16 مامىر, 14:49 450 0 الەۋمەت اسەل انۋاربەك

 «نۇرلى جەر» – ناتيجەلى باستاما

بيىل ەلىمىزدە 13 ملن شارشى مەتر تۇرعىن ءۇي سالىنباق. دەمەك، قازاقستاندىقتاردىڭ باسپانالى بولۋ مۇمكىندىگى ارتادى. بۇل تۋرالى اپتا باسىندا «Nur Otan» پارتياسىنىڭ ورتالىق اپپاراتى ماجىلىسىندە «نۇرلى جەر» باعدارلاماسىنىڭ جۇزەگە اسىرىلۋى بويىنشا ەسەپ بەرگەن يندۋستريا جانە ينفراقۇرىلىمدىق دامۋ ءمينيسترى رومان سكليار مالىمدەدى.

مينيستر ەسەپ بەرۋ بارىسىندا حالىقتى باسپانامەن قامتاماسىز ەتۋدەگى وڭ كورسەتكىشتەرگە توقتالدى. مىسالى، قازاقستان جان باسىنا شاققاندا تۇرعىن ءۇيدى پايدالانۋعا بەرۋ بويىنشا تمد ەلدەرى اراسىندا العاشقى ورىنعا يە. مينيستر كەلتىرگەن دەرەكتەرگە سۇيەنسەك، بۇل كورسەتكىش قازاقستاندا 0,68 شارشى مەتردى قۇراسا، رەسەيدە 0,54 شارشى مەترگە تەڭ. ال بەلارۋستە – 0,40, وزبەكستاندا – 0,36 شارشى مەتر. «بىلتىر 12,5 ملن  شارشى مەتر ءۇي سالىندى. 113 مىڭ وتباسى باسپانالى بولدى. وسىنىڭ  ناتيجەسىندە پايدالانۋعا بەرىلگەن تۇرعىن ءۇي سانى بويىنشا قازاقستان تمد  اۋماعىندا ءبىرىنشى ورىنعا شىقتى. قازىر بىزدە ءبىر ادامعا شاققاندا باسپانامەن قامتۋ – ورتاشا ەسەپپەن 24 شارشى مەتر. ءبىزدىڭ الدىمىزدا بۇل كورسەتكىشتى 30 شارشى مەترگە جەتكىزۋ مىندەتى تۇر»، – دەپ اتاپ ءوتتى مينيستر رومان سكليار.

«نۇرلى جەر» باعدارلاماسىنىڭ جۇمىسى مۇنىمەن توقتاماق ەمەس. جيىندا بەلگىلى بولعانداي، قازىرگى ۋاقىتتا ەلىمىزدە باسپاناعا مۇقتاج 31 مىڭعا جۋىق كوپبالالى وتباسى بار. مينيستر الداعى 7 جىل ىشىندە وسى ساناتتاعى تۇرعىنداردىڭ ماسەلەسى تۇبەگەيلى شەشىمىن تاباتىنىنا سەندىردى. وسى ماقساتتا «نۇرلى جەر» باعدارلاماسى بويىنشا 40 مىڭعا جۋىق پاتەردىڭ قۇرىلىسى باستالماق. سونداي-اق، بيىل جاستار جىلىنا وراي نۇر-سۇلتان، الماتى جانە شىمكەنت قالالارىندا ءبىر مىڭ تۇرعىن ءۇي قولدانىسقا بەرىلمەك.

رومان سكلياردىڭ ەسەبىنشە، بۇگىندە الماتى، ماڭعىستاۋ وبلىستارىندا قۇرىلىس قارقىندى جۇرگىزىلۋدە. قازاقستان بويىنشا پايدالانۋعا بەرىلگەن تۇرعىن ءۇيدىڭ 45 پايىزى وسى وڭىرلەرگە تيەسىلى. ال ەڭ تومەنگى كورسەتكىش سولتۇستىك قازاقستان، پاۆلودار جانە قوستاناي وبلىستارىندا تىركەلىپ وتىر.

 

اسەل ماقساتقىزى

تەگتەر نۇرلى جەر

سوڭعى جاڭالىقتار