17 مامىر 2019, 15:21 688 0 دەنساۋلىق اسەل انۋاربەك

ءبىر ايدا 40 مىڭنان استام الماتىلىق تەگىن ءدارى العانىن راستادى 

سوڭعى 4 اپتادا تەگىن ءدارى-دارمەك بەرۋ پروتسەسىن باقىلاۋ شەڭبەرىندە الماتى بويىنشا 40 753 SMS-حابارلاما جىبەرىلدى. بۇل تۋرالى «الەۋمەتتىك مەديتسينالىق ساقتاندىرۋ قورى» كەاق قالالىق فيليالى حابارلادى.

ءباسپاسوز قىزمەتىنىڭ مالىمەتىنشە، SMS دەنساۋلىق ساقتاۋ سالاسىنداعى اقپاراتتىق جۇيەلەرگە مەملەكەتتىك تاپسىرىس (كەپىلدەندىرىلگەن تەگىن مەديتسينالىق كومەك – تمككك) شەڭبەرىندە تەگىن ءدارى-دارمەك العاندار رەتىندە ەنگىزىلگەن پاتسيەنتتەرگە جولدانعان.

حابارلامادا رەتسەپتىنىڭ ءنومىرى مەن ءدارىنىڭ بەرىلگەن كۇنى كورسەتىلەدى. پرەپاراتتار شىن مانىندە قولىنا تيمەگەن پاتسيەنتتەر SMS-حابارلاماعا جاۋاپ رەتىندە «0» تسيفرىن جولداي الادى نەمەسە «سق-فارماتسيا» جشس-ءنىڭ 1439 بايلانىس نومىرىنە قوڭىراۋ شالسا بولادى. قوڭىراۋ شالۋ دا، SMS تە – تەگىن.

«ءدارى-دارمەكتى تولىق المادىم دەپ جاۋاپ قايتارعان پاتسيەنتتەردىڭ جالپى سانى 100-گە جۋىقتايدى. بۇل زاڭ بۇزۋشىلىق دەڭگەيىنىڭ جوعارى ەمەستىگىن كورسەتەدى»، دەلىنگەن حابارلامادا.

بيىل وڭتۇستىك استانا تۇرعىندارىن تەگىن دارىمەن قامتاماسىز ەتۋگە بولىنگەن قارجى كولەمى 15 ملرد تەڭگەدەن اسىپ جىعىلادى.

ەستەرىڭىزگە سالا كەتسەك، مەديتسينالىق ساقتاندىرۋ قورى بىلتىردان باستاپ كەپىلدەندىرىلگەن تەگىن كومەك پاكەتى شەڭبەرىندە بەرىلەتىن ءدارى-دارمەك پەن مەديتسينا بۇيىمدارىنا اقى تولەۋ ءتارتىبىن وزگەرتكەن بولاتىن. جاڭا ءتارتىپ بويىنشا، ءدارى قولما-قول بەرىلگەن جانە «ءدارى-دارمەكپەن قامتاماسىز ەتۋ» اقپاراتتىق جۇيەسىنە ءدارىنىڭ بەرىلگەنى تۋرالى بەلگى سوعىلعان رەتسەپتىلەرگە عانا اقى تولەنۋى ءتيىس.

تەگىن ءدارى-دارمەك بەرۋ پروتسەسىن باقىلاۋ جوباسىن قر دەنساۋلىق ساقتاۋ مينيسترلىگى، مەديتسينالىق ساقتاندىرۋ قورى مەن «سق-فارماتسيا» جشس بىرلەسىپ قولعا العان بولاتىن.

سوڭعى جاڭالىقتار