21 مامىر, 15:30 435 0 ىشكى ساياسات TURKYSTAN.KZ

قانات اۋەسباي جاڭا قىزمەتكە تاعايىندالدى

بەلگىلى جۋرناليست قانات اۋەسباي «قازاقستان» رەسپۋبليكالىق تەلەراديوكورپوراتسياسى» اق اتىراۋ وبلىستىق فيليالىنىڭ ديرەكتورى قىزمەتىنە تاعايىندالدى.

قانات اۋەسباي ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىن «حالىقارالىق جۋرناليستيكا» ماماندىعى بويىنشا ءتامامدادى (1999-2004 جج.). ءال-فارابي اتىنداعى قازۇۋ اسپيرانتۋراسىن ءبىتىرىپ، 2010 جىلى «قازاق تەلەارنالارىنداعى اقپاراتتىق باعدارلامالار تابيعاتى» تاقىرىبىندا كانديداتتىق ديسسەرتاتسيا قورعادى، فيلولوگيا عىلىمدارىنىڭ كانديداتى.

قر پرەزيدەنتىنىڭ حالىقارالىق «بولاشاق» ستيپەندياسىنىڭ ستيپەنديانتى. 2013-2014 جج. ۇلىبريتانيانىڭ نورۆيچ قالاسىنداعى شىعىس انگليا ۋنيۆەرسيتەتىندە وقىدى (University of East Anglia, Norwich). 2016 جىلى قازاق ەكونوميكا، قارجى جانە حالىقارالىق ساۋدا ۋنيۆەرسيتەتىن «ەكونوميكا» ماماندىعى بويىنشا بىتىرگەن.

قىزمەت جولىن ول 2002 جىلى «تۇركىستان» حالىقارالىق گازەتىنىڭ ءتىلشىسى بولىپ باستاعان. ءار جىلدارى «31» ارنانىڭ «ينفورمبيۋرو» جاڭالىق قىزمەتىنىڭ ءتىلشىسى، «قازاقستان» ۇلتتىق ارناسىنىڭ اقپاراتتىق-ساراپتامالىق باعدارلامالار ديرەكتسياسىندا (اسبد)  ءتىلشى، اعا ءتىلشى، رەداكتور-ساراپشى، قازاقستان پرەزيدەنتىنىڭ جۋرناليستىك پۋل ءتىلشىسى، «اپتا.kz» اقپاراتتىق-ساراپتامالىق باعدارلاماسىنىڭ شەف-رەداكتورى، جۇرگىزۋشىسى، «قازاقستان 2050» جالپىۇلتتىق قوزعالىسىنىڭ مەديا-ديرەكتورى، «BNews» اقپارات پورتالىنىڭ ساراپشىسى بولدى. 2018 جىلدان  قازاقستان رەسپۋبليكاسىنىڭ تۇڭعىش پرەزيدەنتى-ەلباسى كىتاپحاناسىنىڭ ءباسپاسوز قىزمەتىنىڭ اعا ساراپشىسى، «Astana» ارناسىندا «Ruh.kz» توك-شوۋىنىڭ جۇرگىزۋشىسى، ستسەناريستى بولدى. 2011 جىلدان بەرى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ جۋرناليستيكا جانە ساياساتتانۋ فاكۋلتەتىنىڭ دوتسەنتى.

قانات اۋەسباي ەڭبەك جولىندا ءتۇرلى ماراپاتقا يە بولدى: قر بايلانىس جانە اقپارات مينيسترلىگىنىڭ «قازاقستاننىڭ گۇلدەنۋىنە ارنالعان  ۇزدىك تەلەجوبا» ديپلومى (2011 ج.), قازاقستان جۋرناليستەر وداعى سىيلىعىنىڭ لاۋرەاتى (2011 ج.), قازاقستان جاستار وداعى «سەرپەر» سىيلىعىنىڭ لاۋرەاتى (2013 ج.), «نۇر وتان» پارتياسىنىڭ باق وكىلدەرىنە ارنالعان «نۇر سۇڭقار» رەسپۋبليكالىق بايقاۋىنىڭ  «كوزقاراس» اتالىمىنداعى جەڭىمپازى (2016 ج.), قر اقپارات جانە كوممۋنيكاتسيالار مينيسترلىگىنىڭ «اقپارات سالاسىنىڭ ۇزدىگى» توسبەلگىسىمەن ماراپاتتالعان (2017 ج.). قر پرەزيدەنتى جانىنداعى جاستار ساياساتى جونىندەگى كەڭەس مۇشەسى، قازاقستان باس رەداكتورلارى كلۋبىنىڭ مۇشەسى، قر پرەزيدەنتىنىڭ حالىقارالىق «بولاشاق» ستيپەندياسى ستيپەنديانتتارى قاۋىمداستىعىنىڭ مۇشەسى، قازاقستان پەداگوگيكالىق عىلىمدار اكادەمياسىنىڭ كوررەسپوندەنت-مۇشەسى.

«قازاقستان» رترك» اق - «Qazaqstan» ۇلتتىق تەلەارناسى، «Balapan»، «Qazsport»، «Tamasha TV» تەلەارنالارى، «Qazaq radiosy»، «Shalqar»، «Astana»، «Classic» راديولارىن جانە 14 ايماقتىق تەلەراديوكومپانيالاردى بىرىكتىرەتىن ەلىمىزدەگى ەڭ ءىرى مەديا-قۇرىلىم.

رەسپۋبليكالىق تەلەراديوكورپوراتسياعا 2019 جىلعى  ساۋىردەن باستاپ ءلاززات تانىسباي باسشىلىق ەتەدى.

سوڭعى جاڭالىقتار