارىنا اي سايىن ورتا ەسەپپەن 2 مىڭ 314 اقش دوللارى كولەمىندە جالاقى تولەيدى ەكەن.

ارمان قۇدايبەرگەن

سوڭعى جاڭالىقتار