24 مامىر, 12:47 248 0 بىلگەنگە مارجان "تۇركىستان" گازەتىنىڭ اۆتورلارى

سايلاۋدان سوڭ Tele2 قازاقستاننان كەتەدى

Tele2 AB توبى بىرلەسكەن كاسىپورىنداعى ءوز ۇلەسىنىڭ باعاسى جونىندە "قازاقتەلەكوممەن" كەلىستى. قازىرگى ءپاسسيۆتى مىندەتتەمەلەرىن ساناماعاندا Tele2-ءنىڭ تازا تابىسى 169 ملن دوللاردى قۇرايتىن بولادى. سونىمەن قاتار، Tele2 اكتسيونەرىنىڭ 80 ملرد تەڭگەلىك نەسيەسى تولىق وتەلەدى.Tele2-ءنى ساتۋ ماۋسىمنىڭ سوڭىندا اياقتالادى.

– Tele2 قازاقستاندا ءساتتى بيزنەس قۇردى. بىرلەسكەن كاسىپورىن كليەنتتەر بازاسىن ايتارلىقتاي ۇلعايتىپ، تابىسىن، نارىقتاعى ۇلەسىن كەڭەيتتى. Tele2 قازاقستانعا كىرگەن كەزدەن بەرى ءبىر كليەنتكە شاققانداعى ءموبيلدى ينتەرنەتتى تۇتىنۋ ءجۇز ەسەدەن استامعا ءوستى. مەن قازاقستاندا قالدىرعان مول مۇرامىزدى ماقتان ەتەمىن، – دەدى Tele2 پرەزيدەنتى مەن باس اتقارۋشى ديرەكتورى اندەرس نيلسسون.

Tele2 AB توبى مەن "قازاقتەلەكوم" ءموبيلدى بايلانىس سالاسىنداعى بيزنەستەرىن بىرىكتىرۋ تۋرالى 2015 جىلدىڭ قاراشاسىندا كەلىسكەن بولاتىن. شۆەتسيالىق وپەراتوردىڭ 3 جىلدان كەيىن اكتسياداعى ءوز ۇلەسىن ساتۋ قۇقىعى بولعان، 2018 جىلدىڭ سوڭىندا كومپانيا سول قۇقىعىن پايدالاناتىن بولىپ شەشتى.

قازاقستاننان Tele2 كەتكەننەن كەيىن "قازاقتەلەكوم" ەلدەگى 4 وپەراتوردىڭ ۇشەۋىن باقىلايتىن بولادى.

ەندى ەلىمىزدەگى ءموبيلدى بايلانىس نارىعىندا تەك Beeline عانا تاۋەلسىز ويىنشى بولىپ قالادى.

رىسبەك اراپحانۇلى

سوڭعى جاڭالىقتار