15 مامىر, 16:48 117 0 جاھان Turkystan Support

 ەڭبەك ونىمدىلىگىن اقىلدى فەرمەرلەر ارتتىرعان

وڭتۇستىك كورەيادا «اقىلدى فەرمالار» پايدا بولعالى بەرى اۋىلشارۋاشىلىق سالاسىندا ەڭبەك ونىمدىلىگى 33 پروتسەنتكە ارتتى. سالا مينيسترلىگىنىڭ دەرەگى وسىنداي. الايدا جەرگىلىكتى فەرمەرلەر ءۇشىن بىلىكتى ماماندار تاپشى.

سەۋل قالاسىنان 50 شاقىرىم قاشىقتىقتا ورنالاسقان جىلىجاي كەشەنىندە قىزاناق وسىرىلەدى. ءونىمنىڭ جارتىسى جەرگىلىكتى جەردە ساتىلادى، قالعانى جاپونياعا ەكسپورتتالادى. بۇل جىلىجايعا كىرۋ ءۇشىن ارنايى كيىم مەن قولعاپ كيىپ، دەزينفەكتسيادان ءوتۋ كەرەك. جۇمىستى كومپيۋتەرلەردىڭ كومەگىمەن وپەراتورلار باسقارادى. قىزمەتكەرلەردىڭ كوبىن روبوتتار الماستىرعان.

ادامدار تەك جاساندى ينتەللەكتتىڭ قولىنان كەلمەيتىن جۇمىستاردى اتقارادى. پىسكەن قىزاناقتاردى جيناپ، تۇرىنە قاراپ ىرىكتەيدى جانە قوراپتارعا سالادى.

«اقىلدى جۇيەلەر ەنگىزىلگەننەن كەيىن شىعىن 20 پروتسەنتكە ازايدى. ءوندىرىسىمىزدى كەڭەيتۋدى كوزدەپ وتىرمىز. كانۆوندو پروۆينتسياسىندا تاعى ءبىر كەشەن اشامىز. جىلىجاي اۋدانى – ون جارىم گەكتار. ونىڭ بىرەگەي ەرەكشەلىگى، سۋىقتا گاز، ال جىلى ۋاقىتتا جەل ەنەرگياسىن پايدالانادى. شاتىرىندا كۇن ساۋلەسىنىڭ مولشەرىن رەتتەيتىن اسپاپتار ورناتىلعان»، دەيدى كومپانيا ءبولىمىنىڭ باسشىسى يۋ حيون سون.

مۇندا ادامنىڭ باسقارۋىنسىز جۇرەتىن اربالار دا بار. ىشىندە مۋزىكا وينايدى. بىراق بۇل وسىمدىكتەردىڭ جاقسى ءونۋى ءۇشىن ەمەس، قىزمەتكەرلەردىڭ كوڭىلىن كوتەرۋگە ارنالعان. دەگەنمەن وڭتۇستىككورەيالىق جاستار فەرمەرلىك كاسىپپەن اينالىسۋعا قۇلىقسىز. بۇل جۇمىستى ولار اۋىر ءارى تاۋەكەلى كوپ ءىس سانايدى.

سونىمەن قاتار كوكونىس پەن جەمىس ءوسىرۋ ءۇشىن اۋىلدا تۇرۋ كەرەك. سول سەبەپتى سوڭعى 10 جىلدا 40 جاسقا جەتپەگەن فەرمەرلەردىڭ سانى ازايدى. ال اۋىل شارۋاشىلىعى مينيسترلىگى اقىلدى فەرمالار سالاعا جاستاردى تارتۋعا سەپتىگىن تيگىزەدى دەپ سانايدى.

«سمارت-فەرمالارعا قولداۋ جاسايمىز. سوڭعى بەس جىلدا ولاردىڭ اۋدانى 10 ەسە، 400-دەن 4 مىڭ گەكتارعا دەيىن ارتقان. الداعى ءۇش جىلدا بۇل كورسەتكىشتى 7 مىڭ گەكتارعا دەيىن جەتكىزۋ جوسپارىمىزدا بار. ال بىلىكتى ماماندار دايىنداۋ ماسەلەسىن جاڭا وقۋ كەشەنى شەشۋى ءتيىس»، دەيدى كورەيا اۋىل شارۋاشىلىعى مينيسترلىگى ءبولىمىنىڭ جەتەكشىسى چون چون حي.

ءۇش جىلدان كەيىن وسىنداعى ءبىلىم ورداسىن 500 فەرمەر بىتىرەدى. ولار اقىلدى جىلىجايلاردى قالاي باسقارۋ كەرەكتىگىن ۇيرەنەدى. بۇل ماقساتقا بيۋدجەتتەن 7 ميلليون 780 مىڭ دوللاردان استام قاراجات بولىنەدى.

سوڭعى جاڭالىقتار