23 مامىر, 13:14 898 0 ونەر احمەت ومىرزاق

ۇلت كومپوزيتورلارى ۇيالا بىلسە...

قازاق ءانى الەمدى جاۋلار ەدى

ونەردى قۇدىرەت، ونەرپازدىقتى قاسيەت دەسەك تە، ونىڭ ورەسىن وسىرەتىن تالانت. بىراق تالانتتى قالعىتپاي، العا ۇمتىلدىراتىن – ار-قامشى مەن نامىس-وت.

قازاق تالانتقا قاي كەزدە دە كەندە بولماعان دەيمىز، ول راس. بىراق سوڭعى جىلدارى ۇلتتىق ءان ونەرىمىزدىڭ سازى سۇيىلىپ، تۇعىردان تۇسە باستاۋى ويلانتپاي قويمايدى...

وسىدان شيرەك عاسىر ارىدە كومپوزيتورلار شىعارعان ءانىن ورىندايتىن لايىقتى ءانشى تاپپاي، سەندەلىپ جۇرەتىن جاعدايلار بولۋشى ەدى، قازىر بولسا كەرىسىنشە سەكىلدى. بىراق ناعىز ءان، ناعىز ءانشى دەگەن ۇعىم بۇگىنگى شوۋ-بيزنەستىڭ ەركەتوتايلارىنا ارنالماعان-اۋ... ەندەشە فانەرانىڭ ارتىنا تىعىلىپ جان ساقتايتىندار ءانشى اتانىپ جۇرگەن زاماندا

 ديماش فەنومەنى

دەگەن نارسەنىڭ سىرىن ۇعىپ، بايىبىنا بارا الامىز با؟! الەم بۇگىنگى قازاقتى ونەرى، ونەرى بولعاندا دا، انشىلىك ونەرى ارقىلى تانيدى. سول ونەردى ورگە سۇيرەپ، قۇداي بەرگەن تالانتىمەن الەم ساحنالارىندا جۇلدىز بولىپ جانىپ، عاجايىپ داۋسىمەن تىڭداۋشىسىن ەستەن تاندىرىپ جۇرگەن ديماش دەگەن بالا بار.

قازىر ءاندى تالعاممەن تىڭدايتىن الەم حالقىنا «ديماش قۇدايبەرگەن» دەگەن ەسىمنىڭ ءوزى تالاي نارسەنى اڭداتادى. ويتكەنى بۇل ەسىم – ناعىز انشىلىكتىڭ، بولەكشە تالانتتىڭ، ءان الەمىندەگى وزگەشە قۇبىلىستىڭ، ءان ورىنداۋ شەبەرلىگىنىڭ جاڭا دەڭگەيىنىڭ – ءبارىنىڭ سينونيمىنە اينالىپ بارادى.

بۇگىندە ديماش قۇدايبەرگەندى ءوز ەلىندە ەلەنبەي، شەتەلدىك بايقاۋلاردا تانىلعان سوڭ عانا اتى شىعا باستادى دەگەندەي، ەكىۇشتىلاۋ پىكىر جوق ەمەس. التى جاسىندا-اق (2000 جىلى) «اينالايىن» رەسپۋبليكالىق بايقاۋىنىڭ قاتىسىپ، «فورتەپيانو» نوميناتسياسىندا جەڭىمپاز بولعان، 16 جاسىندا «بايقونىردىڭ اسەم داۋىستارى» حالىقارالىق فەستيۆالىندە ءبىرىنشى ورىن، 18 جاسىندا «جاس قانات» رەسپۋبليكالىق جاس انشىلەر بايقاۋىنىڭ گران-ءپريىن العان دارىندى ءانشىنى باعالانبادى دەي الامىز با؟

