30 مامىر 2019, 18:23 627 0 قوعام دينارا مىڭجاسارقىزى

نازارباەۆقا "قۇرمەتتى سەناتور" اتاعى بەرىلدى

30 مامىردا وتكەن قازاقستان سەناتىنىڭ وتىرىسىندا ەلدى 30 جىلداي باسقارىپ، بيىل ناۋرىزدا وتستاۆكاعا كەتكەن نۇرسۇلتان نازارباەۆقا "قۇرمەتتى سەناتور" مارتەبەسىن بەرۋ ماسەلەسى تالقىعا سالىندى. دەپۋتاتتار ۇسىنىستى ءبىراۋىزدان قولداپ داۋىس بەرىپ، پارلامەنت ەكس-پرەزيدەنتكە مارتەبە بەرۋدى قاۋلى ەتتى.

نازارباەۆ پرەزيدەنتتىكتەن كەتكەن سوڭ سەنات توراعاسى بولىپ، ەلدى باسقارۋ جۇيەسىندەگى ءۇشىنشى ادامعا اينالعان، ەكس-پرەزيدەنتتىڭ ۇلكەن قىزى داريعا نازارباەۆا "نازارباەۆ ارا-تۇرا سەناتقا كەلىپ تۇرادى دەپ ۇمىتتەنەمىز" دەدى.

دەپۋتاتتار بۇرىنعى پرەزيدەنتكە اتاق بەرۋدى قولداي سويلەدى. سەنات دەپۋتاتى ءالي بەكتاەۆ "نازارباەۆقا "قۇرمەتتى سەناتور" اتاعىن بەرۋدەن سەناتتىڭ مارتەبەسى وسەدى" دەدى.

نازارباەۆقا "قۇرمەتتى سەناتور" اتاعىن بەرۋدى بيىل ناۋرىزدا انت بەرىپ، قازاقستان پرەزيدەنتى قىزمەتىنە كىرىسكەن قاسىم-جومارت توقاەۆ ۇسىنعان. 27 مامىردا سەنات بيۋروسىنىڭ مۇشەلەرى ۇسىنىستى تۇگەل قولداعان.

نۇرسۇلتان نازارباەۆ 19 ناۋرىزدا مەرزىمىنەن بۇرىن وتستاۆكاعا كەتەتىنىن مالىمدەگەن ەدى. 3 ساۋىردە ول ءتيىستى كونستيتۋتسيالىق زاڭمەن رەتتەلەتىن "تۇڭعىش پرەزيدەنت – ەلباسى مىندەتىنە كىرىسكەنىن" حابارلادى. بيلىك بۇرىن سەنات سپيكەرى بولعان قاسىم-جومارت توقاەۆقا كوشتى.

جاڭا اكىمشىلىكتىڭ ءبىرىنشى جيىنىندا نازارباەۆ قاۋىپسىزدىك كەڭەسىنىڭ، قازاقستان حالىقتارى اسسامبلەياسىنىڭ توراعاسى ەكەنىن ەسكە سالدى جانە "نۇر وتان" پارتياسىن باسقارا بەرەتىنىن ايتتى. وعان قوسا، نازارباەۆ – كونستيتۋتسيالىق كەڭەستىڭ مۇشەسى.

نازارباەۆ بيلىكتە بولعان جىلدارى ونى "قىزمەتىن اسىرا پايدالاندى", "وكىلەتىن دەموكراتياعا قايشى جولدارمەن ۇزارتتى", "بيلىككە نارازىلاردى قۋدالادى" دەپ بىرنەشە رەت ايىپتاعان. "شەكاراسىز تىلشىلەر" حالىقارالىق ۇيىمى نازارباەۆتى اقپارات ەركىندىگىن تۇنشىقتىرىپ وتىرعان "جىرتقىشتار" تىزىمىنە قوسقان. قازاقستان بيلىگى بۇل ايىپتاۋلاردىڭ ءبارىن جوققا شىعارادى.

سوڭعى جاڭالىقتار