17 مامىر 2019, 12:53 581 0 قاۋىپسىزدىك دينارا مىڭجاسارقىزى

الماتى ماڭىنداعى ورتكە ورانعان قوقىس پوليگونى

قوقىس پوليگونىنداعى ءورتتى سوندىرۋگە 2 تىكۇشاق جۇمىلدىرىلدى. قر ءىىم تجك الماتى ماڭىنداعى قوقىس پوليگونىنداعى ءورتتى ءسوندىرۋ جۇمىستارى تۋرالى ايتتى. كۇنى كەشە قر ءىىم توتەنشە جاعدايلار كوميتەتىنىڭ توراعاسى ۆلاديمير بەككەر قوقىس پوليگونىنداعى ءورتتى سوندىرۋگە اۆياتەحنيكانىڭ كومەكتەسە المايتىنىن ايتقان ەدى.

الايدا ءتىلسىز جاۋ تۋىنداتقان ماسەلەنى جۇيەلى شەشۋ ءۇشىن بۇگىن كوككە ەكى تىكۇشاقتىڭ كوتەرىلگەنى بەلگىلىلى بولدى. «الماتى ماڭىندا قوقىس پوليگونىنداعى ءورتتى ءسوندىرۋ جۇمىستارىنا قازىرگى ۋقاىتتا اۆتوتسيستەرنالار، سۋ تاسۋشى تەحنيكالار مەن ارنايى تەحنيكالار جۇمىلدىرىلۋدا. ءسوندىرۋ جۇمىستارى 17 مامىر كۇنى ساعات 03.00-كە دەيىن سوزىلىپ، 3 ساعاتتان كەيىن قايتادان (ساعات 06.00-دا) جالعاستى»، – دەپ حابارلايدى تجك ءباسپاسوز قىزمەتىنەن. قازىرگى ۋاقىتتا تۇتانعان اۋماقتى پەريمەترى بويىنشا سۋمەن ءسوندىرۋ جانە توپىراقپەن جابۋ جۇمىستارى جۇرگىزىلۋدە. ساعات 07.00-دەن باستاپ ەكى تىكۇشاق 30 رەت كوككە كوتەرىلىپ، 90 تەكشە مەتر سۋ شاشقان.

سونىمەن بىرگە، جاعدايدى باقىلاۋدا ۇستاۋ ءۇشىن ماتريتسا-600 كۆادروكوپتەرى قولدانىلۋدا. ەسكە سالا كەتسەك، الماتى تۇرعىندارى تاڭنان بەرى قالا اسپانىن ىس پەن ءتۇتىن تورلاعانىن ايتىپ، شاعىمدانعان ەدى. الەۋمەتتىك جەلى قولدناۋشىلارىنىڭ بولجاۋىنشا، ءتۇتىن الماتى وبلىسىنداعى قوقىس پوليگونىنان كەلگەن.  توتەنشە جاعدايلار كوميتەتى بۇل اقپاراتتى راستادى. «16 مامىر كۇنگى تۇنگى ساعات 2:30-دا ورتكە قارسى قىزمەتكە قاراساي اۋدانىنا قاراستى ايتەي اۋىلىنان 7 شاقىرىم جەردە قوقىس پوليگونى جانىپ جاتقانى تۋرالى حابار تۇسكەن. قاتتى تۇرمىس قالدىقتاردان تۇتانعان ءورتتىڭ اۋماعى ءبىر گەكتاردى قامتىدى  دەگەن بولجام بار. قۇربان بولعان نەمەسە زارداپ شەككەندەر جوق» – دەلىنگەن  كوميتەتتىڭ مالىمەتىندە. دەسە دە، الماتى قالاسىنىڭ توتەنشە جاعدايلار دەپارتامەنتى قوقىس پوليگونىنداعى ءورت سالدارىنان شاھاردىڭ اۋاسى شەكتەن تىس لاستانعانى تۋرالى اقپاراتتىڭ شىندىققا جاناسپايتىنىن جەتكىزدى.

سوڭعى جاڭالىقتار