25 ءساۋىر 2019, 15:36 1061 0 قوعام دينارا مىڭجاسارقىزى

قازاقستان – ەۋروپا مەن ازيا اراسىنداعى نەگىزگى ترانزيتتىك ەل

ەۋروپا مەن ازيانىڭ اراسىنداعى نەگىزگى ترانزيتتىك ەل بولۋعا قازاقستاندا بارلىق ينفراقۇرىلىمدىق جاعداي جاسالدى. بۇل تۋرالى بەيجىڭدە «ءبىر بەلدەۋ، ءبىر جول» اتتى بەيجىڭدەگى ەكىنشى فورۋمدا قر يندۋستريا جانە ينفراقۇرىلىمدىق دامۋ ءمينيسترى رومان سكليار ايتتى، دەپ حابارلايدى قازاقپارات مينيسترلىكتىڭ وكىلى رۋسلان يمانقۇلوۆقا سىلتەمە جاساپ.

ءمينيستردىڭ ايتۋىنا قاراعاندا، قازاقستان تاۋەلسىزدىك العاننان باستاپ حالىقارلىق كولىكتىك جەلىلەرگە ينتەگراتسيالانۋ ماقساتىندا كوپ كۇش جۇمساعان. اتاپ ايتقاندا، ەلىمىزدە سالالىق باعدارلاما ازىرلەنىپ، جاڭا الەۋمەتتىك -ەكونوميكالىق شارتتاردىڭ تالابىنا ساي كەلەتىن قۇقىقتىق نەگىز جاسالعان. كولىكتىك قىزمەت كورسەتۋدە ناقتى ورتا قالىپتاسقان. «سوڭعى 10 جىلدا كولىكتىك سالانى دامىتۋعا شامامەن 30 ميلليارد دوللار ينۆەستيتسيا سالىندى. 2 مىڭ شاقىرىمنان استام تەمىر جول سالىنىپ، 6,3 مىڭ شاقىرىم اۆتوكولىك جولى قالپىنا كەلتىرىلدى. كاسپي تەڭىزىندەگى پورتتىڭ قۋاتتىلىعى 26 ملن تونناعا دەيىن ۇلعايتىلدى. 15 اۋەجايداعى ۇشۋ-قونۋ جولاعىنا قايتا جوندەۋ جۇمىستارى جۇرگىزىلدى»، – دەيدى ول. رومان سكليار قازاقستان مەن قىتاي ەلدەرىنىڭ اراسىنداعى كولىكتىك-لوگيستيكالىق سالاداعى تىعىز ارىپتەستىكتى ەرەكشە اتاپ ءوتىپ، بۇل فاكتر ەكى ەل اراسىنداعى ساۋدا-ەكونوميكالىق ىنتىماقتاستىقتى نىعايتا تۇسەتىنىن جەتكىزدى. ءمينيستردىڭ ايتۋىنشا، قازىردىڭ وزىندە  قىتايمەن شەكارادا كەدەرگىسىز ساۋدا جاساۋ ءۇشىن «قورعاس – شىعىس قاقپاسى» ارنايى ەكونوميكالىق ايماعى (اەا) قۇرۋ جۇمىسى تولىعىمەن اياقتالعان. وندا 79 قاتىسۋشى تىركەلىپ، ءوندىرىس وشاقتارى ورناعان. اەا ينفراقۇرىلىمىنا يندۋستريالىق جانە لوگيستيكالىق اۋماقتارمەن بىرگە، 2015 جىلى ىسكە قوسىلعان قۇرىق پورتى كىرەدى. تەڭىز جۇگىن تاسىمالداۋ بويىنشا الەمدىك كوشباسشى، «COSCO Shipping» قىتايلىق كومپانياسى قۇرىق پورتتىڭ جۇمىسىن دامىتۋعا بەلسەندى قاتىسىپ وتىر. سونداي-اق، حالىقارالىق باسقارۋشى رەتىندە رەتىندە DP World ء(باا) تەڭىز پورتتارىنىڭ وپەراتورى جۇمىسقا تارتىلعان. 2014 جىلى ليانيۋنگان پورتىندا قىتايلىق سەرىكتەستەرمەن بىرلەسە لوگيستيكالىق تەرمينال قۇرىلعان. ول بۇگىنگى تاڭدا قازاقستانعا كەلەتىن جانە قازاقستاننان شىعارىلاتىن جۇك تاسىمالدارىن بىرىكتىرۋدىڭ باستى باعىتى بولىپ تابىلادى. ايتا كەتسەك، 25-27 ساۋىردە وتەتىن «ءبىر بەلدەۋ – ءبىر جول» ەكىنشى فورۋمىنا 40 ەلدىڭ مەملەكەت باسشىلارى مەن ۇكىمەت باسشىلارى قاتىسۋدا.

سوڭعى جاڭالىقتار