23 مامىر, 13:49 189 0 ايماق "تۇركىستان" گازەتىنىڭ اۆتورلارى

حالىقارالىق اۋەجايدىڭ ىرگەتاسى قالاندى

قاسيەتتى شاھار – تۇركىستاننىڭ اتى داۋىرلەيتىن كۇن الىس ەمەس. بۇگىندە 2017 جىلى تۇركى مادەنيەتىنىڭ استاناسى دەپ تانىلعان كونە قالاعا ارنايى ات ءىزىن سالۋشىلاردىڭ قاتارى ارتىپ كەلەدى. ونىڭ ۇستىنە 2020 جىلعا قاراي تۋريستەردىڭ سانىن 5 ملن-عا جەتكىزۋ كەرەك دەگەن جوسپاردى ەسەپكە الساق، بۇل مەجەگە دە جەتۋ قيىندىق تۋدىرماس.

الايدا، شاھارعا الىس جانە جاقىن تۇركىتىلدەس مەملەكەتتەردەن نيەت ەتىپ، كەلۋشىلەرگە قيىندىق تۋعىزاتىن ءبىر نارسە بار. بۇل – كەلىپ-كەتۋ ماسەلەسى. سوندىقتان قالانى الەممەن بايلانىستىراتىن حالىقارالىق اۋەجاي سالماي، تۇيتكىل شەشىلمەيتىنى انىق. بۇل جايت تۇركىستان وبلىسى قۇرىلىپ، ونىڭ ورتالىعى تۇركىستان قالاسى اتالعان كۇننەن باستاپ كۇن تارتىبىنە الىنعان. مىنە، كوپتەن كۇتكەن اۋەجايدىڭ ىرگەتاسى قالانىپ، ءساتىن سالسا 2020 جىلدىڭ اياعىندا قولدانىسقا بەرىلمەك. ازاماتتىق اۆياتسيا كوميتەتىنىڭ باسقارما باسشىسى امانتاي قوقاتاەۆتىڭ ايتۋىنشا، اۋەجاي تۇركىستان قالاسىنا جاقىن ورنالاسقان شاعا اۋىلىنان 3 شاقىرىم قاشىقتىقتا بوي كوتەرەدى. بۇل تاڭداۋعا تۇسكەن 8 جەر تەلىمىنىڭ ءبىرى. تاڭدالعان جەر اۋەجاي سالۋعا بارلىق جاعىنان سايكەس كەلەدى ەكەن. ونىڭ قۇرىلىسىنا قارجىنى تۇركيالىق ينۆەستورلار قۇياتىن بولدى.

سالاتىن مەردىگەر مەكەمە تۋركيالىق «يدا ينشاات ساناي ۆە تيدجارەت انونيم شيركەتي» (YDA INŞAAT SANAYI VE TICARET ANONIM ŞIRKETI).

تۇركىستان وبلىسىنا كەزەكتى ىسساپارمەن كەلگەن قازاقستان رەسپۋبليكاسىنىڭ پرەمەر-ءمينيسترى اسقار مامين باستاعان جۇمىس توبى الدىمەن تۇركىستان قالاسىندا بوي كوتەرەتىن حالىقارالىق اۋەجايدىڭ كاپسۋلاسىن سالۋعا قاتىستى. اسقار مامين حالىقارالاق اۋەجايدىڭ ىرگەتاسى قالانۋىمەن قۇتتىقتاپ، حالىقارالىق ماڭىزى بار نىساننىڭ ۋاقىتىلى پايدالانۋعا بەرۋ قاجەتتىگىن ايتتى. ءوز كەزەگىندە كومپانيا باسشىسى ارسلان حۋسەين ۇكىمەت باسشىسىنا تەرمينالدىڭ حالىقارالىق جانە ىشكى رەيستەردە ساعاتىنا 250 ادام قابىلداۋعا قاۋقارلى ەكەندىگىن جەتكىزدى. جالپى، جاڭا اۋەجاي بولاشاقتا جىلىنا 3 ملن-نان استام جولاۋشىعا قىزمەت كورسەتەتىن بولادى. «ءبىزدىڭ كومپانيا قازاقستاندا 18 جىلدان بەرى ارىپتەستىك باعىتتا جۇمىس اتقارىپ كەلە جاتىر. وسىعان دەيىن اقتاۋ قالاسىنداعى اۋەجايدى سالدىق. بىزدەر وسىناۋ تاريحي ساتتە اتا-بابالارىمىزدىڭ شىققان ءتۇپ قازىعى، تاريحي وتانى – قازاقستاندا قىزمەت ەتىپ جاتقانىمىزدى قۋانىشتى تۇردە ايتامىن. بۇل نىسان بارلىق حالىقارالىق تالاپقا ساي سالىناتىن بولادى. اللا بۇيىرتسا، ەندى 1,5 جىلداي ۋاقىت ىشىندە مىنا جەردە ادام تانىماستاي عاجاپ نىساندى كورەتىن بولاسىزدار، – دەدى ارسلان حۋسەين.

جۇمىسپەن 420 ادام قامتىلادى. جالپى اۋماعى 905,3 گەكتاردى قۇرايتىن اۋەجايدىڭ قۇرىلىسى بيىل، ياعني 2019 جىلى مامىر ايىندا باستالدى.

جانىبەك ءاشىم

سوڭعى جاڭالىقتار