ارينە، تار ارەناعا ىرىلەر سىيمايدى، بىراق سىيماعانى ءۇشىن ىرىلەر كىنالى مە؟ 2013 جىلى ەلىمىزدە وتكەن تەلەۆيزيالىق «ساز الەمى» ءان كونكۋرسىنا قاتىسقان ديماش قۇدايبەرگەننىڭ سالعان انىنە كوڭىلى تولماعان، ادىلقازىلار القاسىنداعى ءبىر كاسىبي مۋزىكانت پەن ءبىر انگە ءسوز جازاتىن ايتىس اقىنى جاس تالانتتىڭ داۋسىنا ءمىن تاقتى. بىرەۋى «ۆوكالدىق مۇمكىندىگىڭدى بۇل ارادا كورسەتۋدىڭ قاجەتى جوق» دەسە، ەكىنشىسى «شىڭعىرىپ ايتاتىن انشىلەردىڭ وزىنە ۇنامايتىنىن» ايتتى. بۇل كاسىبي سىننان گورى، ءانشىنىڭ تالانت قۋاتىن جەتە باعالاي الماعاندىقتىڭ كورىنىسى ەدى.

دەگەنمەن 2012 جىلى ۋكراينادا وتكەن حالىقارالىق «ۆوستوچنىي بازار» ءان بايقاۋىندا ءبىرىنشى ورىن الىپ، 2013 جىلى قىرعىزستاندا وتكەن «مەيكين ازيا» كونكۋرسىندا باس جۇلدە، 2015 جىلى بەلورۋسسيانىڭ ۆيتەبسك قالاسىندا وتكەن «سلاۆيانسكي بازار» كونكۋرسىندا باس جۇلدەنى يەلەنگەنى ديماشتىڭ انشىلىك دارىنىنىڭ اشىلا ءتۇسىپ، اتىنىڭ الەمگە تانىلا باستاۋىنا اسەر ەتكەنى انىق. بىراق ديماشتى شەتەلدىك ساراپشىلارمەن بىرگە، قازاقستاندىق مۋزىكا سالاسىنىڭ كاسىپقوي تۇلعالارى دا تانىپ، ونىڭ تالانت قۇدىرەتىنىڭ بولەكشە سيپاتى تۋرالى ايتا باستاعان. سول جىلى ول ەلىمىزدە حالىقتىڭ اشىق داۋىس بەرۋىمەن وتكەن «جىل ادامى» تاڭداۋىندا «جىل ءانشىسى» اتاندى.

2017 جىلدىڭ باسىندا ديماش قۇدايبەرگەن قىتايدىڭ چانشا قالاسىندا وتكەن I Am a Singer (مەن ءانشىمىن) جوباسىنا قاتىسىپ، بىرنەشە ساتىدان تۇراتىن ءان سايىسىنىڭ العاشقى ساتىسىندا-اق فرانتسۋزدىڭ «Sos dun terien un detresse» اتتى ءانىن ورىنداپ، جەڭىمپاز بولدى. كەرەمەتى سول، اتالعان ءان سايىسىنداعى ءبىرىنشى ورىنداعان انىمەن-اق ديماشتىڭ داڭقى دۇنيە جۇزىنە تارالدى. ءانشىنىڭ داۋىس دياپازونىنىڭ كەڭدىگى مەن تەمبرىنىڭ بوياۋى جانە ءان ورىنداۋ شەبەرلىگى كۇللى الەمدى تاڭداي قاقتىردى. ءان كونكۋرسىنىڭ ءار ساتىسى سايىن ديماشتىڭ ءانىن كۇتىپ وتىراتىن ميلليونداعان فاناتتاردىڭ توبى پايدا بولدى، اسىرەسە قىتاي ەلىندە ديماشتىڭ ونەرىنە قول سوقپاعان جان قالمادى. I Am a Singer جوباسى ديماشتىڭ داۋسىن الەمگە جەتكىزسە، كەزەگىندە ديماش تا جوبانى الەمگە تانىتتى. 13 راۋندتان تۇراتىن جوبادا قازاق ءانشىسى ءۇش رەت ءبىرىنشى ورىندا، ەكى رەت ەكىنشى ورىننان كورىنىپ، اقتىق باسەكەدە ەكىنشى ورىنعا تابان تىرەدى. دەگەنمەن I am a singer جوباسىن عالامتوردان باقىلاپ وتىرعان الەمنىڭ بارلىق تۇكپىرىندەگى انسۇيەر قاۋىم ديماش قۇدايبەرگەندى ناعىز جەڭىمپاز دەپ تانيتىنىن، ونىڭ تالانتى ەرەكشە ەكەنىن ايتىپ، عالامتور جەلىسىندەگى ونىڭ اندەرى بەرىلگەن بەينەجازبالاردىڭ پىكىر جازاتىن جەرلەرىن ءسۇيسىنىسى مول ىستىق لەبىزدەرگە تولتىردى. بۇنىڭ ءبارى قازاق ءانشىسىن الەمدە بۇرىن-سوڭدى بولماعان داڭققا بولەگەن-ءدى.

