3 ماۋسىم 2019, 13:52 642 0 ىشكى ساياسات دينارا مىڭجاسارقىزى

شىعىس قازاقستاندا العاش بولىپ تەحنوتۋريزم قولعا الىنادى

شىعىس قازاقستاندا تەحنوتۋريزم سالاسىن دامىتۋ ماقساتىندا ەلىمىزدەگى العاشقى جوبا ازىرلەنىپ جاتىر، دەپ حابارلايدى قازاقپارات ءتىلشىسى. «تەحنوتۋريزم - قازىر الەمدە جوعارى سۇرانىسقا يە ءتۋريزمنىڭ ءبىر سالاسى. ال قازاقستاندا ءتۋريزمنىڭ بۇل سالاسى سونشالىقتى تانىمال ەمەس. وسى تۇرعىدا ءبىز العاش بولىپ قالعا الۋدى ءجون كوردىك.

تەحنوتۋريزم - بەلگىلى ءبىر وقيعا ورىن العان جەر، ول مۇمكىن جەر سىلكىنىسى، يادرولىق جارىلىس نەمەسە ەكولوگيالىق اپات ورىن العان ايماق بولۋى مۇمكىن. مىسال كەلتىرسەك، ۋكرايناداعى چەرنوبىلعا جىلىنا ميلليونداعان تۋريس بارادى. اتالعان تۋريزم سالاسىن قولعا الۋدىڭ نەگىزگى ەكى سەبەبى بار. ول الدىمەن، تاريحپەن تانىسۋ، ياعني وتكەندى ۇمىتپاۋ. ەكىنشىدەن، وتاندىق جانە شەتەلدىك تۋريستەردى تارتۋدىڭ ءبىر امالى»، - دەدى شقو تۋريزم باسقارماسى باسشىسىنىڭ مىندەتىن اتقارۋشى ينارا بويدۋكوۆا. ونىڭ ايتۋىنشا، بۇگىندە وبلىستىق تۋريزم باسقارماسى تەحنوتۋريزمدى جۇزەگە اسىرۋدىڭ جوباسىن ازىرلەۋ ۇستىندە. «جوبا ازىرلەنگەن سوڭ، ونى بەكىتۋگە جىبەرەمىز. قابىلدانعان جاعدايدا جاقىن جىلدارى ىسكە اسىرۋدى باستايمىز. مۇنى ءتۋريزمنىڭ تابىس اكەلەتىن سالاسى دەپ ايتۋعا بولادى. ويتكەنى، ءبىز بەلگىلى ءبىر نىسانعا ەكسكۋرسيا ۇيىمداستىرىپ قانا قويماي، ءار ءتۋريستى قاۋىپسىزدىك جانە مەديتسينالىق تۇرعىدان ساقتاندىرۋمەن قامتاماسىز ەتەمىز. ودان بولەك، اتالعان نىسانعا بارۋعا رۇقسات بەرەتىن ءتيىستى قۇجاتتار بولۋى ءتيىس. ال ول ءوز كەزەگىندە ءبىراز ۋاقىت پەن قاراجاتتى تالاپ ەتەدى. ءبىزدىڭ ايماقتاعى تەحنوتۋريزم ءۇشىن باستى نىسان بولىپ تابىلاتىن ول -  سەمەي پوليگونى. قازىردىڭ وزىندە پوليگونعا وتاندىق جانە شەتەلدىك تۋريستەردەن سۇرانىس بار. وعان دالەل، بۇعان دەيىن جەكە تۋريستىك اگەنتتىكتەر ارقىلى سەمەي پوليگونىنا بارعان تۋريستەر بار»، - دەدى ول. ي.بويدۋكوۆانىڭ مالىمەتىنشە، اتالعان جوبانى ەلىمىز بويىنشا شىعىس قازاقستان العاش قولعا الىپ وتىر جانە ول كوپجىلدىق  جوسپاردان تۇرادى.  ايتا كەتسەك، «Kazakh Tourism» ۇلتتىق كومپانياسىنىڭ مۇرىندىق بولۋىمەن ەلىمىزدە ونكۇندىك اقپاراتتىق تۋر ءوتتى. ماقساتى - ىشكى ءتۋريزمنىڭ پوتەنتسيالىن ارتتىرۋ جانە دارىپتەۋ. وعان ەلىمىزدىڭ باتىس وڭىرلەرىنەن، اتاپ ايتقاندا، اتىراۋ، اقتوبە، بقو جانە ماڭعىستاۋ وبلىستارىنداعى تۋريستىك اگەنتتىك وكىلدەرى قاتىستى. ولار نۇر-سۇلتان، الماتى، شىمكەنت قالالارى مەن الماتى، تۇركىستان، شىعىس قازاقستان جانە اقمولا وبلىستارىنىڭ تۋريستىك نىساندارى مەن ساۋىقتىرۋ كەشەندەرىنىڭ جۇمىسىمەن تانىسا وتىرىپ ءوزارا تاجىريبە الماستى.

سوڭعى جاڭالىقتار