23 مامىر, 16:20 297 0 ءبىلىم دينارا مىڭجاسارقىزى

جاستار جاتاقحاناسى

 

«ەلباسىنىڭ «بەس الەۋمەتتىك باستاماسى» – اۋقىمدى باعدارلاما. سوندىقتان ءاربىر باستامانى ساپالى جۇزەگە اسىرۋ مىندەت. مۇنىڭ ارتىندا حالىق بار.

بۇل تۇرعىدا جالاقىسى تومەن جۇمىسشىلاردىڭ ەڭبەكاقىسىن كوبەيتۋ جانە ولاردىڭ سالىق جۇكتەمەسىن ازايتۋ ماسەلەسى بىرتىندەپ شەشىلىپ كەلەدى.  حالىق تابىسىنىڭ ارتۋىن قامتاماسىز ەتۋ ءۇشىن ءوزىن ءوزى جۇمىسپەن قامتىعان جانە جۇمىسسىز حالىققا ميكرونەسيە بەرۋدى كوزدەيتىن ءتورتىنشى باستاما بويىنشا نەگىزىنەن ينديكاتورلىق كورسەتكىشتەرگە قول جەتكىزىلدى. ال 20 مىڭ ءبىلىم گرانتىن ءبولۋدى كوزدەيتىن ءۇشىنشى باستامانىڭ ءبىرىنشى بولىگى جۇمىسىن اياقتادى. ەكىنشى بولىگى ستۋدەنتتەردى جاتاقحانامەن قامتۋدى كوزدەيدى.

«قازىر جوعارى وقۋ ورىندارى مەن كوللەدجدەردىڭ ستۋدەنتتەرىن جاتاقحانامەن قامتاماسىز ەتۋ ماسەلەسى وتە وزەكتى. بۇل مىندەتتى شەشۋ ءۇشىن جوعارى وقۋ ورىندارى، كوللەدجدەر مەن دەۆەلوپەرلىك كومپانيالار مەملەكەت پەن جەكەمەنشىكتىڭ سەرىكتەستىگى قاعيداسىمەن جاتاقحانا سالۋدى باستاۋى كەرەك» دەلىنگەن ەلباسىنىڭ «بەس الەۋمەتتىك باستاماسى» اياسىندا شىمكەنتتە وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتىنىڭ جاڭا 350 ورىندىق جاتاقحاناسى پايدالانۋعا بەرىلدى. مەملەكەتتىك-جەكەمەنشىك ارىپتەستىك شەڭبەرىندە سالىنعان ستۋدەنتتەر ءۇيىنىڭ اشىلۋ سالتاناتىنا قاتىسقان قالا اكىمى عابيدوللا ءابدىراحىموۆ ۋنيۆەرسيتەت باسشىلىعىن، وقىتۋشىلار جانە ستۋدەنتتەرىن وسىناۋ قۋانىشتى جاڭالىقپەن قۇتتىقتادى.

«قۇرمەتتى ستۋدەنتتەر، ەرتەڭ سىزدەر ۋنيۆەرسيتەت ءبىتىرىپ، قازاق ءتىلى، ورىس ءتىلى نە اعىلشىن ءتىلى مۇعالىمىنە اينالىپ، مەكتەپتە شاكىرت تاربيەلەيسىزدەر. ءبارىمىز دە ۇستاز الدىنان ءوسىپ شىقتىق. ويتكەنى، سول كىسىلەر ءبىلىم بەرىپ، تاربيەلەپ، ۇلكەن ومىرگە دايىندادى. بىلسەڭىزدەر، بالالار مەكتەپتە مۇعالىمدەرىنە وتە جاقىن وسەدى. ءتىپتى، اتا-اناسىنا ايتپايتىن سىرلارىن مۇعالىمدەرىنە ايتاتىن كەزى بولادى. سىزدەر دە شاكىرتى وزىنە جاقىن تارتاتىن مۇعالىم بولىڭىزدار. شاكىرتتەرىڭىز سىزدەردى قۇرمەتتەپ ءجۇرسىن!»، – دەدى.

 

توعجان تولەگەن

سوڭعى جاڭالىقتار