16 مامىر 2019, 14:46 915 0 ىشكى ساياسات Túrkistan Gazeti

پرەزيدەنت سايلاۋى: كانديداتتار باسەكەسى قىزا ءتۇستى

ەلىمىزدە كەزەكتەن تىس پرەزيدەنت سايلاۋىنىڭ وتۋىنە ءبىر ايدان از ۋاقىت قالدى. وتكەن اپتانىڭ سەنبىسىنەن ۇمىتكەرلەر سايلاۋ الدى ۇگىت-ناسيحات شارالارىن باستاپ كەتتى.

ەل تاريحىندا التىنشى رەت وتكەلى جاتقان پرەزيدەنت سايلاۋىنا جەتى ۇمىتكەر تىركەلدى.

«Nur Otan» پارتياسى سايلاۋالدى ۇگىت-ناسيحات جۇمىستارىن قارقىندى تۇردە باستادى. قاسىم-جومارت توقاەۆتىڭ رەسپۋبليكالىق قوعامدىق شتابى قۇرىلىپ، وعان 190 مىڭعا جۋىق ادام ەندى. كانديداتتىڭ سەنىمدى وكىلى رەتىندە 19,5 مىڭ ادام تىركەلدى. ولاردىڭ قۇرامىندا تابىستى كاسىپكەرلەر، وتاندىق ەسترادا جانە كينو جۇلدىزدارى، شىعارماشىلىق ينتەلليگەنتسيا وكىلدەرى، ەلىمىزگە بەلگىلى سپورتشىلار مەن مەملەكەت جانە قوعام قايراتكەرلەرى بار. الداعى سايلاۋ ناۋقانىنىڭ جاڭالىعى رەتىندە العاش رەت قوعامدىق شتابتىڭ «TEAMQAZAQSTAN» جاستار قاناتىنىڭ قۇرىلعاندىعىن ايتۋعا بولادى. بۇگىندە ەلىمىز بويىنشا 227 قوعامدىق شتاب قۇرىلدى. ونىڭ 17-ءسى – وبلىستىق، 37-ءسى – قالالىق جانە 173-ءى اۋداندىق دەڭگەيدە جۇمىس ىستەۋدە. قر پرەزيدەنتتىگىنە كانديدات قاسىم-جومارت توقاەۆ ءوزىنىڭ رەسمي سايتىندا سايلاۋالدى تۇعىرناماسىن جاريا ەتتى. ساباقتاستىق، ادىلدىك، ورلەۋ اتتى ءۇش باعىتتان تۇراتىن باعدارلامادا ەلدىڭ ىشكى جانە سىرتقى ساياساتىنا، سونداي-اق، ەكونوميكا جانە الەۋمەتتىك سالاسىنا قاتىستى ماسەلەلەر تولىق قامتىلعان.

العاشقىلاردىڭ ءبىرى بولىپ ۇگىت-ناسيحات جوسپارىمەن «اۋىل» پارتياسى ءبولىستى. شتاب باسشىسى ءالي بەكتاەۆ ارنايى ءباسپاسوز ءماسليحاتىندا: «رەسپۋبليكالىق قوعامدىق شتابتان بولەك، 17 ايماقتا 17 وڭىرلىك شتاب قۇرىلعان. ءاربىر قالا مەن اۋداندا ءبىزدىڭ وكىلدەرىمىز جۇمىس ىستەيتىن بولادى»، – دەدى. پرەزيدەنتتىككە كانديدات تولەۋتاي راقىمبەكوۆ ءوزىنىڭ سايلاۋالدى تۇعىرناماسىندا: «اۋىل جاستارى اراسىنداعى جۇمىسسىزدىقتى اقپاراتتىق-كونسۋلتاتسيالىق قولداۋ كورسەتۋ جانە اۋىل جاستارىن الەۋمەتتىك تۇرعىن ءۇي قۇرىلىسىنىڭ اۋقىمىن ۇلعايتۋ جولىمەن تۇرعىن ۇيمەن قامتاماسىز ەتۋدى ۇسىنامىن. اۋىل جاستارى قالاعا كەتپەۋى ءۇشىن بار جاعداي جاسالۋى ءتيىس»، – دەدى. ودان بولەك اگرووندىرىستىك كەشەندى قارقىندى دامىتۋعا، ەكونوميكانىڭ وزگە دە باعىتتارىنىڭ وسۋىنە نازار اۋداردى. سونداي-اق، سايلاۋ تۇعىرناماسىندا الەۋمەتتىك ساياسات ماسەلەسى دە قامتىلعان.

«ۇلت تاعدىرى» ۇلتتىق-پاتريوتتىق قوزعالىسىنان كانديدات بولعان ءامىرجان قوسانوۆتىڭ سايلاۋالدى تۇعىرناماسى: «ساياسي بوستاندىقتار»، «ۇلتتىق بولمىس»، «ءسوز جۇزىندەگى ەمەس، ءىس جۇزىندەگى تاۋەلسىزدىك»، «جەمقورلىققا جول جوق»، «وركەنيەتتى ءارى حالىقشىل ەكونوميكا»، «باقۋاتتى ايماقتار – باقۋاتتى مەملەكەت» اتتى 6 بولىمنەن تۇرادى. اتالعان قۇجاتتا كانديدات حالىق ىقىلاسىنا بولەنىپ، پرەزيدەنتتىككە سايلانسا ەل دامۋىنىڭ تىڭ تەتىكتەرى مەن مەملەكەتتە بولاتىن جاعىمدى وزگەرىستەر كورسەتىلگەن.

