17 مامىر 2019, 13:43 804 0 سىرتقى ساياسات دينارا مىڭجاسارقىزى

قىرعىزستان ەكس-پرەزيدەنتتەردى جاۋاپقا تارتپاق

16 مامىردا قىرعىزستان پرەزيدەنتى سوورونباي جەەنبەكوۆ "قىرعىزستان پرەزيدەنتىنىڭ قىزمەتىنە كەپىلدىك بەرۋ تۋرالى" زاڭعا وزگەرىستەر ەنگىزۋ تۋرالى زاڭعا قول قويدى. بۇل تۋرالى قىرعىزستان پرەزيدەنتىنىڭ اپپاراتى حابارلادى.

قۇجات اۆتورلارى كۋرمانكۋل زۋلۋشەۆ پەن يسحاك ماساليەۆ بىلتىر جەلتوقساندا "قىرعىزستان پرەزيدەنتىنىڭ قىزمەتىنە كەپىلدىك بەرۋ تۋرالى" زاڭداعى ەكس-پرەزيدەنتتىڭ تيىسپەۋشىلىك مارتەبەسى تۋرالى جازىلعان نورمانى الىپ تاستاۋدى ۇسىنعان.

بىراق ەكىنشى وقىلىم كەزىندە پارلامەنت بۇل نورمانى الىپ تاستاماي، تەك جاۋاپقا تارتۋ مەحانيزمدەرىن جەتىلدىرۋ تۋرالى شەشىم قابىلداعان. بۇل جوباعا سايكەس، جوگوركۋ كەڭەش باستاپ، باس پروكۋرور راستاعان اسا اۋىر قىلمىس جاسادى دەگەن ايىپ تاعىلعان سوڭ ەكس-پرەزيدەنت ءوز ستاتۋىسىنان ايىرىلىپ، جاۋاپقا تارتىلۋى مۇمكىن.

سونداي-اق، زاڭ جوباسىنىڭ 11-بابىنا سايكەس، ەكس-پرەزيدەنت مەملەكەتتىك بيلىك ورگاندارىندا ساياسي، ارناۋلى مەملەكەتتىك لاۋازىمداردى اتقارماۋى ءتيىس، ساياسي پارتيالاردا باسشىلىق قىزمەتتە ىستەپ نە ونىڭ قىزمەتىنە ارالاسپاۋعا مىندەتتى. ەكس-پرەزيدەنت وسى ەرەجەلەردى بۇزسا، باس پروكۋروردىڭ ۇسىنۋىمەن، پرەزيدەنت اكتىسىمەن وعان بەرىلگەن كەپىلدىكتەردىڭ كۇشى جويىلىپ، بۇرىنعى پرەزيدەنتتى رەسپۋبليكالىق بيۋدجەت قاراجاتى ەسەبىنەن ماتەريالدىق نە باسقا دا جاعدايلارمەن قامتاماسىز ەتۋ توقتاتىلادى.

زاڭعا وزگەرىس ەنگىزۋ تۋرالى تالقى المازبەك اتامباەۆتىڭ بىشكەك تەتس-ءىن مودەرنيزاتسيالاۋعا تىكەلەي قاتىسى بارى تۋرالى مالىمدەمەدەن كەيىن كۇشەيگەن. قىرعىزستان قۇقىق قورعاۋ ورگاندار "تەتس-ءتى مودەرنيزاتسيالاۋ كەزىندە سىبايلاس جەمقورلىق قىلمىسى بولعان" دەپ كۇدىكتەنەدى. اتامباەۆ ايىپتى جوققا شىعارادى.

قىرعىزستاندا روزا وتۋنباەۆا جانە المازبەك اتامباەۆتىڭ ەكس-پرەزيدەنت دەگەن مارتەبەسى بار. العاشقى ەكى پرەزيدەنت اسقار اقاەۆ پەن قۇرمانبەك باكيەۆ حالىق تولقۋلارى ناتيجەسىندە بيلىكتەن كەتىپ، ەكس-پرەزيدەنت مارتەبەسىن الا الماعان.

سوڭعى جاڭالىقتار