16 مامىر, 15:58 281 0 جاڭالىقتار "تۇركىستان" گازەتىنىڭ اۆتورلارى

جۇماحان ابدىقادىروۆ: ونەر ادامىنا جاراتۋشىباسقاشا ءبىر الەم سىيلاعان

مۇڭ اڭقىعان كۇرسىنىس وزەگىڭدى ورتەپ، كومەيىڭدى تىلگىلەيدى.

اۋىرلىعى قورعاسىنداي الاپات ويدىڭ ىشىندە سەندەلتكەن شيرەك عاسىر! ول مۇنى تاعدىردىڭ جازۋى دەيدى. بالكىم، سولاي دا شىعار. سوقپاقتى سىن مەن بۇرالاڭ جولدارى بار، سالماقتى جۇك پەن جاۋاپكەرشىلىككە تولى ونەر ولكەسىندە جۇرگەن جۇماحاندى پەشەنەسى وسىنشا جىل يىرىمىنە الدى.

بۇرىندارى نۇر شاشىپ تۇراتىن وتتى جانارى شاۋ تارتىپ، ويلى تۇڭعيىققا اينالعان با؟! وزەگىن ورتتەي جالماعان وي مەن الگى وكىنىش سامايداعى شاشتىڭ دا ءارىن الىپ، بۋرىلدانا تۇسكەن. الايدا، قاپساعاي دەنەلى، جۋان بىلەكتى، زور تۇلعالى «باتىر بايان» قالپىنان شوگە قويماپتى. قايسارلىعى بولسا كەرەك. وزىندەگى ۇمىتپەن ەرتەڭگى تاڭنان ساۋلە كۇتەدى. سول ءۇمىتى وزىنە ۇكىلى! ءالى-اق اياعىنان تىك تۇرىپ، ۇزەڭگىگە تابان تىرەرىنە، سول ونەردىڭ ءبىر پۇشپاعىن يلەۋىن جالعاستىراتىنىنا سەنىمدى.

جۋىردا عانا كونە تاراز شاھارىندا تۇراتىن اكتەر، قازاقستاننىڭ ەڭبەك سىڭىرگەن قايراتكەرى جۇماحان ابدىقادىروۆپەن تىلدەسكەن ەدىك. ونەر ولكەسىنىڭ بەلدى وكىلىمەن اماندىق-ساۋلىقتان كەيىن، اڭگىمەمىز ارىدەن باستاۋ العان.

– جۇماحان اعا، ازابى مەن ءلاززاتى مول، قيىندىعى مەن ماشاقاتى ماڭدايدان اساتىن ونەر ولكەسىنە قالاي كەلدىڭىز؟

– مەنىڭ تۋعان جەرىم كيە مەن قۇت دارىعان، تالانتتار مەن دارىندارعا قانات قاقتىرعان قاسيەتتى قاراتاۋ ولكەسى عوي. الايدا، اكەم دە، شەشەم دە قاراپايىم شارۋالار. انام مۇعالىم بولعان ەكەن. اكەم جاعىنان دا، انام جاعىنان دا ونەر ادامدارى بولماعان. شىنىن ايتۋ كەرەك. بىرەۋلەر «ماعان ونەر كيەسى ناعاشىمنان دارىعان، اتامنان دارىعان، پالەنشەمنەن دارىعان» دەپ ايتىپ جاتادى عوي. بىراق انامنىڭ ازداپ، اۋىل-ايماق اراسىنداعى توي-تومالاقتاردا ءان ايتىپ، دومبىرا شەرتەتىنى بار كورىنەدى. ول كىسى مەن ەس بىلمەي ومىردەن وزىپ كەتىپ ەدى، سوندىقتان ومىرىمدەگى اياۋلى جان جايلى اعايىنداردىڭ، اكەمنىڭ اۋزىنان عانا ەستىدىك قوي.