ال سادىبەك تۇگەل سايلاۋالدى باعدارلاماسىن تانىستىرۋدى ەلوردانىڭ كىرەبەرىسىندەگى قۇلاگەر ەسكەرتكىشىنىڭ جانىندا جينالعان نۇر-سۇلتان قالاسى مەن شورتاندى اۋدانىنىڭ قۇرمەتتى اقساقالدارىمەن كەزدەسۋدەن باستادى. اتا جولىمەن ۇلكەندەردەن باتا الىپ، سايلاۋ ناۋقانىنا قىزۋ كىرىستى. بيىلعى جاستار جىلىندا جاس بۋىننىڭ بوس ۋاقىتىن قالاي وتكىزەتىندىگىن كوزىمەن كورىپ، ولارعا ادامگەرشىلىك پەن ىزگىلىك جايلى، وتانسۇيگىشتىك، ەلدىك ماسەلەسى تۇرعىسىندا ءسوز قوزعاعىسى كەلگەن سادىبەك تۇگەل ەلوردادا تۇنگى كلۋبتاردا وتكىزىلگەن قوعامدىق رەيدكە قاتىستى.

قر كەزەكتەن تىس پرەزيدەنت سايلاۋىنا قازاقستان كوممۋنيستىك حالىق پارتياسى اتىنان ۇسىنىلعان كانديدات جامبىل احمەتبەكوۆتىڭ سايلاۋالدى تۇعىرناماسى باستى 5 باعىتتان تۇرادى. ولار: «باتىستىڭ ىقپالى مەن جالعان قۇندىلىقتارىنان باس تارتۋ»، «بارلىق قاشقىن وليگارحتاردى سوتقا تارتۋ»، «كەدەيلىكپەن كۇرەس»، «كورشى ەلدەرمەن ەكونوميكالىق ينتەگراتسيا»، «ادىلەتتى سالىق سالۋدى ەنگىزۋ». ولار ەلدىڭ الەۋمەتتىك-ەكونوميكالىق دامۋ باعىتى مەن ىشكى جانە سىرتقى ساياساتقا قاتىستى ماسەلەلەردى قامتيدى.

«اق جول» دەموكراتيالىق پارتياسى اتىنان ۇسىنىلعان دانيا ەسپاەۆانىڭ سايلاۋالدى تۇعىرناماسى: «تۇراقتى دامۋ نەگىزى باسەكەلەستىك جانە جاپپاي كاسىپكەرلىكپەن اينالىسۋ»، «ۇلتتىق تاۋەلسىزدىك»، «جەمقورلىقپەن كۇرەس جانە وفشورسىزداندىرۋ» اتتى نەگىزگى ءۇش باعىتتان تۇرادى. وندا ەلىمىزدىڭ ىشكى جانە سىرتقى ساياساتى مەن الەۋمەتتىك-ەكونوميكالىق دامۋ باعىتتارىنا قاتىستى كانديداتتىڭ كوزقاراسى بەينەلەنگەن. د.ەسپاەۆا كاسىپكەرلىكتى جاپپاي دامىتۋعا دەن قويعان. ول ءوزىنىڭ سايلاۋالدى ۇگىت ناۋقانىن ەلىمىزدەگى ءىرى ناۋبايحانالاردىڭ ءبىرى الماتىداعى «اقساي-نان» جشس-نەن باستادى.

امانكەلدى تاسپيحوۆ جوسىقسىز جۇمىس بەرۋشىلەردىڭ جاۋاپكەرشىلىگىن ارتتىرۋعا، قاۋىپسىز ەڭبەك جاعدايىن جاساۋعا، جۇمىسشىلاردىڭ ەڭبەك قۇقىن قامتاماسىز ەتۋگە، لايىقتى ەڭبەكاقىنىڭ تولەنۋىنە، ەڭبەك ميگراتسياسىن رەتتەۋگە كۇش سالعالى وتىر.

قر پرەزيدەنتىنىڭ كەڭەسشىسى ەرلان قارين كانديداتتاردىڭ ۇگىت-ناسيحات جۇمىستارى قىزۋ ءجۇرىپ جاتقانىن ايتادى. «پرەزيدەنت ديالوگ پروتسەسىن دامىتۋ بويىنشا ءارتۇرلى باستامالاردى كوتەرىپ وتىر. بۇل – اۋقىمدى جۇمىستاردىڭ تەك باسى دەۋگە بولادى. ونىڭ جاڭا فورماتتارى دا كوپ بولماق. سول سەبەپتى، ساياسي پروتسەسس وتە بەلسەندى تۇردە جۇرۋدە»، – دەيدى ەرلان قارين. اقپارات جانە قوعامدىق دامۋ ءمينيسترى داۋرەن اباەۆ كانديداتتار اراسىندا تىكەلەي ەفيردە تەلەدەبات بولاتىنىن ايتتى. كانديداتتارعا داۋىس بەرۋ 9 ماۋسىم كۇنى 20:00 اياقتالىپ، ونان كەيىنگى 12 ساعات ىشىندە سايلاۋ قورىتىندىسى بەلگىلى بولادى.

«تۇركىستان-اقپارات»

سوڭعى جاڭالىقتار