15 مامىر, 17:56 1042 0 ادەبيەت احمەت ومىرزاق

 ۇستاز اقىن – ۇلاعاتتى تۇلعا 

قاراساي اۋداندىق ورتالىق كىتاپحاناسىندا وسى اۋدانعا قاراستى كولىاششى اۋلىنىڭ تۇرعىنى، اقىن ماقسات السەيىتوۆپەن شىعارماشىلىق كەزدەسۋ كەشى ءوتتى.

كەزدەسۋگە باق وكىلدەرى، مۇعالىمدەر، كىتاپحانا قىزمەتكەرلەرى مەن مەكتەپ وقۋشىلارى قاتىسىپ، ادەبيەت پەن ونەر، ءبىلىم مەن تاربيە تۋرالى اقىننىڭ ويلارىن تىڭدادى.

كەزدەسۋدە اقىن ماقسات السەيىتوۆ قاتىسۋشىلاردىڭ سۇراقتارىنا جاۋاپ بەرىپ، ليريكالىق ولەڭدەرىن وقىدى. سونداي-اق قاراساي اۋدانىنداعى ى.التىنسارين، كولىاششى ورتا مەكتەپتەرىنىڭ وقۋشىلارى اقىن جىرلارىنان ءۇزىندى وقىپ، كەش يەسىنە قۇرمەت كورسەتتى.

كەزدەسۋگە قاتىسقان رەسپۋبليكالىق بەلدى باسىلىمداردا قىزمەت اتقارعان بەلگىلى جۋرناليست قالباي ءادىل، قاراساي اۋداندىق «زامان جارشىسى» گازەتىنىڭ باس رەداكتورى اتلانا يساەۆا، ت.ب. ءسوز سويلەپ، اقىننىڭ شىعارماشىلىعى تۋرالى ويلارىن ايتتى.

كەش سوڭىندا اۋداندىق مادەنيەت ءۇيىنىڭ ونەرپازدارى ونەر كورسەتىپ، ءان مەن كۇيدەن شاشۋ شاشتى.

ماقسات السەيىتوۆ 1965 جىلى دۇنيەگە كەلگەن. جوعارى ءبىلىمدى ۇستاز. جاستايىنان ادەبيەتپەن اينالىسىپ، ولەڭدەر، ماقالالار جازىپ كەلەدى. سونداي-اق ءتۇرلى دەڭگەيدەگى ايتىسقا قاتىسىپ، جۇلدەلى ورىندارعا يە بولعان. 2013 جىلى استانا قالاسىندا وتكەن «جارقىرا، جاينا، استانا!» اتتى جىر ءمۇشايراسىندا جۇلدەلى ءۇشىنشى ورىن العان.

2015 جىلى «اتاجۇرت» باسپاسىنان «جەتىمسايدىڭ بويىندا جەتىم اۋىل» اتتى ولەڭدەر مەن پوەمالار جيناعى باسىلىپ شىقتى. 

سوڭعى جاڭالىقتار