ال ودان كەيىنگى كەزەڭدە بەيجىڭ، لوندون، پاريج، نيۋ يورك، ماسكەۋ، استانا، تاشكەنت قالالارىنىڭ ساحنالارىندا ءان سالىپ، كونتسەرتتەر قويعان ديماشتىڭ اتى بۇرىنعىدان دا بەتەر اسپانداپ، اقش، ەۋروپا ەلدەرىندە، رەسەيدە ونىڭ ءان سالۋ شەبەرلىگىن تالداپ، ارتىقشىلىعىن ايتىپ، ەرەكشەلىگىن ءتۇسىندىرىپ وتىراتىن ماماندار كوبەيدى. بۇل دا ءبىر قۇبىلىسقا اينالىپ بارادى. الايدا...

سوڭعى كەزدە ديماشتىڭ انشىلىك قابىلەتىنە شەك كەلتىرمەسە دە، ونىڭ بۇگىنگى باعىتىنا سىن كوزبەن قاراپ،

ديماشقا ءوزىنىڭ حيت ءانى كەرەك

دەگەن ويدى ايتىپ قالاتىندارعا قاراپ، بۇل ماسەلەنى دە ويلاۋىمىز كەرەك سەكىلدى. نەگە؟

قازاقتا «كەلىننىڭ بەتىن كىم اشسا، سول ىستىق» دەگەن ءسوز بار. ونى ونەرگە قاتىستىرساق... ماسەلەن، قايسى ءاندى قاي ءانشى العاش ورىنداسا، ءاننىڭ بۇكىل بولمىسى تىڭدارماننىڭ ويىنا سول ءانشىنىڭ شەبەرلىگىمەن ەنىپ، وزگەلەردى جاتىرقايتىنداي ءبىر سەزىم قالىپتاسادى. ارينە، «كۇشتىدەن كۇشتى شىقسا» نە بولاتىنى بەلگىلى عوي، بۇرىن وزگەلەر باعىن اشا الماعان ءاندى باسقا ءبىر ءانشى قۇلپىرتىپ ورىنداپ، تىڭداۋشىنىڭ قۇلاق قۇرىشىن قاندىرىپ، انگە ەكىنشى ءومىر سىيلاپ جىبەرسە، ول دا ءبىر باقىت. ال تالانتتى انشىلەر ورىنداپ، تانىتقان اسەم اندەردى ەكىنشى ءبىر ءانشى ورىنداپ، جاڭا قىرىنان تانىتىپ جاتسا شە؟ مۋزىكادا ونى «كاۆەر-ۆەرسيا» دەيدى. بىراق ول ءبارىبىر جاڭا ءان ەمەس، تەك بۇرىننان بار ءاننىڭ جاڭاشا ورىندالۋى. بۇل جاعىنا كەلگەندە... ءبىز ديماشتىڭ ورىنداۋىندا تىڭداپ، تامسانىپ جۇرگەن اندەردىڭ ءبىرازى بۇرىن تانىمال انشىلەردىڭ ورىنداۋىندا تىڭدارماندارعا جەتىپ، باعاسىن العان شىعارمالار ەكەنىن بىلەمىز. الايدا ديماشتىڭ فەنومەنالدى دارىنى بۇرىننان بار نارسەنىڭ ءوزىن سۋ جاڭا دۇنيە سەكىلدى تانىتىپ تۇرعاندا، بىزگە ول «كاۆەر-ۆەرسيا» سياقتى اسەر ەتە قويمايدى. دەسەك تە، جوعارىدا شەتى شىققان اڭگىمەنىڭ ءتۇبى ءتۇيىندى ماسەلەگە اينالۋ مۇمكىن ەكەنىن قاپەردەن شىعارماۋىمىز كەرەك.

