30 مامىر, 10:54 399 0 قوعام "تۇركىستان" گازەتىنىڭ اۆتورلارى

2019 جىلى – 1825 پاتەر

«نۇرلى جەر» باعدارلاماسى 2016 جىلدان باستاپ ىسكە قوسىلدى. وعان مەملەكەتتىك بيۋدجەتتەن 4 ميلليارد 600 ميلليون تەڭگە بولىنگەن.  ەلوردادا «نۇرلى جەر» اياسىندا ساتىلاتىن جانە كەلەر جىلى قۇرىلىسى اياقتالاتىن باسپانالاردىڭ سانى ارتقان. 

ورتالىق فيليالدىڭ ديرەكتورى جانسۇلتان ماتاەۆ نۇر-سۇلتاندا بيىل قولدانىسقا بەرىلەتىن ءۇيدىڭ باعاسى قولجەتىمدى ەكەنىن ايتتى. «قازىرگى تاڭدا بانك 364 پاتەردى پايدالانۋعا بەرۋگە دايىن. ونىڭ ىشىندە 1 بولمەلى – 75, 2 بولمەلى – 168, 3 بولمەلى – 121 پاتەر قولدانىسقا بەرىلەدى. پاتەردىڭ 1 شارشى مەترىنىڭ قۇنى – 180 مىڭ تەڭگە. بۇل باعا باس قالاداعى باسپانانىڭ ورتاشا نارىقتىق باعادان ەكى ەسە تومەن. تۇرعىن ءۇيدىڭ ءبىرىنشى قاباتىندا بالالاردى دامىتۋ ورتالىعى، ساۋدا جانە تاماقتانۋ ورىندارى ورنالاسقان. پاتەر ساتىپ الۋ ءۇشىن تۇر-عىنۇيقۇرىلىسجيناق بانكىنىڭ كليەنتى بولىپ، دەپوزيتكە ءۇي باعاسىنىڭ 20 پايىز العاشقى جارنانى جيناۋ نەمەسە اۋدارۋ قاجەت. زايمنىڭ جىلدىق مولشەرلەمەسى – 5 پايىز. باسپانا الۋعا ءوتىنىش بەرگەندەردىڭ 50 پايىزى – بانك سالىمشىلارى، قالعان 50 پايىزى – قالالىق اكىمدىكتە تۇرعىن ءۇي كەزەگىندە تۇرعان ازاماتتار. قازىرگى ەسەپ بويىنشا تۇرعىنۇي قۇرىلىسجيناق بانكىندەگى جيناق شوتتارىنىڭ ورتاشا تولتىرۋ سوماسى – 106 مىڭ تەڭگە. تۇرعىندارعا بەرىلگەن زايمداردىڭ ورتاشا سوماسى – 10 ميلليون تەڭگە. بيىل جىل باسىنان بەرى ەلىمىزدە تۇرعىن ءۇي قۇرىلىس جيناق جۇيەسىمەن 26 مىڭ ازامات باسپانالى بولدى. ونىڭ 19450-ءى پاتەردى كوممەرتسيالىق نارىقتان ساتىپ السا، 7 مىڭعا جۋىعى «نۇرلى جەر» اياسىندا نەسيە راسىمدەگەن. قازىر حالىق باسپاناعا قاراجات جيناپ ۇيرەندى. بىزگە قاراجاتىن ۇنەمدەپ، باسپاناعا جۋىق ارادا قول جەتكىزۋدى ماقسات ەتكەن ازاماتتار كەلەدى. باسپاناعا قاراجات جيناۋعا تابىستىڭ از-كوپتىگى ىقپال ەتپەيدى. ءبىزدىڭ سالىمشىلاردىڭ 40 پايىزىنىڭ جالاقىسى 150 مىڭ تەڭگەدەن تومەن» دەدى جانسۇلتان ماتاەۆ. 2019 جىلى نۇر-سۇلتاندا اتالعان مەملەكەتتىك باعدارلاما اياسىندا تاعى 1825 پاتەردى ساتۋ جوسپارلانىپ وتىر.

