20 مامىر, 17:21 382 0 تەحنولوگيالار دينارا مىڭجاسارقىزى

«اسار» ءداستۇرىن جاڭعىرتۋ قاجەت

قوستانايدا ءوتىپ جاتقان قازاقستان-رەسەي جاستارىنىڭ فورۋمىندا قر اقپارات جانە قوعامدىق دامۋ ءمينيسترى داۋرەن اباەۆ ءسوز سويلەدى، دەپ حابارلايدى قازاقپارات.

مينيستر اتالعان فورۋمنىڭ تاجىريبە الماسۋعا جانە ەكى ەل اراسىنداعى ىنتىماقتاستىق پەن دوستىقتى نىعايتۋ ماسەلەلەرىن تالقىلاۋعا قىزمەت ەتەتىنىنە سەنىم ءبىلدىردى. «2019 جىل ەلىمىزدە جاستار جىلى دەپ جاريالاندى جانە وسىنىڭ ارقاسىندا ءبىز جاستاردىڭ قاتىسۋىمەن اۋقىمدى ءىس-شارالار وتكىزىپ كەلەمىز. ماعان ءار جەردە وسى جاستار جىلىنا قاتىستى سۇراقتاردى قويىپ جاتادى. راسىمەن دە جاستار جىلىنىڭ مىندەتى قانداي بولماق؟ مەملەكەت جاستاردى قولدايدى ما، ارينە، قولدايدى. كەرىسىنشە، تاۋەلسىزدىك العان جىلداردان باستاپ جاستار ەل ساياساتىنىڭ بەل ورتاسىندا ءجۇردى. ءتىپتى، قيىندىعى مول توقسانىنشى جىلدارى ەلباسى «بولاشاق» باعدارلاماسىن اشىپ، جاستارعا جول اشتى. قازىر وسى باعدارلامامەن وقىپ كەلگەن جاستار ەلدىڭ ءار تۇكپىرىندە جەمىستى ەڭبەك ەتىپ جاتىر. بۇل سىزدەرگە ۇلگى بولۋى ءتيىس»، - دەدى مينيستر. داۋرەن اباەۆ جاستار جىلى اتقارىلاتىن جۇمىستاردىڭ اۋقىمدىلىعىنا توقتالدى. ونىڭ ايتۋىنشا، وسى جىلى جاستاردى جۇمىسپەن قامتۋ، ولارعا تۇرعىن ءۇي جەڭىلدىگىن بەرۋ سىندى ىرگەلى جوبالار قولعا الىندى. «جاستار جىلىنىڭ ميسسياسى بارىنشا اۋقىمدى، ول جاستار ساياساتىنىڭ ءتۇرلى تاسىلدەرىن، قاعيداتتارىن جۇيەلى تۇردە ترانسفورماتسيالاۋدان تۇرادى. بۇل دەگەن نە؟ ءبىز ساندىق تەحنولوگيالاردىڭ جاڭا داۋىرىنە ەندىك جانە وسى وزگەرىستەردىڭ باستى ءرولىن جاستار اتقاراتىن بولادى. مەملەكەت وسىعان جاعداي جاسايدى. قازىر ءار سالادا وزگەرىس بار. ەسكى تۇجىرىمدامالاردىڭ ۋاقىتى ءوتتى. جاستار جىلىندا جاڭا جوبالار، ءتيىمدى باستالامالار ومىرگە كەلۋى ءتيىس»، - دەپ ءتۇسىندىردى د.اباەۆ فورۋم بارىسىندا.

مينيستر ەرىكتىلىك جوبالارىن قولدايتىنىن جەتكىزدى. سەبەبى، بۇگىندە قوعامنىڭ جۇيەلى تۇردە دامۋى ءۇشىن دە ەرىكتىلەر قاجەت. «ولار ءوز ويلارىن اشىق ايتا الادى. ماسەلەن، ۇلتىمىزدا «اسار» دەگەن ادەمى ءداستۇر بار. مۇنىڭ ماعىناسى تەرەڭدە جاتىر. كەز كەلگەن ادامعا كوپ بولىپ، جۇمىلا كومەكتەسۋ قاي زاماندا دا بولعان. وسى ءۇردىستى توقتاتىپ الماۋىمىز كەرەك»، - دەپ ءتۇيدى داۋرەن اباەۆ. ايتا كەتەيىك، بۇگىن قوستانايدا قازاقستان مەن رەسەي جاستارىنىڭ ىنتىماقتاستىق فورۋمى باستالدى.

سوڭعى جاڭالىقتار