16 مامىر 2019, 14:54 545 0 نۇر وتان اسەل انۋاربەك

بەس باستامانىڭ مەرزىمدى ورىندالۋى – باستى ماقسات

«Nur Otan» پارتياسى:

ەلباسىنىڭ «بەس الەۋمەتتىك باستاماسى» ايماقتاردا قالاي ىسكە اسىپ جاتقاندىعىن باقىلاۋ ماقساتىندا «Nur Otan» پارتياسىنىڭ جانىنان قۇرىلعان قوعامدىق كەڭەس مۇشەلەرى كەزەكتى رەيدىن وتكىزدى. وندا «بەس باستامانىڭ ءبىرىنشى باعىتى بۇقارانى باسپانامەن قامتۋ» ماسەلەسى تالقىلاندى.توبىل وڭىرىندە «7-20-25» مەملەكەتتىك باعدارلاماسى ارقىلى ءۇي الۋ تەتىكتەرىنىڭ تيىمدىلىگى تىلگە تيەك بولدى.

«بيىل پارتيانىڭ بەس الەۋمەتتىك باستاماسىن ءتۇسىندىرۋ مەن ىسكە اسۋ بارىسىن تەكسەرۋ بويىنشا ءىس-شارالار تىزبەگى جاسالعان ەدى. وتكەن جىلدىڭ وزىندە 6 وتىرىس وتكىزىلىپ، ناتيجەسىندە 13 ۇسىنىس ازىرلەندى. پرەزيدەنتتىڭ بەس الەۋمەتتىك باستاماسىن اقپاراتتىق-ءتۇسىندىرۋ شارالارى اياسىندا 900-دەن استام كەزدەسۋ ۇيىمداستىرىلىپ، 35 مىڭنان استام تۇرعىندى قامتىدى»، – دەيدى «Nur Otan» پارتياسى قوستاناي وبلىستىق فيليالى توراعاسىنىڭ ءبىرىنشى ورىنباسارى جاڭاباي بيسيمباەۆ.

قوستاناي وڭىرىندە 600-دەن استام كوپ بالالى وتباسى باسپانا كەزەگىندە تۇر. ولاردىڭ 70 پايىزى وبلىس ورتالىعى مەن رۋدنىي قالاسىندا جانە قوستاناي اۋدانىندا تىركەلگەن. جۋىردا ولاردى باسپانامەن قامتاماسىز ەتۋگە رەسپۋبليكالىق جانە وبلىستىق بيۋدجەتتەن 900 ملن تەڭگە بولىنگەن. بۇل قارجىنىڭ ءبىر بولىگىنە اتالعان وتباسىلار ءۇشىن دايىن پاتەرلەر ساتىلىپ الىنسا، ەكىنشى بولىگى باسپانا كەزەگىندە تۇرعان كوپ بالالى جانە تۇرمىسى تومەن وتباسىلارعا «تۇرعىن ءۇي جيناق بانكى» ارقىلى 2 پايىزدىق جەڭىلدىكپەن بەرىلەدى. قۇرىلىس باسقارماسىنىڭ اقپاراتىنا سايكەس، «باقىتتى وتباسى» اياسىندا جاڭا باعدارلاما مامىر ايىنان باستالادى. قارجىنىڭ قالعان بولىگىنە كوپ بالالى وتباسىلارعا ارنالعان جالدامالى ۇيلەر تۇرعىزىلماق. مۇنداي ءۇيدىڭ ءبىرى بىلتىر امانكەلدى اۋدانىندا بوي كوتەرگەن ەدى. بيىل فەدوروۆ اۋدانىندا 24 پاتەرلىك، ال ليساكوۆ قالاسىندا 60 پاتەرلىك جالدامالى ءۇي سالىنباق.

ءوڭىر تۇرعىندارىنىڭ «7-20-25» يپوتەكالىق باعداراماسى بويىنشا باسپانا الۋ كورسەتكىشى دە ءبىرشاما وسكەن. بۇگىنگە دەيىن تۇرعىندار تاراپىنان ەكىنشى دەڭگەيلى بانكتەرگە كولەمى 2 ملرد تەڭگەگە جۋىق 400- دەن استام ءوتىنىم ءتۇسىپ، ونىڭ 306-سى قاناعاتتاندىرىلعان. توبىل ءوڭىرى بۇل باعدارلامانى ىسكە اسىرۋدا ەلىمىز بويىنشا الدىڭعى قاتاردا كەلەدى.

