23 مامىر, 17:08 497 0 ايماق "تۇركىستان" گازەتىنىڭ اۆتورلارى

اقتوبە قالاسىنىڭ اكىمى كوپ بالالى انالارمەن كەزدەستى

 

اقتوبە قالاسىندا عانا ەمەس، ەلىمىزدىڭ بارلىق وڭىرىندە باسپاناعا ءزارۋ كوپ بالالى انالار از ەمەس. ولاردىڭ باسىم بولىگى جالدامالى پاتەرلەردە تۇرىپ، ازەر كۇندەرىن كورىپ ءجۇر. انالاردىڭ مۇڭ-مۇقتاجىن تىڭداۋ ءۇشىن اقتوبە قالاسىنىڭ اكىمى ءىلياس يسپانوۆ پاتەر الا الماي جۇرگەن جاندارمەن كەزدەسۋ وتكىزدى.

باسپانا ماسەلەسىن داۋلاپ كەلگەن كوپ بالالى انالاردىڭ الدىندا قالا باسشىسى سالاداعى پروبلەمالاردى بارىنشا ءتۇسىندىرىپ، جان-جاقتى ماعلۇمات بەردى. جينالعانداردى كەز كەلگەن ۇساق-تۇيەككە شۋ كوتەرە بەرمەي، ناقتى ماسەلەمەن ءۇن قاتىۋعا جانە ۋاقىتشا قيىندىقتارعا سابىرلى بولۋعا شاقىردى.

«ەڭ باستىسى، تۇرعىن ءۇي كەزەگىندە تۇرعان 24 مىڭ باسپاناعا مۇقتاج وتباسىنىڭ ءوتىنىشى جىل اياعىنا دەيىن قارالاتىن بولادى. ولاردى قولجەتىمدى باسپانامەن قامتۋعا بارلىق مۇمكىندىكتەر جاسالاتىنىنا سەندىرگىم كەلەدى. بۇل باعىتتا قالادا قىرۋار شارۋالار قولعا الىنۋدا»، - دەگەن ءىليا يسپانوۆ كەزەكتە تۇرعانداردىڭ اراسىندا قاي ساناتتاعى وتباسىلاردىڭ تەز ارادا پاتەر الا الاتىنىن ءتۇسىندىردى.

پاتەر ماسەلەسىن داۋلاپ كەلگەندەردىڭ اراسىندا 2009 جىلدان بەرى جالدامالى باسپانادا تۇراتىن امانگۇل سىرىمبەتوۆا دا بار. ءۇش بالا تاربيەلەپ وتىرعان جالعىزباستى انا تاپقان-تايانعانى پاتەراقى تولەۋدەن اسپايتىنىن، بالالارىنىڭ قاجەتتىكتەرىنە قاراجات جەتىسپەيتىنىن ايتتى. «بازاردا ساۋدامەن اينالىسىپ كۇن كورىپ جۇرگەن ماعان اكىمدىك ەڭ بولماسا اي سايىن ءوزىم ارەنداسىن تولەپ وتىرعان شاڭىراقتى ساتىپ اپەرسە»، - دەيدى ول.

ايتا كەتەيىك، باسپانالى بولۋ ءۇشىن كورسەتىلگەن تالاپتارعا ساي ءۇي كەزەگىندە تۇرعانداردىڭ تۇرعىن ءۇي قۇرىلىس جيناق بانكىندە 6 اي بويى جيناعان قارجىسى بولۋى شارت. ال باسقا بانكتەردەگى نەسيە قارىزىن ۋاقىتىندا تولەي الماعان جاعدايدا ولارعا قولجەتىمدى باسپانا بەرىلمەيدى. باعدارلامانىڭ ساناتتىق دەڭگەيى كوپ بالالى انالار مەن تولىق ەمەس وتباسىلارعا ارنالعان.

 

اسحات رايقۇل

سوڭعى جاڭالىقتار