10 مامىر 2019, 16:33 736 0 جاڭالىقتار دينارا مىڭجاسارقىزى

تالوندىق جۇيە: اشىقتىق پەن جەدەلدىك ماڭىزدى

ەلىمىزدە «اگروونەركاسىپتىك كەشەندى دامىتۋدىڭ 2017-2021 جىلدارعا ارنالعان باعدارلاماسى قابىلدانعانى بەلگىلى. وسى ارقىلى اۋىل حالقىنىڭ جاعدايىن جاقسارتۋعا باعىتتالعان بىرقاتار تاپسىرما جۇكتەلدى. ناتيجەسىندە بيىل 1 قاڭتاردان باستاپ «اۋىل شارۋاشىلىعىن قارجىلاي قولداۋ قورى» اق كليەنتتەرگە قىزمەت كورسەتۋدىڭ تالوندىق جۇيەسىن ەنگىزگەن ەدى.
كليەنتتەرگە نەسيە الۋ ءۇشىن ءوتىنىم تاپسىرعان كەزدە جوسپارلانعان نەسيە بويىنشا نەگىزگى مالىمەتتەر كورسەتىلگەن تالوندار بەرىلۋدە. قازىرگى ۋاقىتتا بۇل تالوندىق جۇيە شارۋاشىلىق باستاۋعا ءوتىنىم بەرۋشىلەر ءۇشىن وتە ءتيىمدى ەكەنىن كورسەتتى.

بۇل جۇيە نەسيەلەۋ وتىنىمدەرىن قاراستىرۋ اشىقتىعىن قامتاماسىز ەتەدى.تالوندا نەسيەلەۋ شارتتارى، تاپسىرىلعان قۇجاتتاردىڭ ءتىزىمى، ءوتىنىم بەرىلگەن كۇنى مەن ءوتىنىمدى قاراستىرۋ اياقتالاتىن كۇن كورسەتىلەدى. ءوتىنىمدى قاراستىرۋ بويىنشا بيزنەس-پروتسەسس تولىعىمەن سايتتا كورسەتىلەدى. كليەنت ءوز ءوتىنىمىنىڭ جولىن kazagro.kz پورتالىنا تىركەلىپ، كورە الادى.
تالوندا كليەنتتىڭ اتى مەن نەسيەلەۋ باعدارلاماسى، قارجىلاندىرۋ كوزى، سوما، پروتسەنتتىك ۇستەمە، نەگىزگى بورىش پەن سىياقى بويىنشا جەڭىلدەتىلگەن مەرزىم، ءوتىنىمدى قابىلداعان مەنەدجەردىڭ مالىمەتتەرى مەن بايلانىس تەلەفونى كورسەتىلەدى.

تالون كليەنتتىڭ قارجىلاندىرۋعا قاجەتتى قۇجاتتار پاكەتىن تاپسىرعانىن دالەلدەيدى. تالون باسىلعاننان كەيىن نەسيەلەۋ ءوتىنىمى قاراستىرۋعا جىبەرىلەدى. كليەنت kazagro.kz پورتالىنداعى جەكە كابينەتكە كىرىپ، ءوز ءوتىنىمى بويىنشا ءجۇرىپ جاتقان پروتسەستى بىلە الادى.

«تالوندىق جۇيەنىڭ نەگىزگى ارتىقشىلىقتارىنىڭ بىرىنە توقتالاتىن بولساق، بۇرىن كليەنت نەسيە ءوتىنىمىن تاپسىرىپ، ۇزاق ۋاقىت جاۋاپ كۇتەتىن. قۇجاتتاردىڭ تولىق پاكەتىن تاپسىرعانىن راستاي المايتىن. جاۋاپتى قىزمەتكەردەن بەلگىلى ءبىر مەرزىمنەن كەيىن جاۋاپ الا المايتىن. كليەنتكە وتىنىمىنە قاتىستى كىمنەن نە سۇراۋ كەرەكتىگىن ءبىلۋ قيىن بولاتىن. ال، مىنا تالوندىق جۇيەدە تاپسىرىلعان وتىنىممەن تىكەلەي اينالىساتىن قىزمەتكەردىڭ اتى-ءجونى، بايلانىس تەلەفونى كورسەتىلەدى»، – دەيدى «اۋىل شارۋاشىلىعىن قارجىلاي قولداۋ قورى» اق نەسيەلەۋ دەپارتامەنتىنىڭ ديرەكتورى گەررارد باال.

