16 مامىر, 15:29 335 0 جاڭالىقتار دينارا مىڭجاسارقىزى

بەس باستاما – باسپانالى بولۋعا ءبىر قادام

نۇر-سۇلتان قالاسىنداعى Radisson قوناقۇيىندە قازاقستان رەسپۋبليكاسى پرەزيدەنتىنىڭ بەس الەۋمەتتىك باستاماسىنىڭ جۇزەگە اسۋ بارىسىن قاداعالايتىن قوعامدىق كەڭەستىڭ جيىنى ءوتتى. كۇن تارتىبىندە كەلەلى ماسەلەلەر قارالدى.

اتاپ ايتار بولساق، قر تۇڭعىش پرەزيدەنتى، ەلباسى ن.نازارباەۆتىڭ «Nur Otan» پارتياسىنىڭ XVIII سەزىندە بەرگەن تاپسىرماسىنا سايكەس، پرەزيدەنتتىڭ 2019 جىلعا ارنالعان بەس الەۋمەتتىك باستاماسىن جۇزەگە اسىرۋ بويىنشا قۇرىلعان قوعامدىق كەڭەستىڭ جۇمىسى; قر تۇڭعىش پرەزيدەنتى، ەلباسى ن.نازارباەۆتىڭ «Nur Otan» پارتياسىنىڭ XVIII سەزىندە قازاقستاندىقتارعا الەۋمەتتىك قولداۋ كورسەتۋ تۋرالى تاپسىرماسىنىڭ ورىندالۋى; پرەزيدەنتتىڭ «ءاربىر وتباسىنا باسپانا الۋدىڭ جاڭا مۇمكىندىكتەرى» اتتى العاشقى الەۋمەتتىك باستاماسىنىڭ جۇزەگە اسۋ بارىسى تالقىلاندى. باسقوسۋعا قوعامدىق كەڭەس مۇشەلەرى، وكىلەتتى ورتالىق مەملەكەتتىك ورگانداردىڭ، «تۇرعىن ءۇي قۇرىلىس جيناق بانكى» اق، «باسپانا» يپوتەكالىق ۇيىمىنىڭ باسشىلارى مەن وكىلدەرى جانە ت.ب. قاتىستى. قوعامدىق كەڭەس وتىرىسىنا جەتەكشىلىك ەتكەن باقىتجان جۇماعۇلوۆ: «ءبىزدىڭ وتىرىسىمىز ەلىمىز ءۇشىن اسا ماڭىزدى تاريحي كەزەڭدە ءوتىپ جاتقانىن بارشالارىڭىز جاقسى بىلەسىزدەر. ەلىمىزدە بيلىكتىڭ اۋىسۋ ءۇردىسى باستالىپ، قازاقستاندىق قوعام سايلاۋ ناۋقانىنا قادام باستى. بۇل تەك ءبىزدىڭ جۇمىسىمىز ءۇشىن عانا ەمەس، تۇتاس ەلىمىزدىڭ بولاشاعى ءۇشىن ايرىقشا ماڭىزعا يە. ەلباسى ن.نازارباەۆتىڭ بارشا قازاقستاندىقتاردىڭ ءال-اۋقاتىن ارتتىرۋعا باعىتتالعان ساياسي باعدارىن ارى قاراي جالعاستىرۋ قوعامىمىزدىڭ مۇددەسى مەن قالاۋىنا ساي قادام ەكەنى ءسوزسىز. ەلباسى پارتيانىڭ حVIII سەزىندە ازاماتتاردىڭ الەۋمەتتىك ءال-اۋقاتىن ارتتىرۋدىڭ الدىمىزدا تۇرعان باستى ستراتەگيالىق مىندەتتەرىن انىقتاپ، ونى جۇزەگە اسىرۋ ءۇشىن بىرقاتار تاپسىرمالار بەردى»، – دەدى. داستۇرگە ساي وتىرىستىڭ جۇمىس ءتارتىبى بەكىتىلىپ، بايانداماشىلار جارىسسوزگە شىقتى. تالقىلاۋ كەزىندە ەرجان جۇماتۇلى اتاۋلى الەۋمەتتىك كومەك تاعايىنداۋ بارىسىنا كەڭىنەن توقتالدى. ول سونداي-اق، اتاۋلى الەۋمەتتىك كومەكتەگى راسىمدەردىڭ جەڭىلدەتىلگەنىن جەتكىزدى.

