15 مامىر 2019, 16:31 517 0 ايماق "تۇركىستان" گازەتىنىڭ اۆتورلارى

سپورتشى قاراعاندىدا اكروباتيكانى دامىتقىسى كەلەدى

قاراعاندىلىق سپورتشى نيكيتا اموسكين ايماقتا سپورتتىق اكروباتيكانى دامىتۋدى كوزدەپ وتىر. الەمنىڭ بىرنەشە دۇركىن چەمپيونى  جاس سپورتشىلارعا تالىمگەر بولۋ ءۇشىن قازىر جوعارى وقۋ ورنىندا ءبىلىمىن شىڭداۋدا. سونىمەن قاتار نيكيتا – «قازاقستاننىڭ 100 جاڭا ەسىمى» جوباسىنا ىلىنگەن جاستاردىڭ ءبىرى.

ن.اموسكين قاراعاندى قالاسىندا وتەتىن جاتتىعۋلارىنا كۇندەلىكتى نوۆودولينسك ەلدى مەكەنىنەن كەلەدى. سپورتشى اپتاسىنا التى رەت 3-4 ساعاتتان جاتتىعادى. 19 جاسار نيكيتا اموسكين مەن 16 جاستاعى اناستاسيا دولگانيۋك جاستار اراسىندا اكروباتيكادان وتكەن الەم چەمپيوناتىندا التىن مەدالعا يە بولدى.

«الەمدىك جارىستاردا چەمپيون بولۋ وڭاي ەمەس، قاسىڭداعى سەرىكتەسىڭ دە سەنىمدى بولۋى ءتيىس»، دەيدى جاس سپورتشى. سول سەبەپتى سپورتتىق جۇپتىڭ جاسى، سالماعى مەن بويى ۇيلەسىمدى، بەلگىلەنگەن تالاپتارعا ساي بولعانى ابزال. سونداي-اق  سەرىكتەستەردىڭ ءوزارا پسيحولوگيالىق ۇيلەسىمدىلىگى دە ماڭىزدى.

«ءبىز اناستاسيا دولگانيۋكپەن 8 جىل جۇپ بولىپ ونەر كورسەتىپ كەلەمىز. بۇل ۋاقىت ىشىندە بىرنەشە رەت قازاقستان، ەكى مارتە ازيا چەمپونى اتاندىق. 2018 جىلى سپورتتىق اكروباتيكادان الەم چەمپيونى اتاعىنا يە بولدىق. ارينە، ارامىزدا تۇسىنىسپەۋشىلىك تە بولىپ تۇرادى، جاتتىعۋلار كەزىندە داۋلاسىپ تا جاتامىز. دەگەنمەن، سەرىكتەس بولعاننان كەيىن ءتىل تابىسىپ كەلەمىز»، دەيدى «قازاقستاننىڭ 100 جاڭا ەسىمى» جوباسىنىڭ قاتىسۋشىسى نيكيتا اموسكين.

باستاپقىدا نيكيتا اتاسىنىڭ جولىن قۋىپ، گرەك-ريم كۇرەسىنە بەت بۇرعان ەكەن. ال اكروباتيكاعا تەك 9 جاسىندا كەلگەن. بۇگىن ونىڭ قورجىنىندا 70 مەدال بار.

جاتتىقتىرۋشىسى بوتاكوز بايباقۇشەۆانىڭ ايتۋىنشا، نيكيتا كەلگەن بويدا دايىندىق توبىندا جۇرگەن. ءوزىنىڭ ۇستامدىلىعى جانە بىربەتكەيلىگىمەن بىردەن كوزگە ءتۇسىپتى.

«تىنىمسىز ەڭبەك ەتىپ، از ۋاقىتتىڭ ىشىندە جاقسى جەتىستىكتەرگە قول جەتكىزدى. ونىڭ بولاشاعىنان زور ءۇمىت كۇتەمىز، سپورتتا باعىندىرار بيىگى ءالى الدا. نيكيتا – وتباسىنداعى ەكى بالانىڭ كەنجەسى. قازىر قاراعاندى مەملەكەتتىك ۋنيۆەرسيتەتىنىڭ دەنە شىنىقتىرۋ فاكۋلتەتىندە وقيدى. ونىڭ ەندىگى ارمانى – سپورتتىق اكروباتيكانى دامىتۋعا بارىنشا ۇلەس قوسىپ، جاسوسپىرىمدەرگە جاتتىقتىرۋشى بولۋ»، دەيدى بوتاكوز بايباقۇشەۆا.

اسحات رايقۇل

سوڭعى جاڭالىقتار