نەگىزى، و باستا، مەكتەپ قابىرعاسىن تامامداعان جىلى ءار ءتۇرلى ارماندادىق. بىرەۋ دارىگەر، بىرەۋ ينجەنەر، بىرەۋ باسقا ماماندىق يەسى بولۋدى ماقسات تۇتتى. مەن ۇشقىش بولۋدى قالاعان ەدىم. بىراق ءبىر دوسىم «ءارتىستىڭ وقۋىنا بار، ءارتىستىڭ ءومىرى قىزىق، ەل الدىندا جۇرەدى، اينالاسى تولعان سۇلۋ قىزدار، جۇرگەن جەرىڭ دۋمان-توي» دەپ، قالجىڭداي وتىرىپ، وي تاستادى. ول كەزدە ءبارىمىز دە سولاي ويلادىق. ونەر جولىنىڭ اۋىر ەكەنىن ول كەزدە قايدان بىلەيىك.

اۋىلىمىزدان ارمانىمىزدى ارقالاپ 4-5 جىگىت الماتىعا جول تارتتىق. ءوزىمىزدىڭ ولكەدەن ۇشقان تۇڭعىشباي اعامىز سول شاقتا قۇرمانعازى اتىنداعى الماتى كونسەرۆاتورياسى تەاتر فاكۋلتەتىنىڭ اكتەر بولىمىندە ءۇشىنشى كۋرستا وقيدى. ءبىز الىپ-ۇشىپ سول تۇڭعىشباي اعامىزعا بارامىز عوي، «اعا، ءارتىس بولايىق دەپ ەدىك» دەپ. اعامىز كۇلىپ، ونەر جولىنىڭ اۋىر ەكەنىن، قيىن ەكەنىن ايتىپ، «سەندەر ءوزى ويلاندىڭدار ما، تولعاندىڭدار ما جاقسىلاپ؟»، – دەيدى عوي.

ءبىزدىڭ قولىمىزدان نە ءان ايتۋ، نە دومبىرا تارتۋ كەلمەيدى، «ءوي، اعا، ۇيرەنەمىز»، – دەيمىز باسىمىزدى تومەن سالبىراتقان كۇيى.

سودان نە كەرەك، اعامىز ءبىزدى اپاردى دا اسقار توقپانوۆپەن تانىستىردى. تالپىنىسىمىزدىڭ، بويداعى سول ونەردىڭ ۇشقىنىنىڭ ارقاسىندا اۋپىرىمدەپ ءجۇرىپ، ءتيىستى كونكۋرستاردان ءوتىپ، كونسەرۆاتوريانىڭ ستۋدەنتى اتاندىق. ءسويتىپ العاشقى كۋرستا-اق اسقار توقپانوۆ اعامىزدىڭ كۋرسىنا ءتۇستىم، سونىمەن بىرگە سول اعامىزدىڭ تۋعان قىزى زەينەپ اسقارقىزىنان دا ءتالىمدى دارىستەر الدىم. باسقا دا جاۋاپتى پاندەردەن ونەردەگى بەلگىلى اكتەرلەردەن ءتالىم الىپ، ءتورت جىل ستۋدەنتتىك ءومىرىمىز ءوتتى.

وقۋ ورنىن تامامداعان سوڭ، وسى جامبىل وبلىستىق دراما تەاترىنا جولدامامەن كەلىپ، 1976 جىلدان جول اپاتىنا تۇسكەنگە دەيىن، ياعني 1994 جىلعا دەيىن سول قارا شاڭىراقتا ەڭبەك ەتتىم.