نۇر-سۇلتان قالاسى اكىمىنىڭ ورىنباسارى نۇرلان نۇركەنوۆ: «نۇر-سۇلتاندا كوممۋنالدىق تۇرعىنۇي قورىندا باسپانا كەزەگىندە 45 مىڭنان استام ادام تۇر. سونىڭ 20 مىڭنان استامى – ءتۇرلى الەۋمەتتىك از قامتىلعان توپتار»، –  دەدى ول.

ونىڭ ايتۋىنشا، ەلوردادا تۇرعىن ۇيمەن قامتاماسىز ەتۋ بويىنشا جالعا بەرىلەتىن جانە كرەديتتىك تۇرعىن ءۇي باعىتتارى بار. ماسەلەن، جالعا بەرىلەتىن تۇرعىن ءۇي بويىنشا وتكەن 2018 جىلى 180 پاتەر پايدالانۋعا بەرىلسە، 2019 جىلى  700-دەن استام پاتەر ءوز يەسىن تابادى. كرەديتتىك تۇرعىن ءۇي باعىتى بويىنشا 2018 جىلى 481 پاتەر ۇلەستىرىلگەن بولسا،  2019  جىلى 900-دەن استام پاتەر پايدالانۋعا بەرىلمەك.

«دەمەك بيىل 1600-دەن استام وتباسى باسپانالى بولادى.  ەگەر وسى قارقىنمەن كەزەك جىلجىسا، بۇگىنگى كۇنى كەزەكتە تۇرعان 45 مىڭىنشى تۇرعىن كەمى 25 جىلدان كەيىن باسپانالى بولادى. تۇرعىن ءۇي كەزەگىندەگىلەردىڭ ءتىزىمى 45 مىڭمەن توقتامايتىنىن تاعى قوسىڭىز. وسىلايشا استانالىقتاردىڭ باسپانا ماسەلەسىن بيۋدجەت قارجىسىنا، كوممۋنالدىق تۇرعىن ءۇي قورىنىڭ ەسەبىنەن شەشۋ مۇمكىن ەمەس دەپ كەسىپ ايتۋعا بولادى»، – دەدى نۇركەنوۆ.

ەندى نە ىستەمەك كەرەك؟! ماسەلەنى شەشۋدىڭ قانداي جولدارى بار، –  دەگەن ازاماتتار ساۋالىنا: «اكىمدىك كوپتىڭ كوكەيىندە جۇرگەن باسپانا ماسەلەسىن شەشۋ مەحانيزمدەرىن قاراستىرىپ جاتىر. سونىڭ ىشىندە كەزەكتە تۇرعان تۇرعىنداردىڭ الەۋمەتتىك وسال توپتارىنا بەلگىلى ۋاقىتتان كەيىن ساتىپ الۋ قۇقىعىمەن پاتەرلەردى جالعا بەرۋ مۇمكىندىگى ۇسىنىلاتىن بولادى. وسى ارقىلى وتباسى تاپقان اقشاسىن پاتەر يەسىنىڭ قالتاسىنا ەمەس، ءوز مەنشىگىنە وتەتىن باسپانا ءۇشىن قۇيۋعا مۇمكىندىك الادى»، –  دەدى نۇر-سۇلتان اكىمىنىڭ ورىنباسارى.

بۇعان قوسا، اكىمدىك تۇرعىن ءۇي سەرتيفيكاتتارىنىڭ سانىن 100-دەن 2 مىڭعا ۇلعايتقانىن تاعى ءبىر قايتالاپ ءوتتى. تۇرعىن ءۇي سەرتيفيكاتتارى اتالعان توپتارعا تۇرعىن ءۇي الۋ ءۇشىن 1 ملن تەڭگە كولەمىندە العاشقى سۋبسيديالىق جارنا رەتىندە بولىنەدى. سەرتيفيكات نەسيەگە باسپانا الۋ ءۇشىن الدىن الا تولەم قارجىسى رەتىندە قايتارىمسىز نەگىزدە بەرىلەدى.

2018 جىلى مەديتسينا قىزمەتكەرلەرىنە، مۇعالىمدەر پەن پوليتسەيلەرگە «7-20-25» باعدارلاماسى بويىنشا 1 ملن تەڭگەلىك 100 تۇرعىن ءۇي سەرتيفيكاتى ۇلەستىرىلگەن بولاتىن.

 

توعجان  تولەگەن

سوڭعى جاڭالىقتار