ديماش I اm a singer جوباسىنىڭ ەكىنشى كەزەڭىندە رەسەيلىك تانىمال ءانشى ۆيتاستىڭ رەپەرتۋارىنداعى «وپەرا 2» ءانىن ورىنداپ، سايىستا وزگەلەردى شاڭ قاپتىرعانىن بىلاي قويعاندا، بۇرىن كىم كورىنگەن ورىنداي المايتىنداي كورىنگەن ءاندى ۆيتاستىڭ داۋسىنان ءتورت ەسە بيىككە كوتەرىپ، تىڭدارماندارىن شەكسىز قۋانىشقا بولەدى. قانشا جوعارى نوتاعا كوتەرىپ شىرقاسا دا داۋىس تەمبرى بۇزىلماعان ديماشقا الەم قول سوقتى. بىراق ۆيتاستىڭ پروديۋسسەرى اتالعان ءاندى ديماش رۇقساتسىز ورىندادى دەپ، اۆتورلىق قۇقىق قورعايتىن ۇيىمدارعا شاعىم ءتۇسىرىپ، ءبىراز شۋلاتقانى بار. ەسەسىنە ديماشتىڭ تابىنۋشىلار ارمياسى ينتەرنەت ارقىلى ۆيتاسقا، ونىڭ پروديۋسسەرىنە اقپاراتتىق شابۋىل جاساپ، ولاردى ىسكە العىسىز ەتتى. ءتىپتى ۆيتاس ءوزىنىڭ سۇحباتىنىڭ بىرىندە «قازىر ءوزىمنىڭ حيت ءانىمدى («وپەرا 2»-ءنى ايتادى) ورىنداۋعا دا قورقىپ قالدىم. نە جازعانىمدى بىلمەيمىن. ماعان شوۋ-بيزنەستەن كەت دەپ، اۋزىنا كەلگەنىن ايتىپ جاتقان ادام كوپ بولدى»، – دەگەنى بار. راسىندا، بۇل ماسەلەدە ۆيتاستىڭ دا، ديماشتىڭ دا كىناسى جوق. بىراق الگى «كاۆەر-ۆەرسيانىڭ» الەگى ەكەنى انىق...

ديماش تۋرالى پىكىر ءبىلدىرىپ، وعان قاتىستى «كاۆەر-ۆەرسيا» ماسەلەسىن العاش ايتقان ءانشى ءالي وقاپوۆ ەدى. ول:

– ديماش دەگەندە، ءبىز بىرىنشىدەن ديماشتىڭ ءوزىن جانە ونىڭ داۋسى ويعا كەلەدى. ال ديماشتىڭ ءانى، وسىنداي ءان دەيتىندەي، وكىنىشكە قاراي، بىردە-ءبىر ءان شىقپاعان. ول ەندى اقيقات، ول – شىندىق! بىرنەشە بەينەباياندارى بار ەكەنىن بىلەمىن. قانشاما كونتسەرتتەردى بەرگەنىن بىلەمىن. بىراق ديماش – الەمدىك اندەردىڭ كاۆەرىن ورىنداۋدان ءوز تىڭدارماندارىن تاپقان نەمەسە جاۋلاعان ءانشى. مەنىڭ ويىمشا ءاربىر انشىگە حيت كەرەك! – دەگەن-ءدى. بىراق ديماشتىڭ تابىنۋشىلارىن بىلاي قويعاندا، كەيبىر ونەر ادامدارىنىڭ ءوزى ءاليدىڭ پىكىرىنە قارسى شىقتى. ماسەلەن، بەلگىلى ءانشى مايرا ءىلياسوۆا بىلاي دەيدى:

– ونىڭ بارلىق ءانى حيت. مەن كەلىسپەيمىن. بىزدە «حيت» دەپ ارزانقول اندەردى حيت قىلىپ العان عوي. بۇگىن «ىمبا-ىمبا» دەيدى. تاڭەرتەڭ ول حيت بولىپ شىعادى. «دايديداۋدى» ءتورت جاسار بالاعا دەيىن ايتادى جانە ءبارى ديماش سياقتى ايتۋعا تىرىسادى.