– ءسىزدى ءالى كۇنگە كورەرمەندەرىڭىز جۇماحان ابدىقادىروۆ ەمەس، «باتىر بايان» دەپ تانيدى. ءتىپتى، مەن دە وسى سۇحباتقا باتىرمەن وي ءبولىسىپ، سىرلاسسام دەپ دايىندالدىم ىشتەي. وسىنشالىقتى بولمىسىڭىزعا سىڭگەن بايان بەينەسى سىزگە قالاي بۇيىردى؟

– كەيدە اكتەرلەردىڭ وڭ جامباسىنا كەلە قالاتىن رولدەر بولادى. ەگەر سول وبرازدى ءساتتى سومداپ شىقسا، ول تولقۇجاتىنا اينالىپ، مارتەبەنىڭ وسۋىنە، كەڭىنەن تانىلۋعا ىقپال ەتەدى. ارينە، ول بىراق وڭاي ەمەس، ۇلكەن ەڭبەكپەن كەلەتىن دۇنيە. ونىڭ ۇستىنە كوپ شارۋا ۇجىمعا، قاسىڭداعى ارىپتەستەرگە دە بايلانىستى. مۇمكىن سونداي قاجەتتىلىكتىڭ ءبارى ىمداسىپ-جىمداسىپ، ءساتتى ۇيلەسكەندىكتەن شىعار، جۇرت مەنى سول كينوعا تۇسكەلى بەرى «باتىر بايان» اتاپ كەتتى.

ودان بۇرىن دا ءبىراز كينولاردا نەگىزگى كەيىپكەرلەردى سومدادىم. سماعۇل ەلۋباەۆتىڭ سوناۋ اشارشىلىق ناۋبەتى حاقىنداعى «اق بوز ءۇي» رومانىنىڭ جەلىسى بويىنشا تۇسىرىلگەن رەجيسسەر دامير مانابايدىڭ «سۇراپىل سۇرجەكەي» فيلمىندە نەگىزگى كەيىپكەرلەردىڭ ءبىرىن الىپ شىقتىم. ءتۇسىرىلىم جۇمىستارى ماڭعىستاۋ وڭىرىندە وتكەن سول فيلمدە حالىق ءارتىسى نۇرمۇحان جانتورينمەن بىرگە ەڭبەكتەندىم.

وسى جەردە مەنىڭ «باتىر بايان» فيلمىندە باستى ءرولدى سومداۋىما، قازاق كينوسى تاريحىندا ەسىمىمنىڭ قالۋىنا سەبەپكەر بولعان ءبىر ازاماتقا جۇرەكجاردى العىسىمدى ايتۋعا ءتيىسپىن. ول – مەنەن كەيىن قۇرمانعازى اتىنداعى مەملەكەتتىك كونسەرۆاتوريانىڭ اكتەر ءبولىمىن اياقتاعان، سودان كەيىن شىمكەنت قالاسىنداعى ج.شانين اتىنداعى قازاق دراما تەاترىندا جەمىستى ەڭبەك ەتكەن، ءومىرىنىڭ سوڭىنا دەيىن قازىرگى تۇركىستان وبلىستىق تەلەراديو كومپانياسىندا رەجيسسەر قىزمەتىن اتقارعان بىلىكتى مامان ارىستان وتارباەۆ. كەيىن، 1993 جىلى الماتىعا شاقىرتۋ الدىم. «باتىر بايان» كينوسىنا ىرىكتەۋ ءجۇرىپ جاتىر ەكەن. ول كەزدە كينوبايقاۋ دەيتىن، بۇرىنعى ەڭبەكتەرىممەن تانىس شىعارماشىلىق توپ جەتەكشىلەرى مەنى بايان باتىردىڭ بەينەسىنە بەكىتىپ قويىپتى. رەجيسسەر يسلامبەك تاۋەكەلوۆپەن دە سول جەردە تانىستىم.

كينوداعى ءىنىم نويان مەن قالماق قىزىنىڭ رولىنە لايىقتى ونەر يەلەرى تاڭدالعان سوڭ، كوپ ۇزاماي كوكشەتاۋ وڭىرىندە، بۋراباي باۋرايىندا ءتۇسىرىلىم باستالىپ، بار-جوعى ءۇش ايدا كينو كورەرمەنگە جول تارتىپ كەتتى.

