23 مامىر, 14:07 247 0 جاڭالىقتار ارمان قۇدايبەرگەن

مەديا فورۋم باستالدى

الماتىدا XVI ەۋرازيا مەديا فورۋمى باستالدى. تاريحى سوناۋ 2002 جىلدان باستاۋ الاتىن كونفەرەنتسيا بۇگىندە بارشاعا ءتيىمدى كوممۋنيكاتسيا الاڭىنا اينالىپ ۇلگەرگەن.

جىل سايىن الەمنىڭ 60 ەلىنەن كەلگەن 600-دەن استام دەلەگات ەڭ وزەكتى تاقىرىپتاردى ساراپقا سالادى. ساياسي، ەكونوميكالىق جانە الەۋمەتتىك ماسەلەلەر جايىندا وي تولعاپ، الەم نازارىن وزىنە اۋدارادى. شەتەلدىك ساراپشىلاردىڭ بۇل فورۋمعا «الەمدىك دەڭگەيدەگى وقيعا» دەپ باعا بەرۋى دە وسىدان شىعار.

«بۇگىنگى الەم: شىندىق ترانسفورماتسياسى؟» دەگەن تاقىرىپتى تالقىعا سالعان فورۋمدا العاش بولىپ ءسوز العان – News decoder باسشىسى، ۇلىبريتانيالىق تانىمال مەديا مامان نەلسون گرەيۆس. ەكولوگيالىق جۋرناليستيكا جايىندا ءسوز قوزعاعان ول ءوز تاجىريبەسىمەن ءبولىسىپ، الەمدىك ەكولوگيالىق جۋرناليستيكانىڭ بولاشاعىن بولجاعانداي بولدى.

نەلسون گرەيۆستەن كەيىن رەسەيلىك كينورەجيسسەر، ستسەناريست، پروديۋسەر سەرگەي بودروۆ فورۋم قوناقتارىمەن سىرلاسۋ فورماتىنداعى شەبەرلىك ءدارىسىن وقىدى. مونعول ءفيلمىن ءتۇسىرۋ بارىسىنداعى ساتتەرمەن ءبولىسىپ، قازاق دالاسى، حالقى جونىندەگى جاعىمدى پىكىرلەر ايتتى. س. بودروۆ ەنشىسىندەگى تاقىرىپ «كينوداعى پروديۋسەرلىك ونەرى» بولعاندىقتان باسىمدىقتى پروديۋسەرلىك ونەرگە بەرە وتىرىپ، قازاقستاندىق پروديۋسەر، كينورەجيسەر تيمۋر بەكمامبەتوۆكە توقتالىپ ءوتتى. «تيمۋر وتە ساۋاتتى مامان. قىراعى رەجيسسەر عانا ەمەس، تابىستى پروديۋسەر. ونىڭ فيلمدەرىنىڭ كاسسالىق تابىسىن جاقسى بىلەسىزدەر، ونداي ماماندار قاي-قاي جەردە بولماسىن باعالانادى»، – دەدى س. بادروۆ.

جالپى، ەۋرازيا مەديا فورۋمىندا الەمدىك مەدياكەڭىستىكتەگى بەدەلدى تۇلعالار، ازۋلى ساراپشىلار جانە ءار سالادا ءوزىن مويىنداتقان كاسىبي مامانداردىڭ قاتىسۋى ۇردىسكە اينالعان. بيىلعى مەديا فورۋمنىڭ العاشقى كۇنىندە ەلەنا افاناسەۆا (رەسەي) تۆ جانە Digital-مەديا اۋديتورياسىنداعى ءتۇرلى بۋىنداردىڭ ەرەكشەلىگى تاقىرىبىندا، ۇتقىر (موبيلدىك) جۋرناليستيكا تۋرالى يۆو بورۋم (اۆستراليا),  ءفوتوجۋرناليستىڭ قۇپياسى تاقىرىبىندا تاسس فوتواقپارات رەداكتسياسىنىڭ جەتەكشىسى ءارى باس رەداكتوردىڭ ورىنباسارى گريگوري دۋكور شەبەرلىك دارىستەرىن وتكىزدى. ىرگەلى ءال-جازيرا تەلەكومپانياسىنىڭ قۇرامىنا كىرەتىن «Contrast» اگەنتتىگىنىڭ باسشىسى زاحرا راسۋل تىڭداۋشىلاردى وزىنە بىردەن باۋراپ اكەتتى. «ۆيرتۋالدىق اقيقاتتى قالىپتاستىرۋ» تاقىرىبىن تەرەڭىنەن قاۋزاپ، زاماناۋي تەحنولوگيانىڭ مۇمكىنشىلىكتەرى جايىندا ءدارىس وتكىزدى. فورۋم الاڭىندا تەوريا عانا ايتىلماي، پراكتيكالىق تاجىريبەلەر ارقىلى تىڭداۋشى مەن سپيكەر اراسىندا بايلانىس ورنادى. زاحرا ءوز كەزەگىندە ۆيرتۋالدى اقيقات ءۇشىن 360 گرادۋستى قامتيتىن كامەرالاردىڭ ءداۋىرى تۋىپ جاتقانىن ايتادى.  «امەريكا قۇراما شتاتتارى مەن ەۋروپا ەلدەرىندە تۇراقتى پايدالانۋشىلار كوپ، ونىڭ مۇمكىندىكتەرى ارقىلى ۆيرتۋالدى سەنىم مەن سەزىم تۋدىرۋعا بولادى. بولاشاقتا كەز كەلگەن وقيعانى شىنايى، اسەرلى ەتىپ كورۋگە تولىقتاي مۇمكىندىك الامىز»، – دەدى.

تاعى ءبىر ايتا كەتەرلىگى، ەامف جۇمىسىنا Euronews, CNN, BBC, Associated Press Television News, Reuters, Bloomberg, New York Times, Al Jazeera English سىندى اقپاراتتىق اگەنتتىكتەر مەن الەمدىك 1500-دەن اسا باق وكىلدەرى اتسالىسۋدا.

ارمان قۇدايبەرگەن

سوڭعى جاڭالىقتار