«بىلتىر بۇل باعدارلاما بويىنشا تۇرعىندارعا جالعىز «تسەنتركرەديت بانك» قانا نەسيە بەرىپ كەلسە، بيىل وعان «حالىق بانكى»، «فورتە بانك»، «اتف»، «تسەسنا بانك»، «ەۋرازيا» جانە «سبەربانك» سياقتى قارجى مەكەمەلەرى قوسىلىپ وتىر»، – دەيدى قر ۇلتتىق بانكى قوستاناي وبلىستىق فيليالى قارجى مەكەمەلەرىن قاداعالاۋ جانە قارجىلاي قىزمەت كورسەتۋ بويىنشا تۇتىنۋشىلار قۇقىعىن قورعاۋ ءبولىمىنىڭ باسشىسى اسەت قۋانىشباەۆ.

جالپى، «7-20-25» باعدارلاماسى بويىنشا بيىل وڭىردە 11 تۇرعىن ءۇي سالىنادى. وندا 1233 پاتەر بار. مۇنىڭ سىرتىندا اتالعان باعدارلامانىڭ تيىمدىلىگىن ارتتىرۋ ماقساتىندا ەكىنشى جارتىجىلدىقتا وبليگاتسيالىق قارىزدار بويىنشا سالىنىپ جاتقان نەسيەلىك تۇرعىن ۇيلەردىڭ ەسەبىنەن 368 پاتەردى ەكىنشى دەڭگەيلى بانكتەرگە وتكىزۋ جوسپارلانعان. ارنايى باقىلاۋ ءىس-شاراسى بارىسىندا قۇرىلىس ساپاسىندا كەمشىلىكتەر تابىلمادى. ايتا كەتۋ كەرەك، قوعامدىق كەڭەستىڭ تەكسەرۋ شارالارى ۇدايى ۇيىمداستىرىلىپ تۇرادى. «باستى ماقسات – بەس الەۋمەتتىك باستامانىڭ ۋاقىتىلى ءارى مەرزىمدى ورىندالۋى» دەيدى كەڭەس مۇشەلەرى.

سونداي-اق، پارتيا توراعاسى نۇرسۇلتان نازارباەۆتىڭ «بەس الەۋمەتتىك باستاماسىن» ىسكە اسىرۋ بويىنشا «Nur Otan» پارتياسى شىمكەنت قالالىق فيليالىنىڭ قوعامدىق كەڭەسىنىڭ دە وتىرىسى ءوتتى. ماجىلىسكە كەڭەس مۇشەلەرى، ءماسليحات دەپۋتاتتارى، اتقارۋشى ورگان باسشىلارى، ۇكىمەتتىك ەمەس ۇيىمداردىڭ وكىلدەرى قاتىستى.

ەلباسىنىڭ بەس الەۋمەتتىك باستاماسىن ىسكە اسىرۋ ماقساتىندا شىمكەنت قالاسى بويىنشا جول كارتاسى ازىرلەنىپ، بەكىتىلگەن بولاتىن. وسى جوسپاردىڭ ورىندالۋ بارىسى تۋرالى مەملەكەتتىك مەكەمە باسشىلارى پارتيالىقتارعا ەسەپ بەرىپ، ۇسىنىستارىن تىڭدادى.

