25 ءساۋىر 2019, 12:44 758 0 جاھان دينارا مىڭجاسارقىزى

زەلەنسكيدىڭ جەڭىسى

سونىمەن، دەموكراتيالىق قۇندىلىقتارعا بوي ۇرعان ۋكراينا جاڭا پرەزيدەنتىن سايلادى. ەكىنشى كەزەڭگە ءوتىپ، كوش باستاعان پەتر پوروشەنكو مەن ۆلاديمير زەلەنسكي سايلاۋالدى دەباتتا دا بارىن سالدى. الايدا، بيلىكتەن جاڭا لەپ، تىڭ سەرپىلىس كۇتكەن حالىق داۋسىن ءارتىس زەلەنسكيگە بەردى.

حالىقتىڭ قۇلاعى ەكىنشى كەزەڭدەگى دەباتتا تۇرىك بولدى. پوروشەنكو قانشا مارتە دەباتتى وتكىزەتىن جەردى وزگەرتكىسى كەلسە دە، ونى قارسىلاسى قۇپتاعان جوق. ءسويتىپ، زەلەنسكيدىڭ تاڭداۋىمەن كيەۆتىڭ «وليمپيسكي» ستاديونىندا كەزدەسكەن ەكەۋ اراسىنداعى اشىق پىكىرتالاس تالايدىڭ ايىزىن قاندىرعانعا ۇقسايدى. ماسەلەن، زەلەنسكي ۋكراينانىڭ باسىنا تۇسكەن ساياسي-ەكونوميكالىق جاعدايدىڭ بارىنە پوروشەنكونى ايىپتادى. «بەس جىلدان بەرى دونباسستاعى سوعىستى توقتاتا المادى. سوندا حالىق وعان سوزگە شەشەندىگى، قارجى جاعىنان مىقتى مامان بولعانى ءۇشىن داۋىس بەردى مە؟»، – دەدى. الايدا، ونىڭ ۋاجىنە دە قارسى جاۋاپ بەرگەن پوروشەنكو: «زەلەنسكي وتە ءالسىز ۇمىتكەر. سەبەبى ول ءپۋتيننىڭ سوققىسىن كوتەرە المايدى» دەدى ءازىل-شىنى ارالاس. ال زەلەنسكي ۋكراينانى بەس جىلدان كەيىن نە كۇتىپ تۇر دەگەن ساۋالعا جاۋاپ بەرۋدەن باس تارتتى. ول ىلە-شالا «مەن ءبىر كەزەڭگە عانا پرەزيدەنت بولامىن. مەن پايعامبار، ال ءسىز مويسەي ەمەسسىز» دەپ قىسقا قايىردى. پوروشەنكو دا قالىس قالمادى. «زەلەنسكي ءوز بەتىمەن جۇرە الاتىن ساياسي تۇلعا ەمەس، ول وليگارح كولومويسكيدىڭ قۋىرشاعى»، – دەدى ول. بۇل دەباتتا نە ايتىلمادى دەيسىز عوي. بۇرىن-سوڭدى وسىنداي ساياسي پىكىرتالاستى ساعىنعان جۇرت كوكەيىندەگى ءبىراز ساۋالعا جاۋاپ الدى.

الايدا، حالىقتىڭ تاڭداۋى زەلەنسكيگە ءتۇستى. مالىمەتتەرگە سايكەس، زەلەنسكيگە 73,4, ال پوروشەنكوعا 24, 61 پايىز داۋىس بەرگەن. ورتالىق سايلاۋ كوميسسياسى ۋكراينا پرەزيدەنتىنىڭ ەسىمىن 1 مامىردان كەشىكتىرمەي جاريالاۋى ءتيىس. «ماقساتىمىزعا جەتتىك! ماعان قولداۋ كورسەتكەن اتا-اناما ۇلكەن العىسىمدى بىلدىرگىم كەلەدى. مەنى جەڭىسىممەن قۇتتىقتاعان ۋكراينا پرەزيدەنتى پەتر پوروشەنكوعا ريزاشىلىعىمدى ايتتىم. ول كەز كەلگەن ۋاقىتتا كومەكتەسۋگە دايىن ەكەنىن جەتكىزدى. سەبەبى، ول مەنىڭ جانە كوماندامىزدىڭ جەڭگەنىن مويىندادى»، – دەدى اعىنان جارىلعان زەلەنسكي   ەكزيت-پولل ناتيجەلەرىنەن كەيىن.

ۋكراينا بيلىگىنە كەلەتىن ۆلاديمير زەلەنسكي ەڭ الدىمەن جەمقورلىقپەن كۇرەسىپ، جاڭا رەفورمانى جۇزەگە اسىرماقشى. سونداي-اق، ماسكەۋمەن كەلىسىمگە كەلىپ، ەلدىڭ شىعىسىنداعى حالىقتىڭ بەرەكەسىن قاشىرعان سوعىستى توقتاتۋعا بار كۇشىن سالاتىنىن دا تىلگە تيەك ەتتى.

ال ۋكرايناداعى مايداننان كەيىن بيلىك باسىنا كەلگەن پوروشەنكو پرەزيدەنت بولىپ سايلانعاندا دونباسس پەن لۋگانسكىدەگى سوعىستى توقتاتىپ، رەسەي اننەكسيالاپ العان قىرىمدى از عانا ۋاقىتتىڭ ىشىندە كەرى قايتارام دەپ ۋادە بەرگەن-ءدى. وكىنىشكە قاراي، پوروشەنكو حالىققا بەرگەن ۋادەسىن ورىنداي العان جوق. ول بيلىك قۇرعان بەس جىلدا ۋكراينادا ەكونوميكالىق دامۋ كۇرت تومەندەپ، جەڭ ۇشىنان جالعاسقان جەمقورلىق ارەكەتتەر ءورىس العانى جاسىرىن ەمەس. پوروشەنكونىڭ پانامگەيت داۋىندا اتى اتالۋى، ەلىندە سوعىس بولىپ جاتقاندا مالديۆ ارالدارىندا جۇزدەگەن مىڭ دوللار جۇمساپ، دەمالۋى حالىقتىڭ اشۋ-ىزاسىن تۋعىزعانى بەلگىلى. قىسقاسى، ول سايلاۋشىلاردىڭ سەنىم ۇدەسىنەن شىعا المادى.

وسىلايشا، ۋكرايناداعى پرەزيدەنت سايلاۋى دا مارەسىنە جەتتى. ءبىر ايتا كەتەرلىگى، حالىقارالىق باقىلاۋشىلار سايلاۋدىڭ دەموكراتيالىق تالاپتارعا ساي، ءادىل جانە اشىق وتكەنىن باسا ايتتى.

دينارا مىڭجاسارقىزى

سوڭعى جاڭالىقتار