– 2019 جىلى از قامتىلعان 832 مىڭ ازامات، ونىڭ ىشىندە 550 مىڭ بالا قامتىلاتىن بولدى. اتاۋلى الەۋمەتتىك كورسەتۋ ءۇشىن 2019 جىلدا 134 ملرد تەڭگە ءبولىنۋ كوزدەلگەن. مۇگەدەك بالانىڭ بالا جاسىنان ءى توپتاعى مۇگەدەكتىگى كۇتىمى بويىنشا جاردەماقىلار 31 183 تەڭگەدەن 41 578 تەڭگەگە دەيىن ارتتى. بيىل 1 ماۋسىمنان باستاپ ازاماتتىق قىزمەتشىلەردىڭ جالاقىسى ەلباسىنىڭ تاپسىرماسىنا سايكەس 30 پايىزعا دەيىن ارتادى. بۇل رەسپۋبليكا بويىنشا دەنساۋلىق ساقتاۋ، ءبىلىم بەرۋ، الەۋمەتتىك قورعاۋ، مادەنيەت، اۋىلشارۋاشىلىق جانە باسقا سالالاردا قىزمەت اتقاراتىن 1 ميليوننان استام قىزمەتشىلەردى قامتيتىن بولادى، – دەدى ە.جۇماتۇلى. جيىندا قايىربەك وسكەنباەۆ تۇرعىن ءۇي قۇرىلىسى بويىنشا حابارلاپ، سول باعىتتا اتقارىلعان جۇمىستارعا ساراپتاما جاسادى. ونىڭ ايتۋىنشا، قازىرگى تاڭدا تۇرعىن ۇيلەردى ساتىپ الۋعا 50 ملرد تەڭگە بولىنگەن ەكەن. باسپانالار تۇرعىندارعا جالعا بەرىلەتىن بولادى. جارىسسوزدە «باسپانا» يپوتەكالىق ۇيىمى» اق باسقارما توراعاسى قايرات التىنبەكوۆ «7 – 20 – 25» باعدارلاماسى بويىنشا جۇمىستىڭ قارقىندى تۇردە ءجۇرىپ جاتقانىن ايتىپ، بۇگىندە 11600 ءوتىنىش ماقۇلدانىپ، ونىڭ سوماسى 85 ملرد تەڭگەدەن اسقانىن مالىمدەدى.

– ERG كومپانياسىمەن بىرگە حالىق بانكپەن جانە دە «7 – 20 – 25» باعدارلاماسى بويىنشا مەموراندۋمعا قول قويدىق. مەموراندۋم بويىنشا جۇمىسشىلارعا وسى باعدارلامامەن ارنايى قۇرىلىس جۇمىستارى جۇرگىزىلىپ، ۇيلەر سالىنىپ، ول كومپانيالار ءوز جۇمىسشىلارىنا العاشقى جارنانى قۇيۋعا كومەكتەسەدى، – دەي كەلە، قازىرگى تاڭدا بىرنەشە كومپانيامەن كەلىسسوزدەر جۇرگىزىلىپ جاتقانى جايىندا ايتتى. قوعامدىق كەڭەستى باقىتجان جۇماعۇلوۆ قورىتىندىلاپ، بەس الەۋمەتتىك باستاما ءاربىر باعىتىنىڭ ورىندالۋ بارىسىن ۇدايى باقىلاۋدا ۇستاپ وتىرۋدى تاپسىردى.

باسپانا – ءار ادام ءۇشىن باستى ماسەلە. «ءۇيى جوقتىڭ – كۇيى جوق» دەپ حالىق بەكەر ايتپاعان. قازىر جاستاردىڭ كوپشىلىگى باسپاناسىز، پاتەر جالدايدى. ماماندار ولارعا اينالدىرعان ەكى جىل بار مۇمكىندىگىن سالىپ ەڭبەك ەتىپ، اقشا جيناسا، ءبىزدىڭ كومپانيا سالعان ۇيلەردەن پاتەر الۋعا تولىق مۇمكىندىك بولاتىنىن ايتىپ وتىر. ارينە، باسپانا جەتپەيدى، مەملەكەت ۇيلەردى كوبىرەك سالۋعا ءتيىس. سالىنعان ۇيلەردىڭ ساپاسىن تەكسەرىپ الۋ دا وڭاي ماسەلە ەمەس. زاڭدا ايتىلعانداي، ءۇيدىڭ ساپاسىنا مەردىگەر، جوبالاۋشى، قۇرىلىستى سالۋشى، تەحنيكالىق باقىلاۋشى ءتورت مەكەمە جاۋاپتى بولۋى ءتيىس.

توعجان تولەگەن

سوڭعى جاڭالىقتار