10 مامىر 2019, 16:15 653 0 ىشكى ساياسات دينارا مىڭجاسارقىزى

اتاۋلى كومەكتى كىمدەر الادى؟

ەڭبەك جانە حالىقتىڭ الەۋمەتتىك قورعاۋ ءمينيسترى بەردىبەك ساپارباەۆ تابىسى تومەن وتباسىلارعا اتاۋلى الەۋمەتتىك كومەك تاعايىنداۋ جۇمىسى قالاي اتقارىلىپ جاتقانىن ايتتى. ەل ىشىنە جاسالعان جۇمىس ساپارىندا الەۋمەتتىك سۇراقتارعا جاۋاپ بەردى.

ونىڭ قالاي شەشىلەتىنى جونىندە ايتىلدى. «سىزدەر بىلەتىندەي، مينيسترلىكتىڭ قاسىندا مەملەكەتتىك ورگاندارمەن بىرلەسە قۇرىلعان جۇمىس توبى بار. وسى وتكەن 4 ايدىڭ ىشىندە جۇمىس توبى 11 وتىرىس وتكىزدى. جالپى، قازىرگى تاڭدا 160 مىڭ وتباسىعا اتاۋلى الەۋمەتتىك كومەك تاعايىندالدى. ول شامامەن، 806 مىڭداي ادام. 10 مىڭ وتباسىعا ااك تاعايىندالعان جوق. سەبەبى، ولار بەرىلگەن تالاپتارعا سايكەس كەلمەيدى. ياعني، تابىستارى بەلگىلەنگەن كريتەريدەن اسىپ تۇر»، – دەدى بەردىبەك ساپارباەۆ. ءمينيستردىڭ ايتۋىنشا، بۇگىندە ءساۋىر-مامىر ايىنا اتاۋلى الەۋمەتتىك كومەك ءۇشىن 23 ملرد تەڭگە قاراستىرىلعان. «جالپى، جىل بويى اتاۋلى الەۋمەتتىك تولەمدى تولەۋ ءۇشىن 130 ملرد تەڭگە قاراستىرىلعان. ورتا ەسەپپەن ءاربىر وتباسىعا 105 مىڭ تەڭگە اتاۋلى الەۋمەتتىك كومەك كورسەتىلەدى. ءبىر ايتا كەتەتىن ماسەلە: الەۋمەتتىك جەلىدە كەيبىرەۋلەر بۇل تولەم ءبىرىنشى توقساندا تولەنەدى دەپ جاتىر. قايتالاپ ايتارىم: تولەم جىل بويى تولەنەدى. بىراق، ونىڭ ەرەجەسىنە سايكەس تابىس جىل سايىن، توقسان سايىن ناقتىلانىپ وتىراتىن بولادى»، – دەدى مينيستر.

