30 مامىر, 11:05 180 0 بىلگەنگە مارجان "تۇركىستان" گازەتىنىڭ اۆتورلارى

كوكپار تارتىپ، تەڭگە ءىلىپ، جامبى اتقان

ەلىمىزدىڭ تۇكپىر-تۇكپىرىندەگى سايگۇلىككە جانى قۇمار جاندار ءبىر اپتا بويى تاراز شاھارىنىڭ ىرگەسىندەگى بەكتوبەدە ورىن تەپكەن اتشابارعا اعىلدى. ولار ات ۇستىندە ارباسقان الىپتاردىڭ بەلدەسۋىن، تاقىمداعى سەركەنى جۇلا تارتقان كوكپارشىلاردىڭ تارتىستى ويىنىن، قۇرالايدى كوزگە اتقان مەرگەندەردىڭ جامبى اتۋ جارىسىن، تەڭگە ىلۋدە ەپتىلىك تانىتقان جامپوزداردىڭ جانكەشتىلىگىن كوزدەرىمەن كورىپ، قيقۋلاپ وتىردى. سپورتتىڭ ءتورت تۇرىنەن وتكەن ەل بىرىنشىلىگىندە 15 ءوڭىردىڭ قۇرامالارى باق سىنادى.

اۋدارىسپاقتان وتكەن جارىستا 5 سالماق دارەجەسى بويىنشا 60 بالۋان سىنعا ءتۇستى. 80 كيلوگرامم سالماق دارەجەسىندە جارىسقا قاتىسقان سوم بىلەكتى جامبىلدىق سايىپقىران نۇرجىگىت امزەەۆ ءوزىنىڭ ناعىز بابىندا ەكەنىن كورسەتىپ التىننان القا تاقسا، الىپتار باسەكەسىندە دوداعا ارالاسقان دانيار سمايىلوۆ ەكىنشى ورىندى قاناعات تۇتتى. 60 كيلوگرامم سالماق دارەجەسىندە تۇركىستان وبلىسىنان كەلگەن ەرمەك قۇرالباي قارسىلاس شىداتپاسا، 70 كيلوگرامم سالماقتا اقتوبەلىك شىڭعىسحان ەرجانوۆ جەڭىستىڭ ەڭ بيىك تۇعىرىنان كورىندى. 90 كيلوگرامم سالماق دارەجەسىندە شىعىس قازاقستان وبلىسىنىڭ ءۇمىتى مانسۇر تاميكەنوۆ توپ جاردى، ال +90 كيلوگرامم سالماق دارەجەسىندە تۇركىستان وبلىسىنان كەلگەن ءبىرجان قوساليەۆ جەڭىمپاز اتاندى.

تەڭگە ىلۋدەن جارىسقا ەلىمىزدىڭ ءار قيىرىنان كەلگەن 20 سپورتشى قاتىسىپ، جۇلدەلى ورىنداردى ساراپقا سالدى. ناتيجەسىندە تۇركىستان وبلىسىنىڭ مىقتىسى راحات قامباروۆ 4 ۇپاي يەلەنىپ ءبىرىنشى ورىنعا تابان تىرەسە، ۇپايى تەڭ بولسا دا، جىلدامدىق جاعىنان الدا بولعان تۇركىستاندىق تاعى ءبىر قاتىسۋشى نۇرباعلان سادۋاقاس كۇمىس جۇلدەگە، جامبىلدىق ايدىن ءاشىمجان ءۇشىنشى ورىنعا لايىق دەپ تانىلدى.

جامبى اتۋدان وتكەن دودا دا تارتىسقا تولى بولدى. مۇندا 22 سپورتشى سىنعا ءتۇسىپ، جىلدامدىقپەن قاتار مەرگەندىكتەرىن كورسەتتى. قۇرالايدى كوزگە اتقان مەرگەندەر الامانىندا 29 ۇپايعا قول جەتكىزگەن قىزىلوردالىق عالىمجان ءومىرتاي جەڭىمپاز اتانسا، اۋليەاتالىق ابزال تۇلىبەكوۆ كەزەكتى مارتە كۇمىس جۇلدەنى موينىنا ءىلدى. قولا مەدال تۇركىستاندىق ەرالحان ايكوزدىڭ ەنشىسىندە كەتتى.

جامبى اتۋ دوداسىندا ءۇش بىردەي ارۋىمىزدىڭ باق سىناعانىن ايتا كەتكەن ءلازىم. ارينە، ولار جۇلدەگە ىلىككەن جوق. الايدا تاجىريبەسىن تولىستىرا جاتسا، بولاشاقتا ۇزدىكتەر قاتارىنان كورىنەتىن مۇمكىندىكتەرى بار ەكەنى انىق.

كوكپار دەسە كەز كەلگەن قازاقتىڭ قانى قىزىپ، دەلەبەسى قوزاتىنى جاسىرىن ەمەس. بۇعان دەيىن وتكەن 18 چەمپيوناتتا 9 مارتە توپ جارعان «اۋليەاتا» كوكپارشىلار كومانداسى قاتارىنان وزا شاۋىپ، وسى جولى ونىنشى رەت چەمپيون اتانادى دەگەن جانكۇيەرلەر سەنىمى اقتالدى.

جارىس قورىتىندىسى بويىنشا توپ جارعان كومانداعا 1 ميلليون تەڭگەنىڭ سەرتيفيكاتى تاپسىرىلسا، ەكىنشى ورىن العان «قۇلاگەر» كومانداسىنا 700 مىڭنىڭ، ءۇشىنشى ورىن يەلەنگەن «نارىن» كومانداسىنا 400 مىڭنىڭ سەرتيفيكاتى بەرىلدى.

ەرەسەكتەر اراسىنداعى ەل چەمپيوناتىن ەلىمىزدىڭ ۇلتتىق سپورت قاۋىمداستىعى، مادەنيەت جانە سپورت مينيسترلىگى جانە جامبىل وبلىسى اكىمدىگى بىرلەسە جۇزەگە اسىردى.

 

اسحات رايقۇل

سوڭعى جاڭالىقتار