20 مامىر 2019, 12:40 930 0 زاڭ دينارا مىڭجاسارقىزى

كوپبالالى وتباسىلارعا – 500 مىڭ تەڭگە

تۇركىستان وبلىسىندا ءوز كاسىبىن اشقان كوپبالالى وتباسىلارعا قايتارىمسىز 500 مىڭ تەڭگە گرانت بەرىلەدى. ەلباسىنىڭ جاڭا باستامالارىنا سايكەس، وبلىستا ارنايى شتاب قۇرىلىپ، ءاربىر وتباسىعا ۇيمە-ءۇي ارالاۋ ارقىلى الەۋمەتتىك كارتا جاسالىندى. الەۋمەتتىك كارتا بويىنشا وبلىستاعى 86,6 مىڭ كوپبالالى وتباسىنىڭ 19 مىڭى تۇرمىسى تومەندەر قاتارىنا ەنگىزىلدى. بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە وبلىس اكىمىنىڭ ورىنباسارى ەربول سادىر مالىمدەدى، دەپ جازدى otyrar.kz.

«بۇگىنگى تاڭدا 24 748 وتباسىعا اتاۋلى الەۋمەتتىك كومەك تاعايىندالىپ، 21 608 وتباسىعا 4,7 ميلليارد تەڭگە تولەندى. سونىمەن قاتار، 1 توقساندا كومەك مولشەرى قايتا قارالىپ، 15 422 وتباسىعا كوبەيگەن مولشەردە اتاۋلى الەۋمەتتىك كومەك تولەندى»، — دەدى ەربول ءابىلحايىرۇلى.

وسى جىلى ەنگەن وزگەرىستەرگە بايلانىستى شارتتى اقشالاي كومەكتى 12 ايعا، شارتسىز اقشالاي كومەكتى 6 ايعا تاعايىنداۋ كوزدەلىپ وتىر. ءبىر وتباسىعا اتاۋلى الەۋمەتتىك كومەكتىڭ ايلىق مولشەرى ورتا ەسەپپەن 100-150 مىڭ تەڭگەنى، جىلدىق مولشەرى 1,8 – 2 ميلليون تەڭگەنى قۇرايدى. وسى قوماقتى قارجىنى ءتيىمدى پايدالانۋ ءۇشىن تۇرمىسى تومەن ازاماتتاردى كاسىپكەرلىككە تارتۋ جۇمىستارى جۇرگىزىلىپ جاتىر.

«ناتيجەسىندە 2019 جىلدىڭ 1 توقسانىندا 400-گە جۋىق وتباسى ءوز ءىسىن اشتى. «اتامەكەن» ۇلتتىق كاسىپكەرلەر پالاتاسىمەن بىرلەسىپ «ەڭبەك» مەملەكەتتىك باعدارلاماسىنا ءتيىستى وزگەرىستەر ەنگىزىلگەننەن كەيىن كوپبالالى وتباسىلارعا قوسىمشا قايتارىمسىز 500 مىڭ تەڭگە مەملەكەتتىك گرانت بەرىلەدى»، — دەدى وبلىس اكىمىنىڭ ورىنباسارى.

بۇگىنگى تاڭدا وبلىستا كوپبالالى وتباسىلارعا «ىرىس» ميكروقارجى ۇيىمى ارقىلى ءبىر پايىزدىق 2 ميلليون تەڭگەگە دەيىنگى جەڭىلدەتىلگەن شاعىن كرەديت بەرىلىپ جاتىر. وسى ماقساتقا 100 ميلليون تەڭگە قارجى ءبولىندى.

بۇدان بولەك 2019 جىلى رەسپۋبليكالىق بيۋدجەت ەسەبىنەن 1248 وتباسىنى تۇرعىن ۇيمەن قامتاماسىز ەتۋ جوسپارلانعان. كوپبالالى وتباسىلاردى تۇرعىن ۇيمەن قامتاماسىز ەتۋ جۇمىستارى دەمەۋشىلەر ەسەبىنەن دە جۇرگىزىلۋدە. بيىل دەمەۋشىلەر تاراپىنان 18 كوپبالالى وتباسى باسپانالى بولدى.

سوڭعى جاڭالىقتار