4 ماۋسىم, 12:49 445 0 جاڭالىقتار TURKYSTAN.KZ

اكىم باسپانالى بولعان انالارعا بازارلىق الىپ باردى

ەلىمىزدە كوپ بالالى وتباسىلارعا جاعداي جاساۋ – مەملەكەتتىڭ باستى نازارىندا. اقتوبەدە تۇرعىن ءۇي قۇرىلىسىن جۇزەگە اسىرۋ جۇمىستارى اياسىندا تۇرعىنداردىڭ ساناتتىلىعىنا ساي باسپانامەن قامتۋ شارالارى جۇيەلەنگەن. بولاشاقتا ساتىپ الۋ قۇقىعىمەن جالدامالى پاتەرگە يە بولۋ ماقساتىندا 90 پاتەر بەرۋ كوزدەلسە، قازىرگى كۇنى ونىڭ 25-ءى ءوز يەلەرىن تاپتى، قالعاندارىنا كەلىسىم-شارت جاسالۋ ۇستىندە.

باسپانا باقىتىنا يە بولعانداردىڭ قاتارىندا اقتوبەلىك كوپ بالالى انا زامزاگۇل جۋلامانوۆا دا بار. جەرگىلىكتى اتقارۋشى ورگاننىڭ قوعامدىق قابىلداۋىندا بولعان ول قالا اكىمدىگىنىڭ قولداۋىمەن «قولعانات» قوعامدىق قورى ارقىلى «تۇرعىن ءۇي قۇرىلىس جيناق بانكى» اق-نا سالىمشى رەتىندە العاشقى جارنا – 350 مىڭ تەڭگە تولەدى. 6 اي مەرزىمدە پاتەر قۇنىنىڭ ون پايىزىن جيناپ، ەندى «باقىتتى وتباسى» مەملەكەتتىك باعدارلاماسى ارقىلى 2 پايىزبەن پاتەر اقىسىن وتەيتىن بولادى. ەكى بولمەلى پاتەردىڭ قۇنى – 7 ملن. 200 مىڭ تەڭگە.

قۋانىشقا كەنەلگەن كوپ بالالى وتباسىن اقتوبە قالاسىنىڭ اكىمى ءىلياس يسپانوۆتىڭ ءوزى قۇتتىقتاپ باردى. ءۇي يەسى قالا باسشىسىنا، «قولعانات» قوعامدىق قورىنا ريزاشىلىعىن ءبىلدىردى.

ءۇش بالالى جالعىز باستى انا سامال سەرىكباەۆا دا جاڭادان العان باسپاناسىندا ەندى ىسمەرلىكپەن اينالىسىپ، تابىس تابۋدى كوزدەيدى. ال، 46 شارشى مەترلىك ءبىر بولمەلى پاتەرگە يە بولعان مۇمكىندىگى شەكتەۋلى ءاليا ساعىندىقوۆا جالدامالى پاتەر ءۇشىن قىرىق مىڭ تولەپ كەلگەندىگىن، ەندى سول قاراجاتتى ءوزىنىڭ باسپاناسىنا تولەۋگە مۇمكىندىك بەرگەنى ءۇشىن اقتوبە اكىمىنە العىسىن جاۋدىردى.

ءى.يسپانوۆ قۇتتىقتاپ بارعان جاڭا پاتەر يەسى – ارايلىم مامەكوۆا – اسىراۋشىسى جوق كوپ بالالى انا. جالپى قۇنى 5 ملن. تەڭگە تۇراتىن پاتەرگە ەندى اي سايىن وتىز مىڭنان تولەيتىن بولادى.

قونىس تويىن تويلاعان ءۇي يەلەرىنە قالا باسشىسى جەمىس پەن ءتاتتى تولى سەبەتتەر سىيلاپ، بالالارىنىڭ ءتول مەرەكەسىمەن، تۋعان كۇندەرىمەن قۇتتىقتادى.

«ارەكەت ەتكەنگە بەرەكەت كەلەدى» دەگەن بابالارىمىز. كەرەكتى قۇجاتىن جيناپ، ءتيىستى مەكەمەگە تاپسىرعان جاۋاپكەرشىلىگى مول ادامدى مەملەكەت تە اركەز قولداۋعا دايىن. وسىنداي قۋانىشقا كەنەلەتىندەردىڭ قاتارى جىل سوڭىنا دەيىن ەسەلەنە تۇسەدى. ويتكەنى، ەل تۇرعىندارىن، مۇقتاج ازاماتتاردى

باسپانامەن قامتۋ شارالارى قارقىندى جۇرگىزىلۋدە. مۇنى مەملەكەتتىڭ قامقورلىعى دەپ بىلگەنىمىز ءجون»، - دەدى ءى.يسپانوۆ.

اسحات رايقۇل

سوڭعى جاڭالىقتار