– ايتپاقشى، بۇل كينوعا تۇسپەي تۇرىپ، ستسەناري جەلىسىنە ارقاۋ بولعان اقىن ماعجان جۇماباەۆتىڭ «باتىر بايان» پوەماسىن وقىپ پا ەدىڭىز؟

– جوق. مەن – وتىرىك ايتا المايتىن اداممىن. بۇل بۇرىن مەن وقىعان پوەمام ەمەس-تۇعىن. ءتىپتى، ماعجان جۇماباەۆتىڭ كىم ەكەنىن دە ءالسىن-ءالسىن عانا بىلەتىنمىن. ونىڭ سەبەبى دە بار. ءبىزدىڭ شاعىمىزدا الاش ارىستارىنىڭ شىعارمالارى تۇگىلى، اتتارى دا اتالمايتىن. اتالعاننىڭ وزىندە «حالىق جاۋى» رەتىندە ەمىس-ەمىس ەسىمدەرى ەستىلەتىن. سودان شىعار، ولار تۋرالى نە مەكتەپ باعدارلاماسىندا، نە ينستيتۋت وقۋلىقتارىندا دەرەكتەر كەزدەسپەگەن. تەك ەگەمەندىگىمىزگە قول جەتكىزگەننەن كەيىن عانا ءبىرتۋار اسىلدارىمىزدىڭ تاريحي بولمىس-بەينەلەرىمەن قاۋىشا باستادىق قوي.

– جۇماحان اعا، كينو سالاسىندا دا، تەاتر سالاسىندا دا ويناپ كەلەسىز. رولدەرىڭىز ونەرسۇيەر جۇرتشىلىقتىڭ ەسىندە. جانىڭىزعا تەاتر جاقىن با، الدە كينو جاقىن با؟

– ەندى... اكتەر بولعاننان كەيىن ەكى سالانى دا ءبولىپ، جارعىم كەلمەيدى. سەبەبى، ەكەۋى دە ماعان جاقىن. ەكەۋىندە دە اكتەر وينايدى. سوندىقتان مەن ءۇشىن ەكى سالانىڭ ورنى بىردەي. بىراق ەكەۋىن ءبىر ونەردىڭ ءبىر ارناسىنان دەمەسەك، ەگىز ۇعىم دەپ كەسىپ ايتۋعا بولمايدى. قيىسپايتىن تۇستارى بار. تەاتردا ءبىر ءرول اياعىنا دەيىن ءبىر تەمپپەن، ءبىر سەزىممەن وينالادى. ول قويىلىمدى ەكىنشى مارتە ساحنالاعاندا الدىڭعى قاتەلىكتەرىڭدى تۇزەۋگە دە مۇمكىندىك بار. كەيبىرەۋلەر ءتىپتى تۇرلەندىرىپ ويناۋعا تىرىسىپ جاتادى. ال كامەرانىڭ الدىندا ءوزىڭدى باسقاشا سەزىنەسىڭ. تەاترداعىداي ءار ويناعان سايىن وبرازدى كورەرمەنگە ءارتۇرلى ەكپىنمەن جەتكىزۋگە مۇمكىندىك جوق. ءبىر ەپيزود پلەنكادا سول كۇيى ساقتالادى. ونى وزگەرتە المايسىڭ. كەيىن پلەنكادان كورىپ وتىرىپ «اتتەگەن-اي» دەيتىن جەرلەردى بايقاعانمەن، «قولىمدى مەزگىلىنەن كەش سەرمەدىمنىڭ» كەرى بولادى.

دەسەك تە، ەكەۋى دە ۇلكەن توزىمدىلىك پەن شەبەرلىكتى قاجەت ەتەدى. كينو سالاسىندا تەز تانىمال بولۋعا مۇمكىندىك مول.

