15 مامىر 2019, 19:31 743 0 ءبىلىم دينارا مىڭجاسارقىزى

Henkel كومپانياسى بالالاردى قۋانتقان كۇن

 بالا – ەرەكشە كوڭىلدى قاجەت ەتەدى. بالا – جاقىندارىنان جىلۋ كۇتەدى. بالا الدىندا ماقساتقا جەتەلەيتىن ادامنىڭ بولعانىن قالايدى. ول سول ءۇشىن دە بالا. ال بالالار ۇيىندەگى تاربيەلەنۋشىلەردىڭ كوڭىلىن كىم اۋلايدى؟

وتكەن اپتانىڭ دەمالىس كۇنىندە «قازاقستاندى جاسىلداندىر» اتتى اكتسيا اياسىندا اعاش ەگۋ ءداستۇرى جالعاسىن تاپتى. بۇل شارانىڭ باسقا ەمەس، الماتى وبلىستىق №1 بالالار ۇيىندە ءوتۋى بالالارعا قۋانىش سىيلادى. ءارى ءتۇرلى كوكجيەكتى كەڭەيتەتىن ويىندار ويناپ، ءبىر سەرگىپ قالدى. ماسەلەن، شارانى ۇيىمداستىرۋشىلار بالالارعا بۇگىندە الەم ەلدەرى بەت بۇرعان جاسىل ەكونوميكا تۋرالى جان-جاقتى مالىمەت بەردى. بولاشاقتا ءبىزدىڭ ەلىمىز دە تابيعاتتى لاستامايتىن وسى جولدى تاڭدايتىنىنا سەنىم بىلدىرە كەلە، بالالاردىڭ اراسىنان ەكولوگيانىڭ تازا بولۋىن قامتاماسىز ەتەتىن، قورشاعان ورتانى قۇرمەت تۇتاتىن ماماندىق يەلەرى شىعۋى ءۇشىن از دا بولسا قىزىعۋشىلىقتارىن وياتۋعا تىرىستى. شىن مانىندە، الەمدە ءبىز بىلمەيتىن «جاسىل» ماماندىق يەلەرى قانشاما؟! ولار قازىردىڭ وزىندە ۇلكەن سۇرانىسقا يە. سوندىقتان دا تاربيەلەنۋشىلەرگە وسى سالا جايلى جان-جاقتى مالىمەت بەرگەن كاسىبي ارحيتەكتور ەكولقالاشىقتاردى جوبالاۋ تۋرالى كەڭىنەن اڭگىمەلەپ بەردى. بۇدان كەيىن بالالار ءۇيىنىڭ تاربيەلەنۋشىلەرى مەن قاتىسۋشىلار «جاسىل الماتىنىڭ» ماكەتىن ءار قىرىنان جاساپ، تانىستىردى. ءبىرى - جاسىلدانعان اۋەجاي سالسا، ەندى ءبىرى جاسى الەمنەن سىر شەرتەتىن ساۋدا ءۇيىن تۇرعىزدى. تاعى ءبىر جاسىل پولويتسيا بەكەتىن ۇسىندى. 5 توپقا ءبولىنىپ، جۇيرىك قيالدارىن جۇگىرتە بىلگەن بالالار ءۇشىن بۇل ەرەكشە جاتتىعۋ بولدى.

الماتى وبلىستىق №1 بالالار ءۇيىنىڭ ديرەكتورى گۇلميرا سانسىزبايقىزى: «بۇل اكتسيانىڭ ءبىزدىڭ بالالار ۇيىندە وتكەنىنە ءدان ريزامىز. اۋلامىزدىڭ جاسىلعا بولەنگەنى ءبىزدى دە قۋانتادى. 40 اعاش ەگىلدى. ەندى ءار بالا ءار اعاشقا ات قويىپ الادى. ءتىپتى، ولارعا وزدەرىنىڭ ءىنىسى، قارىنداسى سياقتى قارايتىنىنا سەنىمدىمىن. كەز كەلگەن بالا ءبىر-بىرىنە قامقورلىق جاساۋدى وسى اعاشتى باپتاۋدان ۇيرەنەدى»، –  دەيدى.

«قازاقستاندى جاسىلداندىر» اكتسياسىن وسىمەن بەسىنشى مارتە ۇيىمداستىرعان Henkel كومپانياسى شارانى Small ساۋدا جەلىسىمەن بىرلەسىپ وتكىزىپ كەلەدى. 8 ءساۋىر مەن 5 مامىر ارالىعىندا Persil, Perwoll,Vernel, Bref, Somat ساۋدا بەلگىسىندەگى تاۋاردى ساتىپ العان جاعدايدا ونىڭ 50 تەڭگەسى جاسىلداندىرۋدى قولداۋعا جونەلتىلدى. Henkel كومپانياسى ۇيىمداستىرعان اكتسيانىڭ ارقاسىندا الماتى، نۇر-سۇلتان، پاۆلودار، تاراز قالاسىندا 1705 اعاش وتىرعىزىلدى. بۇل قالالاردا بيىل تاعى دا 150 اعاش ەگىلەدى.

سوڭعى جاڭالىقتار