23 مامىر 2019, 15:40 605 0 دەنساۋلىق "تۇركىستان" گازەتىنىڭ اۆتورلارى

شارداراداعى «دەنساۋلىق مەكتەبى»

قوعامنىڭ ەڭ باستى بايلىعى – ادام ەكەنىن ەسكەرسەك، سول قوعامداعى ادام دەنساۋلىعىن جاسقارتۋ – مەملەكەتتىڭ العا قويىپ وتىرعان باسىم باعىتتارىنىڭ ءبىرى بولۋعا ءتيىس. بۇل باعىتتا ەگەمەن ەلىمىزدە دەنساۋلىق سالاسىن دامىتۋعا، حالىقتىڭ دەنساۋلىعىن نىعايتۋعا ارنالعان مەملەكەتتىك باعدارلامالار قابىلدانىپ، جۇزەگە اسىرىلۋدا. مەملەكەت تاراپىنان جاسالىنىپ جاتقان وسىناۋ قامقورلىقتى تۇركىستان وبلىسىنداعى شاعالالى اۋداننىڭ حالقى دا جەتە سەزىنىپ كەلەدى. شاردارا اۋدانى وبلىستىڭ ەڭ شالعايىندا ورنالاسقان، تابيعاتى توزىمدىلىكتى تالاپ ەتەتىن ەرەكشە ايماق بولىپ سانالادى. 80 مىڭعا جۋىق حالىق قونىستانعان ولكەدە سوڭعى جىلدار بەدەرىندە دەنساۋلىق سالاسىندا بولىپ جاتقان وڭ وزگەرىستەردى باعالاعانىمىز ءجون.

اسىرەسە، سوڭعى جىلدارى اۋداندىق مەديتسينا سالاسىندا بۇرىن-سوڭدى بولماعان شارۋالار قولعا الىنىپ جاتقانىنا كۋا بولىپ وتىرمىز. اتاپ ايتار بولساق، شاردارا قالاسىندا 1 ملرد 600 مىڭ تەڭگەگە ەكى قاباتتى، 150 ورىندىق زاماناۋي ۇلگىدەگى ەمحانا عيماراتىنىڭ قۇرىلىس جۇمىسى جۇرگىزىلىپ جاتىر. اۋدان كولەمىنىڭ ۇزاقتىعىنا جانە ەلدى مەكەندەردىڭ شالعايدا ورنالاسۋىنا بايلانىستى مەديتسينالىق كومەكتى جەدەل، ساپالى كورسەتۋدى ۇيىمداستىرۋ ءۇشىن «قازاقستان» ەلدى مەكەنىنەن جەدەل جاردەم ءبولىمى اشىلدى.

سونداي-اق، بىلتىرعى جىلى اۋدانىمىزدا تۇڭعىش رەت مەديتسينالىق كومەكتى جەدەل تۇردە كورسەتۋدى ۇيىمداستىرۋ ماقساتىندا حالىقتىڭ كوپ شوعىرلانعان ايماعىنا 13 جاڭا ۇلگىدەگى مودۋلدىق مەديتسينالىق پۋنكتتەر سالىندى. سوڭعى قىرىق جىلعا تاياۋ ۋاقىت ىشىندە دەنساۋلىق سالاسىندا ءدال وسىنشاما قارقىندى قۇرىلىس جۇمىسى جۇرگىزىلمەگەن ەدى. بۇلاردان باسقا قالا جانە اۋىلدىق وكرۋگتەردەگى بىرنەشە ەمحانا عيماراتتارىنا كۇردەلى جوندەۋ جۇمىستارى جۇرگىزىلىپ، جاعدايى ايتارلىقتاي جاقسارىپ وتىر. مۇنىڭ بارلىعى دا مەملەكەتىمىزدىڭ قولداۋىمەن اۋدانىمىزدىڭ دەنساۋلىق ساقتاۋ جۇيەسىن، ونىڭ ينفراقۇرىلىمىن دامىتۋ باعىتىندا جاسالىنىپ وتىرعان يگى تىرلىك دەپ ايتقان بولار ەدىك. وسى رەتتە ءوڭىرىمىزدىڭ ەرەكشەلىگىن ەسكەرىپ، مەديتسينالىق قىزمەت ساپاسىن ارتتىرۋعا ايرىقشا قامقورلىق جاساپ وتىرعان وبلىستىق دەنساۋلىق ساقتاۋ باسقارماسىنىڭ باسشىسى مۇقان ەگىزباەۆقا، ەلباسى ساياساتىن اۋداندا ءوز دەڭگەيىندە جۇرگىزىپ كەلە جاتقان اۋدان اكىمى بولاتبەك قىستاۋوۆقا، كەشەگە دەيىن اۋداندىق ورتالىق اۋرۋحانانىڭ تىزگىنىن ۇستاعان جانار وسپانوۆاعا اۋدان تۇرعىندارىنىڭ العىستارى شەكسىز.

