13 مامىر 2019, 11:42 697 0 ءبىلىم دينارا مىڭجاسارقىزى

ۇبت-عا قاتىسۋعا قۇجاتتاردى قابىلداۋ اياقتالدى

10 مامىردا ۇلتتىق بىرىڭعاي تەستىلەۋگە قاتىسۋعا وتىنىشتەردى قابىلداۋ اياقتالدى. بۇل تۋرالى ۇلتتىق تەستىلەۋ ورتالىعىنىڭ رەسمي سايتىندا حابارلاندى. اقپاراتقا سايكەس، 1 ءساۋىر مەن 10 مامىر ارالىعىندا ۇبت-عا وتىنىمدەر كەلەسى قاتىسۋشىلاردان قابىلداندى:  

-         قالاۋى بويىنشا رەسپۋبليكالىق بيۋدجەت نەمەسە جەرگىلىكتى بيۋدجەت قاراجاتى ەسەبىنەن ءبىلىم گرانتىن بەرۋ كونكۋرسىنا قاتىسۋ ءۇشىن نەمەسە جوو-عا اقىلى نەگىزدە وقۋعا قابىلدانۋ ءۇشىن نەمەسە رەسپۋبليكالىق بيۋدجەت قاراجاتى ەسەبىنەن مەملەكەتتىك ءبىلىم بەرۋ تاپسىرىسى بويىنشا وقۋ ءۇشىن ورتا ءبىلىم بەرۋ ۇيىمدارىنىڭ اعىمداعى جىلعى بىتىرۋشىلەرىنەن; -         رەسپۋبليكالىق بيۋدجەت نەمەسە جەرگىلىكتى بيۋدجەت قاراجاتى ەسەبىنەن ءبىلىم گرانتىن بەرۋ كونكۋرسىنا قاتىسۋ نەمەسە جوو-عا اقىلى نەگىزدە وقۋعا قابىلدانۋ ءۇشىن ورتا ءبىلىم بەرۋ ۇيىمدارىنىڭ وتكەن جىلعى بىتىرۋشىلەرى مەن تەحنيكالىق جانە كاسىپتىك نەمەسە ورتا بىلىمنەن كەيىنگى ءبىلىم بەرۋ ۇيىمدارىنىڭ بىتىرۋشىلەرىنەن;

-         رەسپۋبليكالىق بيۋدجەت نەمەسە جەرگىلىكتى بيۋدجەت قاراجاتى ەسەبىنەن ءبىلىم گرانتىن بەرۋ كونكۋرسىنا قاتىسۋ ءۇشىن جوعارى ءبىلىمنىڭ قىسقارتىلعان وقىتۋ مەرزىمدەرىن كوزدەيتىن ءبىلىم بەرۋ باعدارلامالارى بويىنشا وقۋعا تۇسەتىن تەحنيكالىق جانە كاسىپتىك نەمەسە ورتا بىلىمنەن كەيىنگى ءبىلىم ۇيىمدارىنىڭ بىتىرۋشىلەرىنەن. ۇلتتىق تەستىلەۋ ورتالىعىنىڭ مالىمەتىنشە، 10 مامىر مەن 5 ماۋسىم ارالىعىندا ۇبت-عا وتىنىشتەر قابىلداۋ جالعاسادى. بىراق قۇجاتتاردى كەلەسى ساناتتاعى بىتىرۋشىلەر عانا تاپسىرا الادى:

-         رەسپۋبليكالىق بيۋدجەت نەمەسە جەرگىلىكتى بيۋدجەت قاراجاتى ەسەبىنەن ءبىلىم گرانتىن بەرۋ كونكۋرسىنا قاتىسۋ ءۇشىن نەمەسە جوو-عا اقىلى نەگىزدە وقۋعا قابىلدانۋ ءۇشىن حالىقارالىق الماسۋ جەلىسى بويىنشا شەتەلدە ءبىلىم العان ورتا ءبىلىم بەرۋ ۇيىمدارىنىڭ بىتىرۋشىلەرى مەن شەتەلدە ءبىلىم العان، قازاقستان رەسپۋبليكاسىنىڭ ازاماتى بولىپ تابىلمايتىن، ۇلتى قازاق ازاماتتار.

ايتا كەتەيىك، ۇبت 2019 جىلعى 20 ماۋسىم مەن 5 شىلدە ارالىعىندا وتەدى. ماۋسىم ايىنداعى ۇبت سەرتيفيكاتى ءبىلىم بەرۋ گرانتىن بەرۋ كونكۋرسىنا قاتىسۋعا نەمەسە جوعارى وقۋ ورنىنا اقىلى نەگىزدە قابىلدانۋعا مۇمكىندىك بەرەدى. وتىنىشتەر ۇبت وتكىزۋ پۋنكتتەرىندە جانە جەلىلىك جوعارى وقۋ ورىندارىندا قابىلدانادى. اعىلشىن ءتىلىن مەڭگەرگەندىگىن راستايتىن حالىقارالىق سەرتيفيكاتتارى بار تۇلعالار «شەت ءتىلى (اعىلشىن ءتىلى)» ءپانى بويىنشا ۇبت-دان بوساتىلادى. «2019 جىلدان باستاپ ءبىلىم گرانتتارى ءبىلىم بەرۋ باعدارلامالارىنىڭ توپتارى بويىنشا بەرىلەتىن بولادى. ءبىلىم بەرۋ باعدارلامالارىنىڭ توبىنا بىرنەشە باعدارلاما كىرەدى. جوعارى وقۋ ورنىنا قابىلداۋ كەزىندە وقۋعا تۇسۋشىلەر ودان ءارى وقۋ ءۇشىن ناقتى ءبىلىم بەرۋ باعدارلاماسىن تاڭدايدى. تۇسۋشىلەردىڭ ءبىلىم بەرۋ گرانتتارىن بەرۋ كونكۋرسى كەزىندە بەيىندىك پاندەرى سايكەس كەلگەن جاعدايدا 4 ءبىلىم باعدارلاماسى توپتارىنا دەيىن تاڭداۋعا مۇمكىندىگى بار»، - دەلىنگەن ورتالىق مالىمەتىندە. بۇعان دەيىن حابارلاعانىمىزداي، بيىلدان باستاپ بىتىرۋشىلەر جوو-عا اقىلى نەگىزدە ءتۇسۋ ءۇشىن ۇبت-نى جىلىنا 4 رەت (قاڭتار، ناۋرىز، ماۋسىم، تامىز) تاپسىرا الدى. ال گرانت بويىنشا ءبىلىم الۋ ءۇشىن الداعى ماۋسىم ايىنداعى ۇبت-عا قاتىسۋ قاجەت.

سوڭعى جاڭالىقتار