13 مامىر 2019, 13:48 720 0 سىرتقى ساياسات دينارا مىڭجاسارقىزى

ەقىۇ وزبەكستاندا تاۋەلسىز سايتتاردىڭ قايتا اشىلۋىن قۇپتايدى

ەۋروپاداعى قاۋىپسىزدىك جانە ىنتىماقتاستىق ۇيىمىنىڭ ءباسپاسوز ەركىندىگى جونىندەگى وكىلى ارلەم دەزير وزبەكستاندا سايتتاردىڭ قايتا اشىلۋىن جىلى قابىلداپ، قۇپتادى. ول بۇل ماسەلەنى وزبەكستان بيلىگىمەن كەزدەسۋدە قوزعاعانىن ايتتى.

وزبەكستاندا Voice of America ("امەريكا داۋىسى"), Amerika ovozi, BBC Uzbek, Deutsche Welle, Amnesty International, Human Rights Watch, Reporters sans frontieres, Eurasianet.org, AsiaTerra, Fergana Agency, Centre1, Uzmetronom جانە وزگە دە شەتەلدىڭ جاڭالىق تاراتاتىن ۆەب-سايتتارى تولىق اشىلىپ، جۇمىس ىستەپ تۇر.

ازاتتىقتىڭ وزبەك قىزمەتىنىڭ سايتى - وزودليك راديوسى "قايتا اشىلعان" رەسۋرستار تىزىمىندە بولمادى.

ەقىۇ وكىلى ارلەم دەزير جاقىن ارادا وزبەكستاندا ازاتتىقتىڭ وزبەك قىزمەتى سايتىنىڭ دا اشىلاتىنىنا ءۇمىت ءبىلدىردى.

وزبەكستان پرەزيدەنتى اكىمشىلىگى جانىنداعى اقپارات جانە قوعامدىق كوممۋنيكاتسيا اگەنتتىگىنىڭ ديرەكتورى كوميل اللامجونوۆ Facebook-تاعى پاراقشاسىندا بۇل سايتتاردىڭ "تەحنيكالىق اقاۋلارعا" بايلانىستى جابىق بولعانىن جازدى.

"زەرتتەۋ قورىتىندىسى بويىنشا وزبەكستاندا اتالعان ۆەب-رەسۋرستاردىڭ تولىق جۇمىس ىستەۋىنە كەدەرگى جاساعان بەلگىلى ءبىر تەحنيكالىق اقاۋلار انىقتالدى جانە ولاردى جويۋ بويىنشا قاجەتتى شارالار قولدانىلدى", - دەپ اتاپ وتكەن شەنەۋنىك.

جوعارىدا اتالعان سايتتار وزبەكستان اۋماعىندا 2005 جىلى مامىر ايىندا بولعان ءاندىجان وقيعاسىنان كەيىن جابىلعان. 2005 جىلى 13 مامىردا ءاندىجان قالاسىندا الاڭعا شىققان جۇرتقا وزبەكستان پوليتسياسى وق جاۋدىرىپ، رەسمي دەرەك بويىنشا 187 ادام قازا تاپتى. قۇقىق قورعاۋ ۇيىمدارى مەن وقيعا كۋاگەرلەرى قازا تاپقانداردىڭ سانى ودان دا كوپ ەكەنىن ايتادى.

 

سوڭعى جاڭالىقتار