تاعى ءبىر ماسەلەنى ايتا كەتكەن ءجون. ول – ءوتىنىم تاپسىرعاننان باستاپ، كليەنتتىڭ نەسيە الۋىنا رۇقسات بەرىلگەنگە دەيىنگى ارالىقتا كەتەتىن ۋاقىت ماسەلەسى. «كوپ جاعدايدا ۋاقىت كەپىلدىككە قويىلاتىن مۇلىكتى زاڭداستىرماعاندىقتان سوزىلىپ كەتەدى. مىسالى، كەيبىر ادامداردىڭ اۋلاسىندا قوراسى بار بولعانىمەن ول تەحپاسپورتتا كورسەتىلمەۋى مۇمكىن. ياعني، مال ۇستايتىن قوراسىنىڭ قۇجاتپەن زاڭداستىرىلۋى شارت. بۇدان باسقا دا كەپىلدىككە قوياتىن جەر ۋچاسكەلەرى، تەحنيكالارى جانە تاعى باسقا دا مۇلىكتەرى زاڭداستىرىلعان بولۋى ءتيىس. سوندىقتان ءوتىنىمدى قاراۋ ۋاقىتى قۇجاتتاردى تولىق جيناپ، ءوتىنىم تاپسىرىلعان كۇننەن باستاپ ەسەپتەلەدى. سونىمەن قاتار، وتىنىمدەردى قاراۋ مەرزىمى وڭتايلاندىرىلدى»، – دەپ اتاپ ءوتتى نەسيەلەۋ دەپارتامەنتىنىڭ ديرەكتورى گەررارد باال.

بيىل ءوتىنىم بەرگەن زاەمشىلار العاش رەت تالوندىق جۇيەنى پايدالانىپ، ونىڭ ارتىقشىلىقتارىنا كوز جەتكىزدى. بۇل جۇيەنى بۇرىنعىلارمەن سالىستىرۋعا مۇلدە كەلمەيدى. الىس اۋىلداردا تۇراتىن شارۋالار جولعا اقشا شىعارىپ، ۋاقىتىن كەتىرىپ سابىلمايتىن بولدى. مۇنىڭ الدىندا قوسىمشا سۇراقتار تۋىنداسا نەمەسە كەيبىر تالاپتاردى تۇسىنبەي جاتسا وفيسكە كەلۋگە جانە وندا كەزەككە تۇرىپ قانشاما ۋاقىت جوعالتۋعا تۋرا كەلەتىن. ال تالوندىق جۇيە – ءوتىنىمنىڭ قارالۋ پروتسەسىن اۋىلدا وتىرىپ-اق كورۋگە مۇمكىندىك بەرەتىن قاراپايىم جۇيە. اسىرەسە شالعاي اۋىلداردا تۇراتىن ازاماتتار ءۇشىن وتە قولايلى. سوندىقتان، نەسيە الۋعا ءوتىنىم بەرەمىن دەۋشىلەر وسى جۇيەنى مەڭگەرىپ العاندارى ابزال. ول ءۇشىن وبلىس ورتالىقتارىنداعى، نۇر-سۇلتان، الماتى جانە سەمەي قالالارىنداعى «اۋىل شارۋاشىلىعىن قارجىلاي قولداۋ قورى» اكتسيونەرلىك قوعامىنىڭ فيليالدارىنا حابارلاسۋ قاجەت نەمەسە بارىپ تولىق مالىمەت العان دۇرىس.

دينارا ءدۇرمان

تەگتەر "قازاگرو"

سوڭعى جاڭالىقتار