16 مامىر, 17:43 433 0 زاڭ دينارا مىڭجاسارقىزى

انالار تاعى نارازىلىققا شىقتى  

16 مامىردا نۇر-سۇلتان قالالىق اكىمدىگىنە قىرىققا جۋىق انا كەلىپ، باسپانا مەن جاردەماقى ماسەلەسىنە شاعىندى. نارازىلار اراسىندا كوپ بالالى، جالعىزىلىكتى جانە مۇگەدەك بالا باعىپ وتىرعاندار بار.

انالاردىڭ ايتۋىنشا، بيلىكتىڭ باسپانا ماسەلەسىن شەشۋ ءۇشىن ۇسىنعان باعدارلامالارى ءتيىمسىز. ولار ۇكىمەتتەن ءۇيدى العاشقى جارناسىز، بانك كوميسسياسىنسىز بەرۋدى سۇرايدى. باسپانا مەن اتاۋلى الەۋمەتتىك كومەك الۋ ءۇشىن قۇجات دايىنداعاندارىن ايتقان انالار كەدەرگىلەر كوپتىگىن دە ايتتى.

جينالعاندار وتكەن ايدا بالالارعا بەرىلەتىن جاردەماقىنى كوبەيتۋ، الەۋمەتتىك جەڭىلدىكتەر جاساۋ سياقتى ونداعان تالابىن جازىپ، قازاقستان پرەزيدەنتى قاسىم-جومارت توقاەۆ پەن پرەمەر-مينيستر اسقار مامينگە، پارلامەنت دەپۋتاتتارىنا حات جولداعان. اكىمدىككە جينالعان انالار وزدەرىنىڭ حاتى قايىرىلعان بيلىك وكىلدەرىنە ەمەس، ەڭبەك جانە حالىقتى الەۋمەتتىك قورعاۋ مينيسترلىگىنە جەتكەنىنە نارازى.

اكىمدىك الدىنا ساعات 10.30 شاماسىندا جينالعان انالارعا قالا اكىمى دە، ورىنباسارلارى دا شىقپاعان سوڭ نارازىلار استانا ەكونوميكالىق فورۋمى ءوتىپ جاتقان كونگرەسس ورتالىعىنا بەت الدى. نارازىلار فورۋمعا بارا جاتقان سوڭ اكىمدىك وكىلى شىعىپ، قالا اكىمى باقىت سۇلتانوۆتىڭ ورىنباسارلارى انالاردى كەزدەسۋگە شاقىرعانىن ايتتى. بىراق انالار "ولاردىڭ ەشتەڭە شەشپەيتىنىن" ايتىپ، اكىمدىككە قايتۋعا كەلىسكەن جوق.

كونگرەسس ورتالىعى الدىنا كەلگەن انالار باسپانا ماسەلەسى قاجىتقانىن ايتىپ شاعىندى. انالار "ەلباسى! ەلباسى!", "انا مەن بالا قۇقىعى قورعالسىن!" دەپ ايقايلادى. پوليتسيا مەن ارناۋلى جاساق قورشاۋعا العان نارازى انالارعا قالالىق پوليتسيا دەپارتامەنتىنىڭ وكىلى باقىتجان مالىباەۆ تاراۋعا شاقىردى.

باق انالار بارا جاتقان جيىنعا - استانا ەكونوميكالىق فورۋمىنا قازاقستان پرەزيدەنتى قاسىم-جومارت توقاەۆ پەن ەكس-پرەزيدەنت نۇرسۇلتان نازارباەۆ قاتىساتىنىن حابارلاعان.

2019 جىلى 4 اقپاندا استانانىڭ كوكتال-1 شاعىن اۋدانىنداعى شىڭعىستاۋ كوشەسىندە ورنالاسقان جەكە ءۇيدىڭ اۋلاسىنداعى ۋاقىتشا باسپانا ورتەنىپ، ءبىر وتباسىنداعى بەس بالا وپات بولعان. وسى وقيعادان كەيىن قازاقستاندا كوپ بالالى انالار نارازىلىعى كۇشەيگەن.

سوڭعى جاڭالىقتار