16 مامىر, 15:22 461 0 بىلگەنگە مارجان "تۇركىستان" گازەتىنىڭ اۆتورلارى

باسەكەگە قابىلەتتىلىك يندەكسى – ماڭىزدى جۇيە

دۇنيەجۇزىلىك ەكونوميكالىق فورۋم 2018-2019 جىلدارعا ارنالعان جاھاندىق باسەكەگە قابىلەتتىلىك يندەكسىنىڭ جىل سايىنعى رەيتينگىسىن وتكەن جىلدىڭ 17 قازان كۇنى رەسمي تۇردە جاريالادى. دەف جاھاندىق باسەكەگە قابىلەتتىلىك يندەكسىنىڭ ەسەپتەرىنە سايكەس قازاقستان 140 ەلدىڭ ىشىندە 59-ورىن العان ەدى. بۇل 2017 جىلعى ورنالاسۋعا سايكەس كەلەدى. 12 باسەكەگە قابىلەتتىلىك فاكتورىنىڭ بەس فاكتورى بويىنشا جاقسى ناتيجە كورسەتىلگەن. ولار «ينستيتۋتتار» (+12), «تاۋارلار نارىعى» (+10), «ينفراقۇرىلىم» (+3), «ەڭبەك نارىعى» (+3), «قارجىلىق جۇيە» (+2). ءۇش فاكتور بويىنشا جايعاسىم وزگەرگەن جوق – «اكت»، «نارىق كولەمى» جانە «يننوۆاتسيالىق الەۋەت». سونىمەن قاتار، قازاقستان 2017 جىلمەن سالىستىرعاندا ءوز جايعاسىمىن 0,7 ۇپايعا جاقسارتا وتىرىپ، 61,8 ۇپاي جيناقتادى. بۇل كولۋمبيا، تۇركيا، پەرۋ ءتارىزدى ەلدەردى باسىپ وزۋعا مۇمكىندىك بەردى.

سول كەزەڭدەگى ۇلتتىق ەكونوميكا ءمينيسترى ت.سۇلەيمەنوۆ قازاقستان الەم بويىنشا كورپوراتيۆتىك باسقارۋ سالاسىنداعى اكتسيونەرلەردىڭ قۇقىعى، تاراتۋ جانە قايتا قۇرىلىمداۋ راسىمدەرىنە قولدانىلاتىن قۇقىقتىق بازانىڭ بالامالىلىعى مەن تۇتاستىعى، ەلەكترلەندىرۋ دارەجەسى (ەلەكترلەندىرۋگە قولجەتىمدىلىك) پارامەترلەرى بويىنشا ءبىرىنشى ورىن العانىن اتاپ وتكەن بولاتىن.

بۇدان وزگە، قازاقستان بيزنەس اشۋ قۇنى بويىنشا جەتىنشى ورىندا جانە مۇددەلەر قايشىلىعىن رەتتەۋ بويىنشا 11-ورىنعا جايعاستى. ەكس مينيستر تيمۋر سۇلەيمەنوۆ: «كوپتەگەن فاكتورلار بويىنشا قازاقستان ايماقتاعى ەلدەردەن جانە تابىسى سالىستىرمالى دەڭگەيدەگى ەلدەردەن وزىق تۇرعانىن ايرىقشا اتاپ وتكەن ءجون. تابىسى بىردەي دەرلىك دەڭگەيدەگى ەلدەرمەن سالىستىرعاندا قازاقستان «ماكروەكونوميكالىق تۇراقتىلىق»، «اكت»، «ەڭبەك نارىعى»، «نارىق كولەمى»، «ءبىلىم جانە داعدىلار»، «بيزنەستىڭ قارقىندىلىعى» فاكتورلارى بويىنشا جوعارى كورسەتكىشكە يە»، – دەگەن ەدى.

«ينستيتۋتتار»، «ينفراقۇرىلىم»، «تاۋارلار نارىعى» فاكتورلارى بويىنشا قازاقستاننىڭ ورتاشا كورسەتكىشتەرى ۇقساس ەلدەردىڭ ورتاشا كورسەتكىشىمەن تەڭ. تمد ەلدەرىمەن سالىستىرعاندا، قازاقستان «اكت»، «ماكروەكونوميكالىق تۇراقتىلىق»، «ەڭبەك نارىعى»، «نارىق كولەمى» جانە «بيزنەستىڭ قارقىندىلىعى» فاكتورلارى بويىنشا باسەكەلەستىك ارتىقشىلىقتارعا يە. قالعان فاكتورلار بويىنشا قازاقستاننىڭ كورسەتكىشتەرى ورتاشا العاندا تمد ەلدەرىنىڭ كورسەتكىشتەرىمەن تەڭ. جالپى العاندا، دۇنيەجۇزىلىك ەكونوميكالىق فورۋم قازاقستاندى «ەڭبەك نارىعى» – 30 ورىن جانە «بيزنەستىڭ قارقىندىلىعى» – 37 ورىن سەكىلدى فاكتورلار بويىنشا باسەكەلەستىك ارتىقشىلىققا يە دەپ بەلگىلەدى.

«اكت» (44), «نارىق كولەمى» (45), «ءبىلىم جانە داعدىلار» (57), «تاۋارلار نارىعى» (57), «ينستيتۋتتار» (61), «ماكروەكونوميكالىق تۇراقتىلىق» (62) جانە «ينفراقۇرىلىم» (69) فاكتورلارى ورتاشا دەڭگەيدە باعالاندى.

ءبىر ايتا كەتەرلىگى، دۇنيەجۇزىلىك ەكونوميكالىق فورۋمنىڭ جاھاندىق باسەكەگە قابىلەتتىلىك يندەكسىنىڭ سوڭعى رەيتينگىسى جاڭا فورمات بويىنشا ەسەپتەلدى، ول 70 پايىز جاڭا ينديكاتورلاردان تۇرادى. بۇل جايىندا ماماندار جان-جاقتى پىكىر ءبىلدىردى. ادىستەمەسى ايتارلىقتاي وزگەرگەن. كورسەتكىشتەر تومەندەگەن كەزدەر دە بار. ماسەلەن، ءازىربايجان 33 بولعان بولسا، قازىر – 69. سوندىقتان دا بۇرىنعى ادىستەمەمەن تىكەلەي سالىستىرۋعا كەلمەيدى. ەسەپتەر مۇلدەم باسقا بازامەن جۇرگىزىلگەن. دەف جاھاندىق باسەكەگە قابىلەتتىلىك يندەكسىنىڭ ادىستەمەسى سيرەك وزگەرەدى. ماسەلەن الدىڭعى ادىستەمە 14 جىل بويى وزگەرىسكە ۇشىراماعان.

دۇنيەجۇزىلىك ەكونوميكالىق فورۋمنىڭ جاھاندىق باسەكەگە قابىلەتتىلىك يندەكسىنىڭ رەيتينگىسى 35 جىلدان بەرى شىعارىلىپ كەلەدى. قازاقستان رەيتينگكە 2006 جىلدان بەرى قاتىسادى.

 «تۇركىستان-اقپارات»

سوڭعى جاڭالىقتار