15 مامىر, 11:55 250 0 ونەر TURKYSTAN.KZ

ەرجان ماكسيم رەسەيدە وقيدى

رەسەيدىڭ «گولوس دەتي» بايقاۋىنا قاتىسىپ، كورەرمەن كوزايىمىنا اينالعان ەرجان ماكسيم رەسەي جەرىندە ءبىلىمىن جالعاستىرماق. ناقتىراق ايتساق، رف حالىق ءارتىسى، كومپوزيتور ءارى پروديۋسەر يگور كرۋتوي قازاقستاندىق جاس ءانشى ەرجان ماكسيمگە ءوزىنىڭ مۋزىكالىق اكادەمياسىنا وقۋعا ءتۇسىپ، ءبىلىمىن شىڭداۋدى ۇسىنعان.

ەرجان جۋىردا رەسەي فەدەراتسياسىنداعى قازاقستان رەسپۋبليكاسىنىڭ توتەنشە جانە وكىلەتتى ەلشىسى يمانعالي تاسماعامبەتوۆتىڭ قابىلداۋىندا بولدى. كەزدەسۋ بارىسىندا قازاقستاندىق جاس ءانشىنىڭ شىعارماشىلىق جوسپارى تالقىلانعان. ەرجان «گولوس. دەتي» جوباسىنا قاتىسقاننان كەيىن ومىرىندە قانداي وزگەرىس بولعانىن جانە الداعى ۋاقىتتا نەمەن اينالىسۋدى جوسپارلاپ جۇرگەنىن ايتتى.

ال، Instagram جەلىسىندە ە. ماكسيم: «دوستار، ماسكەۋگە جاساعان ساپارىم ءساتتى بولدى. نەگە دەيسىز عوي. مەن ەڭ الدىمەن، ەلىمىزدىڭ اپتال ازاماتى يمانعالي نۇرعاليۇلىمەن كەزدەستىم. سول كەزدەسۋىمىزدىڭ ناتيجەسى رەتىندە كوپتەن بەرى ارمانداپ جۇرگەن اتاقتى كومپوزيتور، پروديۋسەر يگور كرۋتويمەن تانىستىم. ستۋديادا تىڭداعان ماەسترو مەنى ۇناتىپ، ءوزىنىڭ مۋزىكالىق اكادەمياسىنا شاقىردى. مەن قۋانا كەلىستىم. ەندى، دوستار، كۇزدەن باستاپ سول جەردە ۆوكال باعىتى بويىنشا ونەرىمدى شىڭدايتىن بولامىن. ارينە، مۇنىڭ بارلىعى يمانعالي اعامىزدىڭ ارقاسى دەپ بىلەمىن. وسىنداي ازاماتتاردىڭ ارقاسىندا شىعارماشىلىعىم جالعاسىپ، جەمىسىن بەرەتىنىنە سەنىمىم مول»، – دەپ جازدى ەرجان.

سوڭعى جاڭالىقتار