3 مامىر, 10:20 669 0 بىلگەنگە مارجان دينارا مىڭجاسارقىزى

وتاندىق ءونىم ورلەسىن دەسەك...

ەلىمىز وتاندىق ءونىمنىڭ تاسىن ورگە دومالاتامىز دەسە دە، سول ۇدەدەن شىعا الماۋدا. بۇگىندە حالىق تۇتىناتىن تۇرمىستىق تاۋاردىڭ دەنى سىرتتان كەلەدى. ونىڭ ىشىندە ۇستىمىزدەگى كيىم-كەشەك، اياق كيىم، ءتىپتى ىشەتىن اس-سۋىمىز دا يمپورتتىڭ ەنشىسىندە. ال قىز-كەلىنشەكتەردىڭ ءارىن بەرمەۋگە سەپتىگىن تيگىزەتىن كوسمەتيكا ونىمدەرى تۇگەل دەرلىك شەتەلدەن اعىلادى.

سودان دا بولار، قازىرگى كەزدە سۇرانىسقا يە كارىس، فرانتسۋز، قىتاي كوسمەتيكاسى ءوتىمدى. الايدا، ونىڭ ءتيىمدى اسەرى قانشالىقتى ەكەنىن ءبىلۋ قيىن. ءتىپتى، كەيبىرەۋلەر اتىنا قاراپ-اق ساتىپ الۋعا قۇمار. ەگەر سول كوسمەتيكا ونىمدەرىنىڭ ورنىن وتاندىق ءونىم الماستىرسا شە؟ ءسىز قايسىسىن قولدار ەدىڭىز؟

قىتايدان اتامەكەنىنە كەلىپ، بەت، تەرى كۇتىمىن جاقسارتۋمەن اينالىسىپ كەلە جاتقان گۇلشاش اۋباكىرقىزىنىڭ بۇل سالادا ەڭبەك ەتكەنىنە 20 جىلدان استام ۋاقىت بولعان. جىلدار بويى ءوز ءبىلىمىن الەمدىك بەدەلدى كوسمەتولوگتاردان ۇيرەنىپ، ءوز سالاسىنىڭ قىر-سىرىن مەڭگەرگەن مامان قازاقستان نارىعىنداعى يمپورتتىق تاۋاردىڭ ارتىق-كەم تۇسىن زەرتتەپ تە كورگەن. ارينە، كەيدە باعاسى اسپانداپ تۇرعان ءونىمنىڭ ساپاسى سوعان ساي كەلە بەرمەۋى مۇمكىن. مۇندايدا كەرىسىنشە ءوزى ارزان تاۋاردىڭ تيىمدىلىگى جوعارى بولۋى عاجاپ ەمەس.  بۇل ونىڭ قۇرامىنداعى قوسپالارعا دا بايلانىستى. ەگەر ءونىم تابيعي شوپتەر مەن دارۋمەندەر ارقىلى دايىندالسا نەگە تۇتىنباسقا؟

قازاق ايەلدەرىنىڭ تابيعي سۇلۋلىعىن ساقتاۋعا كومەگىن تيگىزىپ جۇرگەن گۇلشاش اۋباكىرقىزى جاقىندا «AG cosmetics» ونىمدەرىنىڭ تۇساۋىن كەستى. ءوز ەلىمىزدە دايىندالعان، تەك قانا تابيعي قوسپالاردان تۇراتىن بەت كۇتىمىنە ارنالعان ءونىم تۋرالى: «قازاقستاندا ساپاسى جوعارى وتاندىق كوسمەتيكا ونىمدەرىن دايىنداۋدى جىلدار بويى ارمانداپ كەلدىم. ءبىز كوبىنەسە شەتەلدىڭ ونىمدەرىنە قۇمارمىز. ال ونىڭ قۇرامىندا نە بار ەكەنىنە ەشكىم ءمان بەرمەيدى. سوندىقتان دا قانداي قوسپا بار ەكەنىنە كوزىمىز جەتەتىن، ءوزىمىز ساپاسىن باقىلايتىن بەت كۇتىمىنە ارنالعان قازاقستاندىق ءونىمدى شىعارۋدى كوكسەدىم. ارينە، مۇنىڭ دا ءوز ماشاقاتى بار»، – دەدى.

وتاندىق ءونىمنىڭ تۇساۋكەسەرىنە ارنايى كەلگەن قازاقستاننىڭ حالىق ءارتيسى روزا رىمباەۆا: «ءبىر-ءبىرىمىزدى قولداماساق، وتاندىق ءونىمدى تۇتىنباساق، نەسىنە ءجۇرمىز؟ ءتىپتى، مەنىڭ ۇستىمدەگى كيىم-كەشەكتىڭ ءبارى قازاقستاندا تىگىلگەن. جازعى دەمالىستى ءاردايىم الاكولدە وتكىزەمىن. «ەندى وتاندىق كوسمەتيكانى قولدانۋعا دايىنمىن. وزىمىزدە جاسالعان دۇنيەنى ەڭ ءبىرىنشى ءوزىمىز قولدانايىق. الەمنىڭ دامىعان مەملەكەتتەرىنىڭ ءبارى ءوز ەلىندە وندىرىلگەن ءونىمدى تۇتىنۋ ارقىلى وسىنداي جاعدايعا جەتكەن. ءبىز دە ءوز اقشامىزدى وزىمىزگە سالايىق، ايتپەسە ولار ەشقاشان وسپەيدى»، – دەگەندى ايتتى.

 

دينارا ءدۇرمان

سوڭعى جاڭالىقتار