10 مامىر, 16:44 354 0 قوعام "تۇركىستان" گازەتىنىڭ اۆتورلارى

«نۇرلى جول»: كۇرە جولدار جوندەلدى

«نۇرلى جول» مەملەكەتتىك باعدارلاماسىنىڭ نەگىزگى جوبالارى – رەسپۋبليكالىق ماڭىزداعى اۆتوموبيل جولدارىنىڭ قۇرىلىسى مەن رەكونسترۋكتسياسى. جالپى قولدانىستاعى قازاقستان رەسپۋبليكاسى اۆتوموبيل جولدارىنىڭ ۇزاقتىعى 96,5 مىڭ شاقىرىمدى قۇرايدى (سونىڭ ىشىندە رەسپۋبليكالىق جەلى – 23,7 مىڭ شاقىرىم، جەرگىلىكتى جەلى – 72,8 مىڭ شاقىرىم).

جالپى، 2010 جىلدان باستاپ رەسپۋبليكالىق ماڭىزى بار اۆتوموبيل جولدارىنىڭ 5 مىڭ شاقىرىمىندا رەكونسترۋكتسيا جانە كۇردەلى جوندەۋ جۇرگىزىلدى. ناتيجەسىندە قازىر رەسپۋبليكالىق ماڭىزى بار اۆتوموبيل جولدارىنىڭ 85%-ى (2014 جىلى – 84 %) جانە وبلىستىق جانە اۋداندىق ماڭىزى بار اۆتوموبيل جولدارىنىڭ 65 %-ى (2015 جىلى – 68 %) جاقسى جانە قاناعاتتانارلىق جاعدايدا. ال 2015-2016 جىلداردا «نۇرلى جول» باعدارلاماسى بويىنشا I جانە II-تەحنيكالىق كاتەگوريالى 1,3 مىڭ شاقىرىم اۆتوجول رەكونسترۋكتسيالاندى. وسى اۆتوجول جوبالارىن ورىنداۋعا 616 ملرد تەڭگە جۇمسالسا، ونىڭ – 329 ملرد تەڭگەسى ۇلتتىق قوردان ءبولىندى.

بولىنگەن قاراجات تولىق يگەرىلدى جانە 9 جوبا ىسكە اسىرىلدى: باتىس ەۋروپا – باتىس قىتاي، ورتالىق – وڭتۇستىك، ورتالىق – شىعىس، بەينەۋ – اقتاۋ، الماتى – وسكەمەن، استانا – پەتروپاۆل، جەزقازعان – پەتروپاۆل، اقتوبە – اتىراۋ جانە ورال – كامەنكا.

جول-قۇرىلىس جۇمىستارىمەن قازاقستاننىڭ 12 ايماعىنداعى 2 مىڭ شاقىرىمى قامتىلدى. باتىس ەۋروپا – باتىس قىتاي ءترانزيتتى ءدالىزى، استانا – تەمىرتاۋ، الماتى – قاپشاعاي، قاپشاعاي – بالپىق بي، بەينەۋ – شەتپە جانە كوكشەتاۋ – پەتروپاۆل ۋچاسكەلەرى بويىنشا قوزعالىس تولىق اشىلدى. سونىمەن قاتار، پاۆلودار قالاسىنا ەرتىس وزەنى ارقىلى وتەتىن ۇزاقتىعى 12 شاقىرىمدى قۇرايتىن ورتالىق ازياداعى ەڭ ءىرى كوپىر وتكەلىنىڭ قۇرىلىسى اياقتالدى.

سونداي-اق، جالپى ۇزاقتىعى 2,5 مىڭ شاقىرىمدى قۇرايتىن قاندىاعاش – ماقات، جەتىباي – جاڭاوزەن، قۇرتى – بۋرىلبايتال، تالدىقورعان – وسكەمەن، مەركى – بۋرىلبايتال، قالباتاۋ – مايقاپشاعاي، ءۇشارال – دوستىق، بەينەۋ – اقجىگىت، تاسكەسكەن – باقتى، وسينوۆسكي اسۋى، ششۋچينسك – زەرەندى جاڭا جوبالارى ىسكە اسىرىلا باستادى.

ەلىمىزدىڭ شىعىسىندا، قىتاي شەكاراسى ماڭىنداعى اۋماقتا «قورعاس – شىعىس قاقپاسى» اەا (ارنايى ەكونوميكالىق ايماقتار) بازاسىندا 2015 جىلى «قۇرعاق پورتتىڭ» جانە ينفراقۇرىلىمنىڭ قۇرىلىسى اياقتالدى. قىتاي شەكاراسىنداعى ەكى تەمىرجول وتپەسى مەن «باتىس ەۋروپا – باتىس قىتاي» اۆتوماگيسترالىن تەحنولوگيالىق ۇيلەستىرۋدە قۇرعاق پورت قۋاتتى كولىك-لوگيستيكالىق حابقا اينالدى. بۇل قىتايدان ەۋروپاعا، سونداي-اق ورتالىق ازيا ەلدەرى، تۇركيا جانە پارسى شىعاناعى ەلدەرىنە جۇك اعىنىن ءتيىمدى تاراتۋدى قامتاماسىز ەتۋگە مۇمكىندىك بەرەدى.

قۇرعاق پورتتىڭ جالپى اۋماعى 129 گەكتار، ول لوگيستيكالىق (224,9 گا) جانە يندۋستريالىق (224,4 گا) ايماقتارمەن بايلانىستىرىلعان. بۇل جوبا كونتەينەر وڭدەۋ ءۇشىن ۇتىمدى شەشىم بولىپ تابىلادى جانە كىرگىزىلگەن تاۋارلاردى ودان ءارى وندىرىستىك وڭدەۋ ءۇشىن جاڭا مۇمكىندىكتەر اشادى.

جانىبەك ءاشىم

سوڭعى جاڭالىقتار