17 مامىر, 12:50 365 0 قوعام دينارا مىڭجاسارقىزى

تۇركىستاندا اۋەجايدى تۇرىكتەر سالادى

تۇركيا ينۆەستورلارى بيىل تۇركىستان قالاسىندا جاڭا اۋەجاي قۇرىلىسىن باستايدى. بۇل تۋرالى بۇگىن ەلوردادا استانا ەكونوميكالىق فورۋمى اياسىندا ءوتىپ جاتقان جاھاندىق ينۆەستيتسيا بويىنشا دوڭگەلەك ۇستەل بارىسىندا ايتىلدى. 

«تۇركىستان قالاسىندا تۇرىك ينۆەستورلارىنىڭ قاتىسۋىمەن جاڭا اۋەجايدىڭ قۇرىلىس جوباسى باستالعالى جاتىر. وسى ءىس-شارا بارىسىندا ينۆەستورمەن كەلىسىمگە قول قويۋدى جوسپارلاپ وتىرمىز. ەرتەڭ فورۋم اياقتالعاننان كەيىن بىردەن  تۇركىستان قالاسىنا بارۋ كوزدەلگەن. اكىمدىك دەڭگەيىندەگى ماسەلەلەردىڭ بارلىعى سول جەردە شەشىلۋى كەرەك. جاقىن ارادا، ياعني بيىل قۇرىلىس جۇمىسىن باستاۋ جوسپارلانعان»، - دەيدى «Kazakh Invest» ۇك» اق باسقارما توراعاسى ساپاربەك تۇياقباەۆ.

سونىمەن بىرگە، باسقارما توراعاسى قازاقستانعا تارتىلىپ جاتقان ينفەستيتسيا تۋرالى ءسوز قوزعادى. «وتكەن جىلدىڭ قورىتىندىسى بويىنشا، قازاقستانعا 24 ملرد-تان استام دوللار تىكەلەي ينۆەستيتسيا تارتىلعان بولاتىن. سوڭعى 2-3 جىلدى سالىستىرىپ قاراساڭىز، قازاقستانعا تارتىلعان تىكەلەي ينۆەستيتسيانىڭ كولەمى ءوسىپ كەلەدى. تاعى ءبىر ماڭىزدى نارسە - بۇرىنعى جاعدايدا ينۆەستيتسيانىڭ باسىم كولەمى مۇناي سالاسىنا تارتىلعان بولاتىن. وتكەن جىلى تارتىلعان ينۆەستيتسيالاردىڭ 45 پايىزى عانا مۇناي-گاز سالاسىنا قۇيىلعان. ياعني، جارتىسىنان استامى - باسقا سالاعا، كوممۋنيكاتسيا، كولىك، ينفراقۇرىلىم، ءوندىرىس، تاماق ونەركاسىبىنە تارتىلعان»، - دەيدى ول.

ەسكە سالا كەتسەك، كەشە ەلوردادا قر تۇڭعىش پرەزيدەنتى - ەلباسى نۇرسۇلتان نازارباەۆ پەن قر پرەزيدەنتى قاسىم-جومارت توقاەۆتىڭ قاتىسۋىمەن XII استانا ەكونوميكالىق فورۋمى باستالدى.   اەف-تىڭ باستى ماقساتى - جاھاندىق ۇردىستەردى زەرتتەۋ جانە قازاقستان دامۋىنىڭ پراكتيكالىق ساياساتىن جاساۋ ءۇشىن ەكونوميكالىق ساياسات پەن عىلىم سالاسىندا تاجىريبە الماسۋ الاڭىن قۇرۋ. 11 جىل ىشىندە استانا ەكونوميكالىق فورۋمى (اەف) الەمدىك ەكونوميكا مەن قارجى جۇيەسىن جەتىلدىرۋ جانە دامىتۋ ماسەلەلەرىن تالقىلاۋعا ارنالعان ەڭ بەدەلدى حالىقارالىق پلاتفورمالاردىڭ ءبىرى رەتىندە مارتەبەگە يە بولدى. فورۋمعا الەمنىڭ 150 ەلىنەن 50 مىڭعا جۋىق دەلەگات، ونىڭ ىشىندە 20-دان اسا نوبەل سىيلىعىنىڭ لاۋرەاتى جانە 30 جوعارى دارەجەلى شەتەلدىك ساياسي قايراتكەر قاتىسۋدا. كونگرەسس اياسىندا 20 ميلليارد اقش دوللارىنان استام سوماعا 300-دەن استام مەموراندۋم مەن كەلىسىم جاسالدى.

سوڭعى جاڭالىقتار