وسى ورايدا ايتقىم كەلەتىنى، بۇگىندە كەز كەلگەن قايمانا قازاق ونەردىڭ ەسىگىن يمەنبەي اشاتىن بولدى. تەاتر مەن كينوعا ءۇش قايناسا سورپاسى قوسىلماسا دا. ولار قانداي وبرازدى بولماسىن ءوز دەڭگەيىندە الىپ شىعا الادى دەپ ايتا المايمىن. ول ارتيست ەمەس. سەبەبى، ساحنانىڭ شەبەرلىگىن وقىماعان، ءتىلىن مەڭگەرمەگەن.

شاكەن ايمانوۆ اعامىزدىڭ كەزىندە تۇسىرىلگەن كينولاردا ويناعان اكتەرلاردىڭ بارلىعى تەاتردىڭ اكتەرلارى عوي، ءبارى ونەردى تۇسىنەتىن جاندار. سودان كەيىن ول تۋىندىلار كورەرمەننىڭ جادىندا، تاريح پاراقتارىنىڭ بەتىندە ساقتالدى. زامانىنان ءوز باعاسىن الدى، كەرەك جەرىندە سۋىرىلىپ شىقتى دا.

تاعى ءبىر ايتا كەتەتىن دۇنيە، كەز كەلگەن ونەر ادامى نەگىزگى ءرول مەن ەپيزودتىق ءرولدى بولە جارمايدى. كىشكەنتاي وبراز بولسا دا سونىڭ ىشىنە كىرىپ، بار اقىلىن، ەسىن، سەزىمىن، ەنەرگياسىن، كۇش-قۋاتىن سارپ ەتۋ مىقتى اكتەرگە ءتان قاسيەت دەپ بىلەمىن. ويتكەنى، كىشكەنتاي وبراز بولمايدى، كىشكەنتاي اكتەر بولادى.

– ءسوزدىڭ رەتى كەلگەندە، «ونەر ادامى قانداي بولۋ كەرەك؟» دەگەن ساۋالعا دا جاۋاپ بەرە كەتسەڭىز...

– ونەر ادامى دا حالىقتىڭ اراسىنان شىققان. ولاردىڭ باسقالاردان ءبىر ايىرماشىلىعى – ەرەكشە ءبىر قابىلەتى بولادى، كىسىلىگى بولادى، وزىنە ءتان مىنەزى، ەركەلىگى بولادى. وعان جاراتۋشى باسقاشا ءبىر الەم سىيلاعان. جان دۇنيەسى دە، تابيعاتى دا، جۇرەگى دە تازا، ادەمى.

ول – حالىقتىڭ ادامى. سوندىقتان ءبىز يدەال بولۋىمىز كەرەك، حالىقتان ءبىر تابان الدا، ياعني ۇلگى بولىپ جۇرۋگە ءتيىسپىز.

– جۇماحان اعا، سوعىستان كەيىنگى جىلدارى ءبىر سپەكتاكلدىڭ اسەرىنەن زالداعى جاۋىنگەر ساحناداعى اكتەردى اتىپ تاستاعان دەگەندى ەستىگەنبىز. بۇل تەاترداعى قويىلىمنىڭ ءوز كورەرمەنىن ومىرگە ءسۇيىندىرىپ نەمەسە ءتۇڭىلدىرىپ جىبەرەردەي قۇدىرەتكە يە ەكەنىن اڭعارتادى. بۇگىنگى قازاق تەاترلارى سول ۇدەدەن شىعىپ ءجۇر مە؟

– قازاق تەاترلارىنىڭ قۇرىلعانىنا ءبىر عاسىرداي عانا ۋاقىت بولسا دا، كوپ جەتىستىكتەرگە جەتىپ ۇلگەردى. وركەنيەتى دامىعان ەۋروپا ەلدەرىمەن سالىستىرعاندا، بىرەۋلەر ايتىپ جۇرگەندەي، قالىپ كەتكەن ەشتەڭەمىز جوق. ءبىز كوبىنە ورىس مەكتەبىنەن ءتالىم الىپ، سولاردىڭ جۇيەسىمەن جۇردىك. دەسە دە، بۇگىنگى جاستار جاڭالىققا قۇمار، قازاق تەاترىنا جاڭا لەپ الىپ كەلۋگە ۇمتىلۋدا.