مەديتسينا عىلىمدارىنىڭ كانديداتى، حالىقارالىق دارەجەدەگى مەنەدجەر جانار وسپانوۆا اۋداندىق ەمحاناعا، ودان ورتالىق اۋرۋحاناعا باس دارىگەرلىك قىزمەتكە كەلگەلى حالىق يگىلىگى ءۇشىن قىرۋار تىرلىك اتقارىپ كەتكەنىن ايتىپ ءوتۋىمىز كەرەك. جانار مىقتىبەكقىزىنىڭ ۇيىمداستىرۋشىلىق، ىسكەرلىك قابىلەتىنىڭ ارقاسىندا اۋداندا «دەنساۋلىق مەكتەبى» اشىلىپ، جۇمىس جۇرگىزىپ كەلەدى. وبلىس بويىنشا تۇڭعىش رەت شاردارادا ىسكە قوسىلعان «دەنساۋلىق مەكتەبىنىڭ» نەگىزگى مىندەتتەرىنە ادامداردىڭ دەنساۋلىعىنا قاتىستى تۇراقتى جۇمىس ىستەپ تۇرعان اقپاراتتىق-دارىستىك وقىتۋ جۇيەسىن قۇرۋ، دەنساۋلىققا كەرى اسەرىن تيگىزەتىن قاۋىپتى فاكتورلارى تۋرالى تۇرعىنداردىڭ بىلىكتىلىگىن ارتتىرۋ جانە ءوز دەنساۋلىعىنا دەگەن جاۋاپكەرشىلىگىن كۇشەيتۋ سياقتى ءتۇرلى اۋرۋلاردىڭ الدىن الۋ شارالارى كىرەدى. قازىرگى تاڭدا 2 قاباتتى عيمارات ىشىندە اۋداندىق ەمحانانىڭ دارىگەرلەرى كەلۋشىلەرگە تەگىن كونسۋلتاتسيالىق كەڭەستەر بەرىپ كەلەدى.

بۇگىنگى كۇنى اۋداندىق ەمحانا عيماراتىنا باس سۇققان ادام ونداعى ۇلكەن وزگەرىستەردى بىردەن بايقايدى. كوزگە بىردەن تۇسەتىنى، بۇرىنعىداي ءار كابينەتتىڭ الدىنداعى ىعى-جىعى كەزەك ساپ تىيىلىپ، كەلۋشىلەرگە دارىگەرلىك قىزمەت كورسەتۋ ءتارتىبى ءبىر جۇيەگە تۇسكەن. تۇرعىندار ەلەكتروندى كەزەك ارقىلى ءتيىستى دارىگەرگە قارالىپ، لابوراتوريالىق تەكسەرۋدىڭ ناتيجەلەرىن ينتەرنەت ارقىلى الىپ جاتىر. ەلەكتروندى قىزمەت كورسەتۋ جۇيەسىنە كوشكەن سوڭ بارلىعى دا رەتتەلىپ، وڭتايلانعانىنا ەرىكسىز ريزا بولاسىڭ.

اۋداندار اراسىندا العاشقىلاردىڭ ءبىرى بولىپ شاعالالى وڭىردە قولدانىسقا ەنگىزىلىپ وتىرعان 3ن جۇيەسى دە ناۋقاس جاندارعا جەدەل تۇردە كومەك كورسەتىپ، ولاردىڭ دەنساۋلىعىن نىعايتۋعا ۇلەسىن قوسپاق. مۇنىڭ بارلىعى دا بىلىكتى باسشى، ۇتىمدى ۇيىمداستىرۋشى جانار مىقتىبەكقىزى مەن اۋداندىق ورتالىق اۋرۋحانا ۇجىمىنىڭ ەرەن ەڭبەكتەرىنىڭ ارقاسىندا بولىپ جاتقان يگى جاڭالىقتار. حالىق ءۇشىن ەتكەن ەڭبەك تەككە كەتپەسە كەرەك، بىلتىرعى جىلدىڭ تاۋەلسىزدىك مەرەكەسى قارساڭىندا ەلباسىنىڭ جارلىعىمەن جانار وسپانوۆا «ەرەن ەڭبەگى ءۇشىن» مەدالىمەن ماراپاتتالدى.