ال كومپوزيتور رينات گايسين بولسا:

– ديماشتىڭ ءار ورىنداعان اندەرى، ءوزىنىڭ جەكە اۆتورلىق اندەرى بولسىن نەمەسە كاۆەرلەرى بولسىن – ءبىر جاڭالىق بولىپ شىعادى. ديماشتىڭ ەرەكشەلىگى سول. ول ءار انگە فيشكالاردى قوسادى، ءار ءاننىڭ سترۋكتۋراسىن وزگەرتەدى. سول ءۇشىن ديماشتىڭ باسقا انشىلەردەن ايىرماشىلىعى كوپ! – دەپ، باعاسىن بەردى.

شىنىن ايتۋ كەرەك، ءۇش پىكىردىڭ دە ءوز ءۋاجى بار، بىراق مۋزىكا الەمىندە حح عاسىردىڭ سوڭعى شيرەگىندە قالىپتاسقان قاعيداعا ءالي وقاپوۆتىڭ پىكىرى دۇرىس كەلەدى. بىراق ونى تىڭدايتىن حالىق پا، دالەل-دەرەگى بار پىكىردىڭ ءوڭىن اينالدىرىپ، «ءوزى وڭدى ءانشى بولا الماعاسىن ديماشتىڭ داڭقىن قىزعانىپ ءجۇر» دەگەنگە دەيىن بارىپ، وقاپوۆتىڭ دىمىن قالدىرمادى. اقىرىندا ءالي ءوز پىكىرىنىڭ جاناشىرلىقتان تۋعانىن، ديماشتىڭ تالانتىن تۇك تە قىزعانبايتىنىن، كەرىسىنشە ونى ءانشى رەتىندە قۇرمەتتەيتىنىن ايتىپ، جەلىگە جازبا قالدىرۋعا ءماجبۇر بولدى. بىراق «كاۆەر-ۆەرسيا» اڭگىمەسى مۇنىمەن توقتاپ قالعان جوق، ارادا از ۋاقىت وتكەندە قازاقستاندىق تانىمال ەسترادا ءانشىسى، قازاقستان حالىق ءارتىسى لاكي كەسوگلۋ دا بۇل جايعا ءوز پىكىرىن ءبىلدىردى. «راسىمەن دە ديماشتىڭ ءوزىنىڭ حيت اندەرى جوق. ول حالىق اندەرىن ورىنداپ تانىلدى. بىراق بۇل جەردە ديماشتىڭ كىناسى جوق. بار كىنا ديماش ءۇشىن جۇمىس ىستەمەيتىن كومپوزيتورلاردا. وسىنداي جەتىستىككە جەتكەن جالعىز ديماشقا بۇكىل قازاقستان بولىپ جۇمىس ىستەۋىمىز كەرەك. بۇكىل الەم سولاي جۇمىس ىستەيدى. ال بىزدە، وكىنىشكە قاراي، كومپوزيتورلار جوق. وعان ناعىز حيت جازىپ بەرە المايتىن مەلوديستەر، جەكەلەگەن اۆتورلار بار. ال ساۋاتتى بۇل ازامات توي اندەرىن ورىندامايدى. سوندىقتان دا ول قازىر الەمدىك حيت اندەردى ورىنداۋدا، وندا تۇرعان ەشتەڭە جوق، وسىلايشا ول تاجىريبە جينايدى.

