14 مامىر 2019, 15:46 567 0 ەكولوگيا Túrkistan Gazeti

كىشى ارالدان ايىرىلىپ قالماۋ كەرەك

پرەزيدەنت قاسىم-جومارت توقاەۆ ۇكىمەت پەن قىزىلوردا وبلىسىنىڭ اكىمدىگىنە كىشى ارالدان ايىرىلىپ قالماۋ شارالارىن قولعا الۋدى تاپسىردى.

«حالىق ارال تاعدىرىنا الاڭدايدى. ەلباسىنىڭ باستاماسى بويىنشا «سىرداريا ارناسىن رەتتەۋ جانە ارال تەڭىزىنىڭ سولتۇستىك بولىگىن ساقتاپ قالۋ» جوباسى ىسكە اسىرىلۋدا. وسى جوبانىڭ جانە كوكارال بوگەتىنىڭ ارقاسىندا كىشى ارالداعى سۋ قالپىنا كەلدى»، – دەدى ق.توقاەۆ قىزىلوردا ءوڭىرىنىڭ جۇرتشىلىعىمەن كەزدەسۋ بارىسىندا.

بۇل رەتتە، مەملەكەت باسشىسى كىشى ارالدىڭ الداعى تاعدىرىنا الاڭداۋشىلىق ءبىلدىردى. «ماسەلەلەر مۇنىمەن شەكتەلمەيدى. كوكارال بوگەتىنىڭ تومەنگى جاعىن سىرداريا اعىنى بۇزىپ جاتىر. دەرەۋ قولعا الماساق، كىشى ارالدان ايىرىلىپ قالۋىمىز مۇمكىن. وسى ۋاقىتقا دەيىن جينالعان 27 ملرد تەكشە مەتر سۋ زايا كەتپەۋى كەرەك. ۇكىمەت پەن اكىمدىككە شارالار قابىلداۋدى تاپسىرامىن»، - دەدى پرەزيدەنت.

سونداي-اق ق.توقاەۆ اۋىلدىق جەرلەردەگى ينفراقۇرىلىمدى جاڭعىرتۋ ماسەلەسىنە نازار اۋداردى. «جەرگىلىكتى جولدار، سۋ قۇبىرلارى، ەلەكتر جەلىلەرى، مادەني-سپورتتىق كەشەندەر - بارلىعى جاڭارۋى قاجەت. اتالعان باعىتتا وبلىس باسشىلىعى جوبا جوسپارلارىن دايىنداۋى ءتيىس»، - دەدى ول.

ال بيزنەستى قولداۋ شارالارىنا قاتىستى «كاسىپكەرلەردى ودان ءارى دەمەۋ ءۇشىن جاڭا كاسىپورىندارعا 3 جىلدىق ينۆەستيتسيالىق سالىق نەسيەلەرىن ۇسىنامىز. بۇل باستاما ولارعا نارىقتا ورنىعىپ، بيزنەسىنىڭ ىرگەسىن نىعايتۋعا مۇمكىندىك بەرەدى»، - دەدى.

تەگتەر ارال تەڭىزى

سوڭعى جاڭالىقتار