كەشەگى اپتادا قازاقستاننىڭ بار ايماعىنان جينالعان دارىگەر- گينەكولوگتار العاش رەت شاردارا اۋدانىندا باس قوستى. قر دەنساۋلىق ساقتاۋ مينيسترلىگى مەن تۇركىستان وبلىستىق دەنساۋلىق ساقتاۋ باسقارماسى باسشىلىعىنىڭ ۇيىمداستىرۋىمەن اۋداندا «ءتيىمدى پەريناتالدى تەحنولوگيالار» تاقىرىبىندا رەسپۋبليكالىق عىلىمي-تاجىريبەلىك سەمينار وتكىزىلدى.

بۇرىن سوڭدى بولماعان اۋقىمدى جيىنعا نۇر-سۇلتان، الماتى، قىزىلوردا قالالارى مەن سولتۇستىك قازاقستان، باتىس قازاقستان، شىعىس قازاقستان وبلىستارىنان 100-گە جۋىق گينەكولوگيا سالاسىنىڭ بىلىكتى ماماندارى تاجىريبە الماسۋ ماقساتىندا ارنايى كەلدى.

«سىر نۇرى» دەمالىس ايماعىندا وتكەن القالى جيىندا اۋدان اكىمى بولاتبەك قىستاۋوۆ ءسوز سويلەپ، شاردارالىق دارىگەرلەردىڭ ناتيجەلى ەڭبەكتەرىن اتاپ ءوتتى.

– ەلىمىز تاۋەلسىزدىك العالى بەرى حالىقتىڭ دەنساۋلىعىن جاقسارتۋ ماقساتىندا كوپتەگەن ارنايى باعدارلامالار قابىلدانىپ كەلەدى. مەملەكەتىمىز اسىرەسە، انا مەن بالا دەنساۋلىعىنا ەرەكشە ءمان بەرىپ، وسى باعىتتا انا مەن بالانى قورعايتىن عىلىمي-زەرتتەۋ ورتالىقتارىن اشقانى ەگەمەن ەلىمىزدەگى جاسالعان يگى شارالاردىڭ ۇلكەنى بولعانىن اتاپ وتكەنىمىز دۇرىس. 2018 جىلى وبلىسىمىزدا العاشقىلاردىڭ قاتارىندا اۋداندىق ورتالىق اۋرۋحانادا جاڭا تالاپقا ساي، زاماناۋي ۇلگىدەگى 3ن جۇيەسى ىسكە قوسىلىپ، جۇمىسىن باستادى. بۇل جاڭا جۇيە العاشقى مەديتسينالىق كومەك كورسەتۋدى وڭتايلاندىرىپ، ءوزىنىڭ وڭ ناتيجەسىن كورسەتىپ وتىر، – دەدى بولاتبەك دۇيسەنبەكۇلى.

وبلىستىق دەنساۋلىق ساقتاۋ باسقارماسىنىڭ باشىسى مۇقان ەگىزباەۆ جوعارى دەڭگەيلى مەديتسينا ۇيىمدارى ماماندارىنىڭ شالعايداعى شاردارا اۋدانىندا باس قوسىپ، وسى جەردە ءبىلىمىن جەتىلدىرۋى ماقتانارلىق جاعداي ەكەنىنە توقتالدى. سونىمەن بىرگە، سوڭعى 4 جىلدا شاعالالى اۋداندا بىردە-ءبىر انا ءولىمى بولماعانى ءبىرىنشى كەزەكتە اق حالاتتىلاردىڭ ۇلكەن جەتىستىگى ەكەنىن جاسىرعان جوق.

ەكى كۇنگە سوزىلعان سەمينار-كەڭەستە الىس-جاقىننان كەلگەن مەديتسينا ماماندارى ورتالىق اۋرۋحانادا بولىپ، مۇنداعى جۇمىس بارىسىمەن كەڭىنەن تانىستى. قوناقتار بىلىكتى دارىگەر جانار وسپانوۆا باسشىلىق جاسايتىن اۋداندىق ورتالىق اۋرۋحاناداعى سوڭعى جىلدارى ىسكە قوسىلىپ جاتقان جاڭا جۇيەلەر مەن ادام دەنساۋلىعىن جاقسارتۋ باعىتىنداعى اتقارىلىپ جاتقان تىنىمسىز تىرلىكتەرگە جوعارى باعا بەرىستى.

مەيرامگۇل مىرزاعاليەۆا

سوڭعى جاڭالىقتار