ال ءالي – وتە ساۋاتتى ادام ءارى تالانتتى مۋزىكانت. جەكە پىكىرى ءۇشىن ونى وسىنشالىقتى سوگۋدىڭ قاجەتى جوق. فاناتتار ءسال دە بولسا ءىستىڭ اق-قاراسىن اجىراتا السا، ديماشقا لايىقتى ءان تاۋىپ بەرۋدىڭ جولىن ىزدەۋلەرى كەرەك»، – دەدى ول.

سونداي-اق، ديماشتىڭ ماسكەۋدەگى كونتسەرتىنەن سوڭ پىكىرىن ايتقان ا ستۋديو توبىنىڭ ءانشىسى بايعالي سەركەباەۆ تا، ديماشتىڭ تالانتى تۋرالى جاقسى پىكىر بىلدىرە كەلىپ، «ەندى ديماش قۇدايبەرگەننىڭ ءوزىنىڭ حيت اندەرى بولعانى دۇرىس» دەگەن ەدى.

بۇل جاي سوزدەر ەمەس، راسىمەن دە نازار اۋدارارلىق ويلار. قىتايدان كەيىن رەسەيدى باعىندىرعان ديماشتىڭ رەپەرتۋارىندا بىرنەشە ورىسشا اندەر پايدا بولدى. ولار كومپوزيتور يگور كرۋتويدىڭ لارا فابيان ورىنداعان تانىمال اندەرى ەدى. ارينە، كرۋتويدىڭ «ليۋبوۆ ۋستاۆشيح لەبەدەي» ءانى تاماشا ءان، ديماشتىڭ ورىنداۋىندا ءتىپتى كەرەمەت. بىراق جاڭا ءان ەمەس...

قاراپ تۇرساق، ديماشتىڭ رەپەرتۋارىنا قاتىستى پىكىر ايتقان، ءان ونەرىندە ورنى بار تۇلعالاردىڭ ءبارىنىڭ پىكىرى ءبىر ماسەلەگە سايادى: «ديماش ءوزىن الەمگە ءانشى رەتىندە تانىتتى، ەندى ونىڭ ءوزىنىڭ حيت اندەرى بولعانى دۇرىس».

راس ديماشتىڭ رەپەرتۋارىندا «ۇمىتىلماس كۇن»، «ماحاببات بەر ماعان» سەكىلدى ءبىردى-ەكىلى قازاقشا جاڭا اندەر بار، بىراق ولار اتى الەمگە بەلگىلى ءانشىنىڭ دارەجەسىنە ساي دەي المايمىز. ال حيت اندەردى كىم جازادى؟ راسىمەن حيت ءان ماڭىزدى ما؟

ارينە ماڭىزدى. تۇركيالىق تاركان، يراندىق اراش سەكىلدى الەم بىلەتىن انشىلەردى تانىمال ەتكەن ولاردىڭ حيت اندەرى بولاتىن. ەندەشە نەگە ءبىزدىڭ ديماشقا ءوز تىلىندە جاڭا باعىتتاعى، الەم تىڭدايتىن ەرەكشە اندەر جازباسقا؟ راسىندا بىزدە ديماشتىڭ تالانتىنا ساي ءان جازىپ بەرە الاتىن

ۇلتتىڭ نامىستى كومپوزيتورلارى جوق پا؟

تۇسىنە بىلگەن كومپوزيتورلارعا ديماش قۇدايبەرگەن – قۇدايدىڭ بەرە سالعان سىيى ەمەس پە؟ كەرەمەت ءان جازساڭ، الەمگە سول ساتىندە الىپ شىعاتىن ءانشى تۇرعاندا، ءبىزدىڭ كومپوزيتورلاردىڭ ۇنسىزدىگى قالاي؟

الەمگە تانىلعان اندەر دەگەندە ەسىمىزگە تۇسەتىن انشىلەر مەن كومپوزيتورلار جوق ەمەس. كەزىندە روزا رىمباەۆانى الەمگە الىپ شىققان كومپوزيتورلار بولىپ ەدى عوي! روزا 1977 جىلى بولگاريادا وتكەن «زولوتوي ورفەي» فەستيۆالى مەن 1986 جىلى تۇركيادا وتكەن «التىن ميكروفون» ءان سايىسىندا باس جۇلدە العاندا، سەيدوللا بايتەرەكوۆ، كەڭەس دۇيسەكەەۆ

