10 مامىر, 17:24 443 0 ونەر تاڭسۇلۋ الدابەرگەنقىزى

دجەكي چان: قازاقستاننىڭ تابيعاتى ۇنايدى

كەز كەلگەن كورەرمەننىڭ، ونىڭ ىشىندە جاسوسپىرىمدەردىڭ گولليۆۋد كينو جۇلدىزدارى جايلى ايتىلا قالسا، ەڭ ءبىرىنشى دجەكي چان ەسىنە تۇسەرى حاق. اتاقتى ءارتىس، كاسكادەر، كينورەجيسسەر، پروديۋسەر، ستسەناريست ءارى ءانشى ءبىر سۇحباتىندا: «مەن، اكتەر بولىپ تۋعان جوقپىن. ءبارى دە بىرتىندەپ قالىپتاستى. ادامدارمەن جاقسى قارىم-قاتىناستا بولۋ – كەز كەلگەن ءتۇيىندى وڭاي شەشەتىنى سەكىلدى، ەشكىمدى جاتىرقامايتىن وسى اشىق مىنەزىم ونەرىمە دە كوپ پايداسىن تيگىزدى. ارينە، ەڭبەكسىز، ىزدەنىسسىز تاعى بولمايتىنى بەلگىلى. ءار بالا سياقتى مەنىڭ دە بويىمدا اتىس-شابىس كينولەنتالارعا دەگەن قىزىعۋشىلىق ماحابباتى باسىم بولعان ءتارىزدى»، – دەگەنى بار.
گونكونگ قالاسىندا كەدەي وتباسىندا دۇنيەگە كەلگەن تانىمال اكتەر اتا-اناسى تاقىر كەدەي بولعاندىقتان بالالىق شاعىندا ازاپتى قيىن كۇندەردى باسىنان كوپ كەشىرگەن. كەيىن اتا-اناسىنا اۆستراليادان جۇمىس تابىلىپ قونىس اۋدارعان كەزدە، التى جاسار دجەكي ءوز وتانىندا قالىپ، قىتاي جابىق دراما اكادەمياسىنا وقۋعا قابىلدانعانى ونىڭ باقىتتى بولاشاعىنا باستاعان تۇڭعىش قادامى ىسپەتتى. ول كەزدە اكادەمياعا وقۋشىلاردى قابىلداۋ وتە قاتاڭ تۇردە، ول بالانىڭ اتا-اناسىنان بالا دەنە جاراقاتىن الىپ نەمەسە قايتىس بولىپ كەتكەن جاعدايدا وقۋ ورنى جاۋاپكەرشىلىككە تارتىلمايتىنى جايلى قولحات الادى ەكەن. وسىنداي اسا قاتاڭ ءتارتىپتىڭ تەزىنە تۇسكەن بالا- اكتەر تاڭعى ساعات بەستە تۇرىپ، ساعاتتاپ تىنىمسىز جاتتىعۋلاردا شىڭدالۋدان وتەدى. شىڭدالادى. شيرىعادى. اكادەميانى بىتىرگەن سوڭ كينوداعى جولىن كاسكادەرلىكتەن باستاعان قايسار دجەكي چان اكتەرلىك ومىرىندە دە باسىن تالاي قاتەرگە تىگىپ، كەزىندە ەكى ومىرتقاسىن، مۇرنىن، اياق-قولىن تالاي سىندىرعان. كەڭىردەگىن جارالاپ، جانارىنان دا ايىرىلىپ قالا جازداعان اكتەردىڭ باس سۇيەگىن سىندىرىپ، ءولىم اۋزىنان امان قالعانىن بىرەۋ بىلسە، ءتىپتى بىرەۋ بىلمەس.
كينەماتوگرافياعا زور ۇلەس قوسقانى ءۇشىن قۇرمەتتى «وسكار» سىيلىعىن العان اكتەر ءبىزدىڭ ەلىمىزگە دەگەن قىزىعۋشىلىعى دا كەرەمەت ەكەنىن ءساۋىر ايىندا وتكەن ەلباسىمەن كەزدەسۋىندە تاعى دا تىلگە تيەك ەتتى. اڭگىمە بارىسىندا اكتەردىڭ الەمدىك كينەماتوگرافياداعى ماڭىزدى ءرولى ەرەكشە اتالىپ، ەكى ەل اراسىنداعى شىعارماشىلىق جوسپار جانە كينويندۋستريا سالاسىنداعى بىرلەسكەن جوبالاردى جۇزەگە اسىرۋ جولدارى جايلى وي ءبولىستى.
– قازاقستان تابيعاتى كەرەمەت مەملەكەت. مۇندا ورمان-توعاي، تاۋ، وزەن-كول، ۇشى-قيىرى جوق شەكسىز كەڭ دالا دا بار. مەنى قىزىقتىراتىن دا وسىنداي كەرىم تابيعات. سوندىقتان بيىلعى جىلى تۇسىرىلمەك فيلمىمە وسى ءبىر پەيزاجداردى تارتسام دەگەن جوسپارىم بار. قازاقستاندا فيلم تۇسىرۋگە، اسىرەسە سيرياداعى قازاقستاندىق بالالاردى قورعاعان «جۋسان» ارنايى وپەراتسياسىنىڭ ۆيدەوسىن كورىپ، تاماشالاعاننان كەيىن شەشىم قابىلدادىم. گولليۆۋد، قىتاي كينوجۇلدىزدارى قاتىساتىن بۇل ءفيلمنىڭ كەيبىر كورىنىستەرى فرانتسيا مەن يزرايلدە تۇسىرىلمەك. كوز تارتار پەيزاجعا باي قازاقستاننىڭ گەوگرافياسىنا دەگەن سۇيىسپەنشىلىك الدىما وسىنداي ماقسات قويۋعا جەتەلەدى، سوندىقتان دا قازاقستانعا ساپاردى مامىر ايىنا، ال ءفيلمنىڭ تۇساۋىن قىركۇيەك ايىندا كەسسەك دەگەن وي بار،– دەيدى دجەكي چان اعىنان جارىلا.

 

تاڭسۇلۋ الدابەرگەنقىزى

سوڭعى جاڭالىقتار