الماتى وبلىسىندا 40 مىڭ كوپبالالى وتباسىنىڭ 11 مىڭى عانا اتاۋلى الەۋمەتتىك كومەك العان. كوپبالالى انالار كوتەرگەن اتاۋلى الەۋمەتتىك كومەك پەن باسپانا ماسەلەسى قازىر اتقارۋشى بيلىكتىڭ عانا ەمەس، تۇتاس قوعامنىڭ باس اۋرۋىنا اينالعان سياقتى. انىعىندا بۇل جايىنداعى پىكىر ەكىگە جارىلىپ تۇر. ءبىر قاۋىم جۇرتتىڭ كوزقاراسى الەۋمەتتىك ءالجۋاز توپتاردىڭ جاعدايىن مەملەكەت جاساۋى كەرەك دەگەنگە سايسا، ەكىنشى تاراپ «اركىم ءوز كۇنىن ءوزى كورىپ، جاعدايىنا قاراي بالا تۋى كەرەك» دەگەن ۇستانىمدا.
ارينە، مەملەكەت الەۋمەتتىك ماسەلەنى شەشۋگە مۇددەلى، وعان بارلىق مۇمكىندىكتى قولدانۋدا. بىراق بيلىك ءۇشىن ادامداردىڭ جاپپاي پاتەرناليستىك كوڭىل كۇيدە بولۋى ءتيىمدى ەمەس. وسى جەردە 1 ساۋىردەن قۇجات قابىلداۋ شاراسى باستالعان اتاۋلى الەۋمەتتىك تولەمگە قاتىستى جۇرت ىشىندە جاعىمسىز ءسوز كوبەيىپ تۇرعانىن ايتۋىمىز كەرەك. الەۋمەتتىك قىزمەت پەن اكىمدىك تاراپى كومەككە مۇقتاج نەمەسە جاردەم الۋعا نيەتتى كوپبالالى وتباسىنىڭ تابىسىن ەسەپتەۋ كەزىندە ساۋىن سيىر مەن تاۋىق سانىن تۇگەندەپ، ءتىپتى جەمىس اعاشىن دا ءونىم بەرەتىن كىرىس كوزىنە جاتقىزۋى كوپبالالى انالاردىڭ اشۋ-ىزاسىن تۋعىزىپ وتىر. ەڭ قىزىعى، وتباسى مۇشەلەرىنىڭ اتىنا راسىمدەلگەن نەسيە مەن مۇگەدەك بالاعا بەرىلەتىن ارنايى جاردەماقى دا اۋلەتتىڭ تابىسى بولىپ ەسەپكە الىنۋىن ەشكىم ءتۇسىندىرىپ بەرە العان جوق.
ءبىز بۇل جونىندە الماتى وبلىسىنىڭ اكىمى اماندىق باتالوۆ مىرزادان سۇرادىق. ول «الماتى وبلىسىندا 40 مىڭ كوپبالالى وتباسى بار ەكەن. ونىڭ 11 مىڭى عانا اتاۋلى كومەكتى العان. مىسالى قازىر جەتىسۋ ءوڭىرىن 2 ميلليونعا جۋىق ادام مەكەندەيتىن بولسا، ونىڭ ىشىندەگى 165 مىڭ بالا كوپبالالى وتباسىندا تۋىپ، وسكەندەر. كوپتىڭ كوڭىلىن ەلەڭدەتكەن اتاۋلى كومەك ماسەلەسى نەگە وڭتايلى شەشىلمەي وتىر؟» دەگەن ساۋالعا تومەندەگىدەي جاۋاپ بەردى.

اماندىق باتالوۆ، الماتى وبلىسىنىڭ اكىمى:
– 1 ساۋىردەن اتاۋلى الەۋمەتتىك كومەكتىڭ جاڭا فورماتىن تاعايىنداۋعا 17 503 ءوتىنىش قابىلداندى، اۋىسپالى كونتينگەنت بويىنشا اۆتوماتتى قايتا ساناۋ 6074 وتباسىن قۇرايدى، ياعني ااك الۋشىلاردىڭ جالپى قامتىلۋى 23 557 وتباسىن (112 160 وتباسى مۇشەسى) قۇرايدى. 2019 جىلى اتاۋلى الەۋمەتتىك كومەككە 13,5 ملرد تەڭگە ءبولىندى (رب-12,1 ملرد. تەڭگە، جب-1,4 ملرد تەڭگە), ونىڭ ىشىندە ءساۋىر ايىنا 906 ملن تەڭگە قاراستىرىلدى. 5 مامىرعا اتاۋلى الەۋمەتتىك كومەك 21 886 وتباسىنا جالپى سوماسى 2 ملرد 30 ملن تەڭگەگە تولەنىپ، 100% يگەرىلدى، 1619 وتباسىنا كىرىسىنىڭ ارتۋىنا بايلانىستى باس تارتىلدى. جۇمىس تۇراقتى باقىلاۋدا.

دينارا مىڭجاسارقىزى

سوڭعى جاڭالىقتار