22 مامىر, 09:40 199 0 ەكولوگيا TURKYSTAN.KZ

جەتىسايدا پاۆلوۆنيا اعاشىنىڭ ارنايى تۇقىمباعى اشىلدى

تۇركىستان وبلىسى، جەتىساي اۋدانىندا 1 گەكتار اۋماق تۇقىمباققا پاۆلوۆنيا اعاشىن ءدان ارقىلى ءوسىرۋ ءىسى قولعا الىنىپ وتىر.

 

بيىل جەتىساي اۋدانىنىڭ اكىمى جامانتاي بەيسەنباەۆتىڭ باستاماسىمەن وڭىردەگى اۋداندىق، وبلىستىق، رەسپۋبليكالىق ماڭىزى بار كوشە بويلارىنا جانە قالا، كەنت، اۋىلدىق وكرۋگتەردە 40 مىڭنان استام تال وتىرعىزىلدى. سونىڭ 1 مىڭعا جۋىعىن  پاۆلوۆنيا كوشەتتەرى قۇراپ وتىر.

 

 

جالپى پاۆلوۆنيا اعاشى شىعىس ازيانىڭ تروپيكتىك ايماعىندا كوپتەپ كەزدەسەدى.  تابيعي جاعدايدا قىتايدا وسىرىلەدى. كۇنشىعىس ەلىندە بۇگىندە بۇل اعاشتىڭ 10-عا جۋىق ءتۇرى بار. بۇلاردىڭ بيىكتىگى 20 مەترگە جۋىقتايدى.  كوكتەمدە جاپىراقتارى بۇرشىك جارماس بۇرىن شىراعدان ءتارىزدى گۇلشوعىرى گۇلدەيدى. گۇلدەرى كۇلگىن-قىزعىلت ءتۇستى بولادى.

 

بۇدان باسقا، الداعى جىلى اۋداندا 1 گەكتار جەرگە ءزايتۇن اعاشىن وتىرعىزۋ جۇمىستارى باستالماق. قازىرگى تاڭدا 1 گەكتار اۋماققا  قاجەتتى ءزايتۇن كوشەتتەرى جىلىجايداعى قۇتىلارعا وتىرعىزىلىپ، ارنايى كۇتىپ-باپتاۋ جۇمىستارى اتقارىلۋدا. ماماندار بۇل ءزايتۇن كوشەتتەرىن كورشىلەس وزبەكستان رەسپۋبليكاسىنان الىپ كەلگەن.

سوڭعى جاڭالىقتار