27 ءساۋىر 2019, 15:09 1046 0 ءبىلىم "تۇركىستان" گازەتىنىڭ اۆتورلارى

"ارىستان" ليتسەيستەرى انت قابىلدادى

«نۇرسۇلتان نازارباەۆتىڭ ءبىلىم بەرۋ قورى» قوعامدىق قورىنىڭ اياسىندا 2011 جىلى قۇرىلعان "ارىستان" مامانداندىرىلعان ليتسەيى ليتسەي كۇنىن اتاپ ءوتتى.

مۇندا قازاقستاننىڭ بارلىق وڭىرىنەن كەلگەن 9-11 سىنىپتا وقيتىن 240 ءجاسوسپىرىم ءبىلىم الادى. الدىڭعى ءبىتىرۋشى تۇلەكتەر قازاقستاندىق جانە شەتەلدىك اسكەري وقۋ ورىندارىندا بىلىمدەرىن ابىرويمەن جالعاستىرۋدا.

مامانداندىرىلعان «ارىستان» ليتسەيىندەگى ەڭ مەرەكەلىك سالتاناتتى كۇندەردىڭ ءبىرى– ليتسەي كۇنى، ول 2011 جىلدىڭ 24 ساۋىرىنەن باستاپ ۇزدىكسىز وتكىزىلىپ كەلەدى.

وسى كۇنى «نۇرسۇلتان نازارباەۆتىڭ ءبىلىم بەرۋ قورى» قوعامدىق قورىنىڭ ديرەكتورى، دينارا نۇرسۇلتانقىزى كۋليباەۆا ليتسەي باستىعى پەداگوگيكا عىلىمدارىنىڭ دوكتورى، زاپاستاعى گەنەرال-مايور ءسابيت ساۋمەنۇلى تاۋلانوۆقا «ارىستان» ليتسەيىنىڭ تۋىن تابىستادى، سول كۇنى ليتسەيدىڭ تۇڭعىش تۇلەكتەرى ءوز ومىرلەرىندەگى العاشقى انتتى قابىلداعان بولاتىن.

بۇل وسىدان باستاپ ليتسەيدىڭ قاسيەتتى داستۇرىنە اينالدى. ليتسەي تۋىندا بەينەلەنگەن ليتسەي ەمبلەماسى مەن «مىندەت، ابىروي، ەرلىك» اتتى جازىلعان تۋ ليتسەيستەردىڭ پاتريوتتىق سەزىمىن اسقاقتاتا تۇسەدى. «ليتسەي! تۋ استىنا – تىك تۇر! نازار سولعا!» -دەگەن بۇيرىقتىڭ بەرىلۋىمەن، ساپ تۇزەگەن ليتسەيستتەردىڭ الدىمەن ليتسەي تۋىن ۇستاۋشىلار سالتاناتپەن ءجۇرىپ ءوتتى.

ليتسەي وقۋشىلارى بۇل مەرەكەگە ساقاداي ساي ازىرلەنگەنى كورىنىپ تۇر. اسكەري مەرەكەلىك كيىممەن سىنىپ بويىنشا ساپ قۇراپ تۇرعان ليتسەيستەردىڭ جۇزىنەن اسكەرگە ءتان جاۋاپكەرشىلىك، تاباندىلىق، باتىلدىق سەزىمى ايقىن كورىنەدى. ءاربىر بەرىلگەن بۇيرىققا ساق قاراپ، شيراقتىلىق تانىتىپ تۇر.

«...سەمسەرى بول، وتاننىڭ قىنابىندا، سەرتكە ۇستاسا، سەلت ەتپەي جالتىلداعان»، – دەپ اقىن مۇقاعاليدىڭ ولەڭدەرىندە ايتىلعانداي، ساپتا تۇرعان جاس ورەندەردىڭ كوزىنەن وتتى ۇشقىن جارقىلدايدى.

جيىن قازاقستان رەسپۋبليكاسىنىڭ مەملەكەتتىك ءانۇرانى ورىندالىپ، ليتسەي باسشىسى پەداگوگيكا عىلىمدارىنىڭ دوكتورى، زاپاستاعى گەنەرال-مايور تاۋلانوۆ ءسابيت ساۋمەنۇلىنىڭ قۇتتىقتاۋ سوزىمەن اشىلدى. ارى قاراي 9-سىنىپ ليتسەيستتەرى سالتاناتتى تۇردە وزدەرىنىڭ وتانىنا، ليتسەيگە دەگەن ادال قىزمەت ەتۋ انتىن تاپسىردى.

بۇل - ليتسەيستەر ءۇشىن ومىرلىك ماڭىزدى كۇن.بيىلعى وقۋ جىلىنداعى «ليتسەي كۇنىندە» الماتى وبلىسى اكىمىنىڭ قارجىلاندىرۋىمەن IT كابينەتىنىڭ اشىلۋ سالتاناتى ءراسىمى بولىپ، ينفورماتيكا ءپانىنىڭ مۇعالىمى ابيشەۆا مادينا ەدىلحانقىزىنىڭ اشىق ساباعى كورسەتىلدى.

قر تۇڭعىش پرەزيدەنتى ن.ءا.نازارباەۆ 2013 جىلى ءساۋىر ايىنداعى كەلگەن ساپارىندا «ارىستان» ليتسەيىنە جوعارى باعا بەرىپ، بۇل قايىرىمدىلىق جوباسى جەكە كاپيتالدىڭ جاستارعا مەملەكەتتىك-جەكە مەنشىكتىك مەحانيزم سەرىكتەستىگى ارقىلى قولجەتىمدى، ساپالى ءبىلىم بەرۋدەگى جارقىن كورىنىسى بولىپ تابىلاتىن ايتىپ ءوتتى.

ليتسەيدىڭ نەگىزگى ماقساتى – جاسوسپىرىمدەردى جوعارى دەڭگەيلى بىلىممەن قامتاماسىز ەتۋ، ولاردىڭ بويىندا ەرلىك، قاجىر-قايرات، توزىمدىلىك، جوعارى مادەنيەت، ازاماتتىق بورىش پەن جاڭا قازاقستاندىق ءپاتريوتيزمدى قالىپتاستىرۋ.

ليتسەي تۇلەكتەرى ەگەمەندى قازاقستان رەسپۋبليكاسىنىڭ قورعانىس كۇشتەرىنىڭ ءتۇرلى قۇرىلىمدارىندا قىزمەتتەرىن ادال ورىنداۋعا، قۇقىقتىق جانە ازاماتتىق مىندەتتەرىن ابىرويمەن اتقارۋعا ءتيىس.ليتسەيدىڭ وقۋ-ماتەريالدىق بازاسى كومپيۋتەرمەن، ينتەربەلسەندى تاقتالارمەن جابدىقتالعان.

ليتسەي كەشەنى زاماناۋي سىنىپتار مەن لابوراتوريالىق كەشەندەردى، مۇعالىمدەرگە ارنالعان تۇرعىن ۇيلەردى، ليتسەيستەردىڭ جاتىن ورنىن، باسسەين، سپورتتىق جاتتىعۋ كەشەندەرىن، لينگافوندىق كابينەتتەردى، مەدياتەكالاردى، مۋلتيمەديالىق شولۋ ورتالىعى جانە 20 مىڭنان استام عىلىمي جانە كوركەم ادەبيەتتەردەن تۇراتىن كىتاپ قورى بار كىتاپحانانى قامتيدى.

ايگۇل مامبەتجانوۆا

سوڭعى جاڭالىقتار