18 ءساۋىر 2019, 17:22 816 0 ىشكى ساياسات Túrkistan Gazeti

ۇكىمەت مۇشەلەرى ەل ارالاپ ءجۇر

قر پرەمەر-ءمينيسترىنىڭ ورىنباسارى گ.ابدىقالىقوۆا باستاعان ەلباسىنىڭ «الەۋمەتتىك قامقورلىق» جاڭا الەۋمەتتىك شارالارىنىڭ نەگىزگى باعىتتارىن ءتۇسىندىرۋ جونىندەگى ۇكىمەتتىك جۇمىس توبى الماتى وبلىسىنا باردى. جۇمىس توبىنىڭ قۇرامىنا قر ەڭبەك جانە حالىقتى الەۋمەتتىك قورعاۋ ءمينيسترى ب.ساپارباەۆ، قر ءبىلىم جانە عىلىم ءمينيسترى ك.ءشامشيدينوۆا، قر دەنساۋلىق ساقتاۋ ءمينيسترى ە.ءبىرتانوۆ، قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى م. جايىمبەتوۆ كىردى.

قر پرەمەر-ءمينيسترىنىڭ ورىنباسارى گ.ابدىقالىقوۆا مەن قر ەڭبەك جانە حالىقتى الەۋمەتتىك قورعاۋ ءمينيسترى ب.ساپارباەۆ جۇمىس ساپارىن تالدىقورعان قالاسىنىڭ قالالىق جۇمىسپەن قامتۋ ورتالىعى مەن حالىققا قىزمەت كورسەتۋ ورتالىعىنان باستادى، وندا مەكەمەلەردىڭ جۇمىستارىن تەكسەردى. بۇدان كەيىن جۇمىس توبى الماتى وبلىسىنىڭ تۇرعىندارىمەن كەزدەستى. جيىنعا كوپبالالى انالار، از قامتىلعان وتباسىلار، ەڭبەك ارداگەرلەرى، مۇمكىندىكتەرى شەكتەۋلى جاندار، مۇعالىمدەر، دارىگەرلەر، ازاماتتىق قوعام وكىلدەرى قاتىستى. گۇلشارا ابدىقالىقوۆا ءوز سوزىندە جاڭا الەۋمەتتىك ساياساتتىڭ نەگىزگى باعىتتارى، جۇمىس توبىنىڭ ماقساتتارى مەن مىندەتتەرى تۋرالى تولىعىراق ايتىپ بەردى. حالىقتىڭ ءال-اۋقاتىن جاقسارتۋ ماقساتىندا قولعا الىنعان شارالار تۋرالى ەگجەي-تەگجەيلى بايانداي وتىرىپ، ول مەملەكەتتىڭ باسىمدىعى حالىقتىڭ تۇرمىس دەڭگەيىن بارىنشا جاقسارتۋ ەكەنىن اتاپ ءوتتى. باستى مىندەت – حالىقتى جۇمىسپەن قامتاماسىز ەتۋ، حالىقتىڭ الەۋمەتتىك قورعالماعان توپتارىنا مىندەتتى تۇردە مەملەكەت تاراپىنان قولداۋ كورسەتىلەدى.

ءبىر ايتا كەتەرلىگى، گ.ابدىقالىقوۆا از قامتىلعان وتباسىلارمەن كەزدەستى. 5 بالا تاربيەلەپ، بالاباقشادا تاربيەشىنىڭ كومەكشىسى بولىپ جۇمىس ىستەيتىن كوپبالالى انا ت.بەكبەردينوۆانىڭ پاتەرىندە بولعان پرەمەر-ءمينيستردىڭ ورىنباسارى اتاۋلى الەۋمەتتىك كومەكتىڭ جاڭا تەتىگىن ءتۇسىندىردى، وعان سايكەس بۇل وتباسى ەندى اي سايىن 141 125 تەڭگە الاتىن بولادى. ونان وزگە گ.ابدىقالىقوۆا ازاماتتاردى جەكە قابىلدادى. اتاپ ايتقاندا، س.تۇراشتىڭ ءوتىنىشى قاناعاتتاندىرىلدى، ول ءوز ۇيىندە تىگىن ءىسىن اشقىسى كەلەدى جانە قارجىلاندىرۋعا مۇقتاج. ءوڭىر باسشىلىعىنا 505 مىڭ تەڭگە كولەمىندە وتەۋسىز گرانت بەرۋ ماسەلەسىن شەشۋ تاپسىرىلدى. مال شارۋاشىلىعىمەن اينالىسۋعا شەشىم قابىلداعان س.كۇمىسبەك شاعىن نەسيە بەرۋدى سۇرادى. بۇل ماسەلە دە وڭ شەشىمىن تاۋىپ، وبلىس باسشىلىعى وعان شاعىن نەسيە بولەتىن بولدى. جۇمىس توبىنىڭ باسقا مۇشەلەرى وبلىس اۋداندارى بويىنشا ساپارلادى.

 

«تۇركىستان-اقپارات»

سوڭعى جاڭالىقتار