قر ۇلتتىق بانكى وڭتۇستىك ايماقتىق فيليالى ديرەكتورى ءانۋار بوتانبەكوۆ «7-20-25» باعدارلاماسى بويىنشا ۇلتتىق بانك تاراپىنان اتقارعان جۇمىستارى تۋرالى باياندادى. «بۇگىنگى تاڭدا شىمكەنت قالاسى بويىنشا 450 ءوتىنىش قابىلدانىپ، سونىڭ 239-ى ماقۇلداندى. ءبىزدىڭ سەرىكتەس بانكتەرىمىز ارقىلى 2,5 ملرد تەڭگەگە نەسيە بەرىلدى. بۇل دەگەنىمىز شىمكەنت رەسپۋبليكالىق قالالىق مارتەبە العاننان كەيىن نۇر-سۇلتان، الماتى قالالارىمەن سالىستىرعاندا تومەن كورسەتكىش. بۇل تاراپتان ءبىراز جۇمىستار جاسالادى. قالانىڭ ەكونوميكاسى، حالىقتىڭ ءال-اۋقاتى وسەدى. ءبىز ءالى دە ۇلكەن كورسەتكىشتەرگە جەتەمىز. ويتكەنى بۇل باعدارلامانىڭ شەكتەۋى جوق. سونداي-اق حالىقتىڭ تۇرعىن ۇيگە سۇرانىسى كوپ. جىلدىڭ سوڭىنا دەيىن بىرنەشە مىڭ پاتەرلەر سالىنادى. قازىرگى تاڭدا، نۇرلى جەر باعدارلاماسى ارقىلى، جەكە كاسىپكەرلەردىڭ قولداۋىمەن جانە BI GROUP كومپانياسىمەن دە تۇرعىن ءۇي كەشەنى سالىنىپ جاتىر. بۇنىڭ ءوزى «7-20-25» باعدارلاماسى ارقىلى ساتىلادى»، – دەدى فيليال ديرەكتورى.

شىمكەنت قالاسىنداعى 10 جوعارى وقۋ ورىندارى مەن 29 كوللەدجدە 106636 ستۋدەنت جاستار ءبىلىم الۋدا. ونىڭ ىشىندە، 6614 ستۋدەنت جاتاقحانامەن قامتىلسا، 8050 ورىنعا قاجەتتىلىك تۋىنداپ وتىر. ءۇشىنشى مەگاپوليس ستۋدەنت جاستارىنىڭ جاتاقحاناداعى جاعدايىن جاقسارتۋ بويىنشا اتقارىلعان جۇمىستار تۋرالى بايانداعان ءبىلىم باسقارماسى باسشىسىنىڭ مىندەتىن اتقارۋشى ايگۇل تەكەباەۆا ناقتى مىسالدار كەلتىردى.

«قازىرگى تاڭدا، قالامىزدا جاتاقحانا ورنىنىڭ قاجەتتىلىگىن جويۋ بويىنشا بىرقاتار جۇمىستار اتقارىلۋدا. اتاپ ايتاتىن بولساق، اكىمدىك تاراپىنان «تۇران» شاعىناۋدانىنان 8 گا جەر ۋچاسكەسى بەلگىلەنىپ، «Shymkent» الەۋمەتتىك كاسىپكەرلىك كورپوراتسياسى اق ينۆەستيتسياسى ەسەبىنەن 5000 ورىندىق جاتاقحانا سالۋ ءۇشىن جەر ۋچاسكەسى راسىمدەلدى. سونىمەن قاتار، جەكە كاسىپكەرلەر ارقىلى 200 جانە 350 ورىندىق جاتاقحانا سالۋ ءۇشىن «قارجى ورتالىعى» اكتسيونەرلىك قوعامىمەن كەلىسىم-شارت ءتۇزىلدى. قۇرىلىس جۇمىستارى جۇرگىزىلۋدە»، – دەدى ول.

سونىمەن قاتار، ءماجىلىس بارىسىندا شاعىن نەسيە بەرۋدى كوبەيتۋ بويىنشا قالالىق كاسىپكەرلىك جانە يندۋستريالدى-يننوۆاتسيالىق دامۋ باسقارماسى باسشىسىنىڭ مىندەتىن اتقارۋشى نۇركەن بيگۋليەۆ، «ەلدى گازبەن قامتاماسىز ەتۋ ماسەلەسى بويىنشا ەنەرگەتيكا جانە كوممۋنالدىق-شارۋاشىلىق باسقارماسىنىڭ باسشىسى نۇرلان امانقۇلوۆ باياندادى.

سوڭعى جاڭالىقتار