22 مامىر, 16:18 304 0 ايماق TURKYSTAN.KZ

ومىرزاق شوكەەۆ يمامدارمەن كەزدەستى

تۇركىستان وبلىسىنىڭ اكىمى ومىرزاق شوكەەۆ اۋدان، قالالاردىڭ باس يمامدارىمەن كەزدەستى. باسقوسۋدا ءدىن سالاسى بويىنشا پىكىر الماسىپ، ءدىني تۇراقتىلىقتى نىعايتۋ ماسەلەلەرى تالقىلاندى.

ايماق باسشىسى ءدىن قىزمەتكەرلەرىنە قوعامداعى تىنىشتىقتى ساقتاۋدان بولەك، ءوڭىردىڭ رۋحانياتىن ارتتىرۋدى دا قولعا الۋ كەرەكتىگىن ايتتى.

«وبلىسىمىزدا ناسيحات جۇمىستارى جۇيەلى تۇردە ءجۇرۋ قاجەت. وڭىردەگى تۇراقتىلىق باستى نازاردا بولۋى ءتيىس. جات اعىمدارمەن كۇرەس جۇمىستارى تولاستاماۋ كەرەك. جالپى العاندا، تۇركىستان – ءىلىمنىڭ، ءدىننىڭ، تاريحتىڭ ورتالىعىنا اينالا بەرمەك. بۇدان وزگە، يمامدار بابامىز ق.ا.ياساۋي تۋرالى بىلىمدەرىن جەتىلدىرىپ، ازاماتتارعا سول تۋرالى ءتۇسىندىرۋ جۇمىستارىن جۇرگىزىپ وتىرۋى ابزال. سەبەبى، ياساۋيدىڭ تاريحىن كەسەنەگە كەلگەن زيارات ەتۋشىلەردىڭ ءبىرى بىلسە، ءبىرى بىلە بەرمەيدى. رۋحاني ازىق الۋدا حالىق كوبىنە سىزدەرگە جۇگىنەدى»، – دەدى ومىرزاق ەستايۇلى.  

ءوز كەزەگىندە يمامدار ءدىن سالاسىنداعى اتقارىلىپ جاتقان جۇمىستار تۋرالى جانە بىرقاتار ماسەلەلەر مەن ۇسىنىستارىن جەتكىزدى. قمدب  توراعاسىنىڭ ورىنباسارى، نايب ءمۇفتي الاۋ ادىلباەۆتىڭ ايتۋىنشا، قازىر باسقارما 4 نەگىزگى باعىت بويىنشا جۇمىس ىستەيدى.

«ءدىني باسقارمانىڭ نەگىزگى باعىتتارى: ۋاعىز-ناسيحات، وقۋ-اعارتۋ، قايىرىمدىلىق، جات اعىمدارمەن كۇرەس جۇمىستارى. ماسەلەن، «ءاربىر جۇما كۇنى بارلىق مەشىتتەردە مۋفتيات بەكىتكەن تاقىرىپ بويىنشا ۋاعىز-ناسيحات جۇمىستارى جۇرەدى. يمامدارىمىز ۇدايى بىلىكتىلىكتەرىن ارتتىرىپ تۇرادى. ءدىني باسقارما قايىرىمدىلىق شارالارىن ءجيى ۇيىمداستىرىپ كەلەدى. ماسەلەن، تۇركىستان وبلىسىندا وتكەن جىلى از قامتاماسىز ەتىلگەن 12 وتباسىعا پاتەر تابىستالدى. ال، جات اعىمدارمەن كۇرەس بويىنشا كوپشىلىك قاۋىمعا ناسيحات تولاستاعان ەمەس. قوعامداعى ءدىني تۇراقتىلىقتى نىعايتۋ ماقساتىندا وڭىردەگى مەشىتتەردە جانە تۇزەتۋ مەكەمەلەرىندە 2500-دەن استام كەزدەسۋ ۇيىمداستىرىلىپ، وندا 100 مىنان اسا ادام قامتىلدى»، – دەدى الاۋ شايقىمۇلى.

سونداي-اق، جيىن بارىسىندا ءوڭىرىمىزدىڭ كەيبىر ەلدىمەكەندەرىندە مامانداردىڭ جەتىسپەۋشىلىگى سەزىلىپ جاتقانى ايتىلدى. بۇل ماسەلەنى يمامدار الەۋمەتتىك ماسەلەلەرمەن بايلانىستىرادى.

جيىندى قورىتىندىلاعان ايماق باسشىسى اتالعان ماسەلەلەردى وڭدى شەشۋ ءۇشىن ءتيىستى شارالار قولعا الىناتىنىن ايتتى. ياعني، يمامدارعا پاتەر جانە ولارعا جالاقى بەرۋ ماسەلەسى قارالماق. سونداي-اق، قالتالى ازاماتتارعا حالىققا قاجەتتى الەۋمەتتىك نىسانداردى سالىپ بەرۋ دە ساۋاپتى ىسكە جاتاتىندىعىن اتاپ ءوتتى.

سوڭعى جاڭالىقتار