31 مامىر, 11:05 346 0 ىشكى ساياسات TURKYSTAN.KZ

ەكونوميكا ءمينيسترى وتستاۆكاعا كەتە مە؟

ۇلتتىق ەكونوميكا مينيسترلىگىنىڭ دەپارتامەنت باسشىسى الاياقتىق جاساعانى ءۇشىن 3 جىلعا سوتتالعان بولاتىن.

ۇلتتىق ەكونوميكا ءمينيسترى رۋسلان دالەنوۆ قول استىنداعى قىزمەتكەرى اسلانبەك جاقىپوۆقا قاتىستى سوت ۇكىمى كۇشىنە ەنگەننەن كەيىن وتستاۆكاعا كەتۋگە دايىن ەكەنىن ايتتى

"سوت ۇكىمى كۇشىنە ەنگەندە، وتستاۆكاعا كەتۋگە ءوتىنىش بەرەمىن. بۇل دۇرىس پراكتيكا. بۇل ءبىرىنشى باسشىنىڭ مورالدىق جاۋاپكەرشىلىگى. ونىڭ كىناسى قانشالىقتى ەكەنىن جوعارى تۇرعان باسشىلىق انىقتايدى", - دەدى دالەنوۆ سەنات كۋلۋارىندا.

بۇعان دەيىن قازاقستان پرەزيدەنتى قاسىم-جومارت توقاەۆ قاراماعىنداعى قىزمەتكەرلەرى جەمقورلىق جاساسا، باسشىلار وتستاۆكاعا كەتۋى كەرەك ەكەنىن مالىمدەگەن ەدى.

ايتا كەتسەك، ۇلتتىق ەكونوميكا مينيسترلىگى كاسىپكەرلىكتى دامىتۋ دەپارتامەنتىنىڭ ديرەكتورى اسلانبەك جاقىپوۆقا بيىل ءساۋىر ايىندا 500 مىڭ تەڭگە پارا الدى دەگەن ايىپ تاعىلدى.

كەيىنىرەك سىبايلاس جەمقورلىققا قارسى ءىس-قيمىل ۇلتتىق بيۋروسى حابارلاعانداي، ۇلتتىق ەكونوميكا مينيسترلىگىنىڭ بىرقاتار لاۋازىمدى تۇلعاسىنا قاتىستى سوتقا دەيىنگى تەرگەۋ باستالعان. جاقىپوۆتىڭ ءىسى الاياقتىق بابىمەن الماستىرىلدى. 29 مامىر كۇنى ەسىل اۋداندىق سوتى شەنەۋنىكتى كىنالى دەپ تانىپ، ءۇش جىلعا باس بوستاندىعىنان ايىرعان بولاتىن.

 

سوڭعى جاڭالىقتار