سەكىلدى كومپوزيتورلارىمىزدىڭ اندەرىن ورىنداپ، شاشاسىنا شاڭ جۇقتىرماي – الاماننىڭ الدىندا كەلگەن جوق پا ەدى؟ قازىر سول ءداستۇر ءۇزىلىپ قالدى دەگەنگە كىم سەنەدى؟

مىڭ جەردەن ءانشى بولعانىمەن ءانشىنىڭ تالانتىن اشىپ، ونىڭ مۇمكىندىگىن كورسەتۋگە ۇلكەن اسەرى تيەتىن – كومپوزيتورلار. بۇرىن ورىسشا اندەرىمەن عانا تانىلىپ جۇرگەن باتىرحان شۇكەنوۆكە «ساعىم دۇنيە»، «وتان-انا» اتتى ەكى تاماشا ءان جازىپ بەرىپ، ونى قازاقتىڭ ءتول انشىسىنە اينالدىرىپ جىبەرگەن كومپوزيتور قۋات شىلدەباەۆ ەمەس پە ەدى؟

ول اندەردى باتىرحاننىڭ ورىنداۋىندا وزگە جۇرتتىڭ وكىلدەرى دە سۇيسىنە تىڭداماۋشى ما ەدى؟ سول سياقتى، نەبىر كەرەمەت كونكۋرستىق اندەر جازىپ، تالاي ءانشىنىڭ باعىن اشقان كومپوزيتور بەيبىت ورالۇلى اعامىزدىڭ دا

ديماشتىڭ دياپازونىنا لايىق، حيت بولاتىن تاماشا ءان جازۋ قولىنان كەلمەيدى دەپ كىم ايتادى؟

قۇرمەتتى، ءوزىن قازاقتىڭ تالانتتى، نامىستى، پروفەسسيونال كومپوزيتورىمىن دەپ سانايتىن ازاماتتار!

كوز الدىمىزدا بولىپ جاتقان قۇبىلىستىڭ – قۇبىلىس ەكەنىنە ءمان بەرەيىك تە. ديماش سەكىلدى ءانشى عاسىردا ءبىر تۋى قيىن. ول – بىزگە بەرگەن اللانىڭ سىيى، ول ءانىن الەمگە تانىتام دەگەن كومپوزيتورلارعا كەرەمەت مۇمكىندىك. سىزدەردىڭ اندەرىڭىز الەمگە تانىلسا، كۇللى الەم «قازاق دەگەن قانداي تالانتتى حالىق» دەپ تاڭدانىپ، تامسانىپ جاتسا – ۇلتىمىزعا ابىروي، رۋحىمىزعا مەرەي ەمەس پە؟

ديماش ءوز كۇشى، ءوز تالانتىمەن الەمدى مويىنداتتى، ەندى وزىمەن بىرگە حالقىن دا مويىنداتۋ جولىندا تەر توگىپ جاتىر.

قازاق ءانى جاھاندى جالت قاراتىپ، سەنىڭ شىنىمەن دە ۇلى حالىقتىڭ ۇرپاعى ەكەنىڭدى تانىسىن دەسەڭىزدەر – ءان جازىڭىزدار.

ءوز ەلىنىڭ كومپوزيتورلارى قولداماي، وزگەنىڭ ءانىنىڭ مەرەيىن ءوسىرىپ جۇرگەن ديماشتاي دارىندى ۇلىمىزدىڭ قازاق پەرزەنتى رەتىندە ءاردايىم ەڭسەسى بيىك بولسىن دەسەڭىزدەر – ءان جازىڭىزدار!

ۇلت كومپوزيتورلارى ۇيالا بىلسە، ارمانىمىز ورىندالادى دەپ سەنگىمىز كەلەدى.

احمەت ومىرزاق

سوڭعى جاڭالىقتار