ءار ۇلتتىڭ ءوز رۋحى، كوزقاراسى بولادى، قۇرىلعانىنا عاسىر تولماسا دا، قازاق تەاترلارى باسقالار جاساي المايتىن بولەك وبرازدار ارقىلى ءوزىنىڭ بولمىسىن ايقىنداي ءبىلدى. ءبىز ۇنەمى تەاتر تۋرالى ايتقاندا كەمشىلىكتەردى تىزبەكتەۋگە قۇمارمىز. جوق، ولاي ەمەس، تيىسىنشە، جەتىستىكتەر مەن جەمىستى جۇمىستاردى دا مارقايىپ ايتۋ كەرەك. ءبىز شەتەلدىك كلاسسيكالاردى ءوز ويىمىزبەن جەتكىزۋدە دە شەبەرلىك تانىتىپ، تەاتر ونەرىندە ايتارىمىز بار ەكەنىن اڭعارتتىق.

ءبىر وكىنىشتىسى، قازىر زاماناۋي تەاتر، ءداستۇرلى تەاتر دەگەن ۇعىم پايدا بولىپ كەلە جاتىر. مەنىڭشە بۇلاي بولە-جارا قاراعان دۇرىس ەمەس. «شوۋ» دەگەن نارسە سانامىزدى سانسىراتىپ ءبىتتى. كەرەك دەسەڭىز، «ەسترادا ءانشىسى»، «ءداستۇرلى ءانشى» دەگەن تەڭەۋلەر مەن ءۇشىن قيسىنسىز. جاياۋ مۇسا، ءبىرجان سالدى، ءتىپتى بەرتىندەگى امىرەنى الساق، ولار ءوز زامانىنىڭ قانداي ءانشىسى بولدى ەكەن دەگەن وي كەلەدى. ءانشى ول قاشان دا ءانشى، سول اتقا دارىنىمەن دە، دارالىعىمەن دە لايىق بولۋى كەرەك. قۇداي تالانت بەرسە، ونى ولاي ورىنسىز جىلىكتەۋگە بولمايدى. كەم تالانت «جۇلدىزدار» جايلى اڭگىمە باسقا.

– «ارمانسىز ادام بولمايدى»، ءومىرىڭىزدىڭ وكىنىشتى تۇستارى بار ما؟ جالپى، قازىرگى احۋالىڭىزدان دا حاباردار ەتسەڭىز...

– نە سۇراعىڭ كەلگەنىن ءتۇسىندىم. ەندى... قالاي دەسەم... 1994 جىلى جول اپاتىنا ۇشىرادىم عوي، «باتىر بايانعا» تۇسكەننەن كەيىن كوپ ۋاقىت وتپەي. سودان بەرى تۇپ-تۋرا جيىرما بەس جىل ءوتىپتى. مەنىڭ «قاپ، اتتەگەن-اي!»، – دەيتىنىم سول. جاسايتىن كوپ (!) ىستەرىم بار ەدى... ەندى تاعدىر عوي... ەشكىمدى دە كىنالاي المايمىن. كەيدە مۇنى ءتاڭىردىڭ باسىما سالعان سىناعى ما دەپ ويلايمىن. ءتىپتى، ءتۇسىندىرىپ، اقتارىپ ايتا المايمىن دا!.. وكىنگەننەن نە پايدا؟! بىراق شامام كەلگەنشە جۇمىس ىستەدىم. 2-3 فيلمگە ءتۇسىپ، سپەكتاكلدەردە وينادىم دەگەندەي...

ال جاقسى سەكىلدىمىن. دەنساۋلىقتى ايتىپ بولمايسىڭ. بىردە اۋىرىپ، بىردە ساۋ بوپ ءومىر ءوتىپ جاتىر. تەاتردان كەتىپ، تارازدىڭ شەتىندەگى اۆتوتۇراقتاردىڭ بىرىندە قاراۋىل بولىپ ءجۇردىم. ساحناعا دا ورالىپ كوردىم. بىراق ومىرتقا مەن جۇلىن زاقىمدانعان سوڭ، قايتادان يكەمگە كەلە قويمادى ەكەن. دارىگەرلەرگە قارالىپ، ەمشىگە دە باردىم. بۇل تۋرالى كەزىندە رەسپۋبليكالىق بۇقارالىق اقپارات قۇرالدارىندا كوپ ماقالا شىقتى. بىرنەشە رەت وتا جاساتتىم. جاعدايىمنان حاباردار بولعان ەلباسى پارمەن بەرىپ، تۇڭعىش پرەزيدەنت قورى قاجەتتى قاراجاتتى اۋداردى. سول ارقىلى گەرمانياداعى بىلىكتى دارىگەرلەردىڭ قولىمەن سوڭعى وتامدى وتكەردىم. سودان بەرى جاعدايىم ءبىر قالىپتى. اياقتان تۇرىپ كەتۋىم ۋاقىتتىڭ ەنشىسىندە كورىنەدى. ازىرگە قىزدارىم الىپ بەرگەن مۇگەدەكتەرگە ارنالعان اربامەن قوزعالامىن. جاتتىعۋ جاساپ، ءجيى قيمىلداۋدى ادەتكە اينالدىرعانمىن. ءبىر جاعىنان جاسقا دا بايلانىستى ما دەيمىن. جاس بولسام تەز ءبىتىپ كەتەر مە ەدى... ال مەن الپىس بەستەن دە اسىپ بارامىن.

جاڭا «وكىنىشىڭىز بار ما؟» دەپ سۇرادىڭ، ءومىر وكىنىشتەن قۇرالسا، وندا ول ادامنىڭ ومىرىندە وزگەگە ۇلگى بولارلىقتاي ەشتەڭە جوق، زايا كەتكەنى. مەن ءوزىمدى وندايلاردىڭ قاتارىنا قوسپايمىن. «اتتەگەن-اي» دەيتىن كەزدەرىم جوق ەمەس... ايتسە دە، وسى كۇنىمە دەگەن شۇكىرشىلىك اۋزىمنان ءبىر تۇسكەن ەمەس. تۇسپەيدى دە!..

ءسوزىمنىڭ سوڭىندا ءبىر نازىمدى بىلدىرە كەتسەم، ارتىق بولماس دەپ ويلايمىن. قازىر ۇيدەن ۇزاپ شىعۋ قيىنعا سوعىپ كەتتى. وڭىرىمىزگە كەلگەلى كوپتەگەن وزگەرىستەر جاساپ، كونە شاھاردى بارىنشا تۇرلەندىرگەن وبلىس اكىمى اسقار يسابەكۇلىنا كولىك جاعىنان جاردەمدەسسەڭىز دەپ ءوتىنىش-حات جازعان بولاتىنمىن. ايماق باسشىسى مادەنيەت سالاسى ارداگەرىنىڭ ءبىر تىلەگىن جەرگە تاستاماس دەگەن ءۇمىتىم زور.

– البەتتە، اسقار مىرزاحمەتوۆتىڭ كومەك قولىن سوزاتىنىنا ءبىز دە سەنىم بىلدىرەمىز. اسەرلى اڭگىمەڭىزگە راحمەت، اعا! امان ءجۇرىڭىز!

 

سۇحباتتاسقان اسحات رايقۇل

سوڭعى جاڭالىقتار